Nán maan e wla fi kɛ e ti “wlan-wlanfuɛ asiɛ’n su”
Nán maan e wla fi kɛ e ti “wlan-wlanfuɛ asiɛ’n su”
“An ti aofuɛ nin wlan-wlanfuɛ asiɛ’n su, ɔ maan ń srɛ́ amun kɛ an wla amun konvi b’ɔ maan amun nyin blo ninnge’m be su’n i ase.”—1 PIƐ. 2:11.
?WAFA SƐ YƐ AMÚN TƐ́ KOSAN NGA’M BE SU Ɔ?
?Ngue ti yɛ e kwla se kɛ be nga Ɲanmiɛn fɛli i wawɛ’n mannin be’n, be ti wlan-wlanfuɛ asiɛ’n su ɔ?
?Ngue ti yɛ e kwla se kɛ ‘bua’m be wie’m’ be ti wlanwlanfuɛ asiɛ’n su ɔ?
?Ngue yɛ amun ɲin o i sin ɔn?
1, 2. ?Wan mun yɛ Piɛli flɛli be kɛ ‘be bɔ Ɲanmiɛn fali be’n’ niɔn? ?Yɛ ngue ti yɛ i waan sran sɔ’m be ti “wlan-wlanfuɛ asiɛ’n su” ɔ?
KƐ ZEZI fuli ɲanmiɛn su m’ɔ dili afuɛ 30, akoto Piɛli klɛli fluwa kun ko mannin ‘be bɔ Ɲanmiɛn fali be bɔ be sanndili’n, bɔ be ti aofuɛ Pɔnt, nin Galasi, nin Kapadɔs, nin Azi, nin Bitini mɛn nun’n.’ (1 Piɛ. 1:1) Be nga mɔ Piɛli flɛli be kɛ ‘be bɔ Ɲanmiɛn fali be’n’ be yɛle be mɔ kɛ i sa’n, be kpali be sieli be ngunmin’n. Be ‘wuli be ekun, ɔ maan be wla o like bɔ be si weiin kpa kɛ ɔ o lɔ’n su.’ Be nin Klist bé kó dí famiɛn ɲanmiɛn su lɔ. (An kanngan 1 Piɛr 1:3, 4 nun.) ?Sanngɛ ngue ti yɛ i sin’n, Piɛli waan sran sɔ’m be ti “aofuɛ nin wlan-wlanfuɛ asiɛ’n su” ɔ? (1 Piɛ. 2:11) ?Yɛ e mɔ e nunman sran akpasua kaan sɔ’m be nun wie’n, ngue ti yɛ ɔ fata kɛ ndɛ sɔ’n yo e liɛ wie ɔ?
2 Sɛ be se kɛ Klistfuɛ nga be kpali be sieli be ngunmin’n be ti “wlan-wlanfuɛ asiɛ’n su” wa’n ɔ ti su. Afin be su kaman asiɛ’n su wa trilili. I sɔ’n ti yɛ akoto Pɔlu m’ɔ ti sran “akpasua kaan” nga be kpali be sieli be ngunmin’n be nunfuɛ’n, ɔ kannin ndɛ yɛ’n niɔn. I waan: “E liɛ’n, e ti nyanmiɛn su lɔ ba mun, e minndɛ e Defuɛ’n bɔ yɛlɛ e Min’n Jésus-Krist b’ɔ́ fín lɔ bá’n.” (Lik 12:32; Fil. 3:20) Ndɛ sɔ’n kle kɛ bé ɲán like ɲɛnmɛn kpa kun. Afin kɛ mɔ ‘be ti ɲanmiɛn su lɔ ba’n’ ti’n, kɛ be ko wu’n, bé káci aolia nun sran bé kó trán lɔ. Yɛ be su wuman kun. (An kanngan Filipfuɛ Mun 1:21-23 nun.) Ɔ maan sakpasakpa, be ti “wlan-wlanfuɛ” mɛn nga Satan sie i yɛ’n i nun.
3. ?‘Bua’m be wie’m’ be su kosan benin yɛ e kwla fa usa e wun ɔn?
3 ?Yɛ sran akpasua nga be flɛ be ‘bua’m be wie’m’ be li? (Zan 10:16) Biblu’n se kɛ be liɛ’n, bé trán asiɛ’n su wa titi. ?Sanngɛ, ngue ti yɛ e kwla se kɛ be kusu, be ti wlanwlanfuɛ asiɛ’n su wie ɔ?
“LIKE NGA NYANMIƐN YILI BE’N, BE KWLAA BE OTO”
4. ?Ngue yɛ sran’m be kwlá yoman naan ɔ wie ɔ?
4 Lele naan Zoova w’a nunnun Satan i mɛn tɛ nga’n, klɔ sran’m be kwlaa, yɛle kɛ Klistfuɛ mun o, be nga be timan Klistfuɛ mun o, be su yaciman ɲrɛnnɛn wunlɛ. Afin e ngba e su isa Satan i ɲin kekle’n i bo nzuɛn’n. I sɔ’n ti’n, Rɔmfuɛ Mun 8:22 se kɛ: “Kɛ ɔ fin lalaa lele b’ɔ w’a fa ju ndɛ’n, like nga Nyanmiɛn yili be’n, be kwlaa be oto, yɛ be wun nyrɛnnɛn kɛ bla bɔ w’a tran awuliɛ’n sa.” Kannzɛ politikifuɛ mun, nin siansifuɛ mun, ɔ nin be nga be man sika kɛ be fa uka be nga kekle o be su’n, be kplin be ɲin naan sran’m be su afɛ’n w’a wie’n, sanngɛ i kwlaa nga be yo’n, ɔ kpi ase.
5. ?Kɛ ɔ fɛ i afuɛ nga be flɛ i 1914 nun’n, ajalɛ benin yɛ sran kpanngban be fali ɔ? ?Yɛ ngue ti yɛ be fali ajalɛ sɔ’n niɔn?
5 Afuɛ nga be flɛ i 1914 nun’n, kɛ Ɲanmiɛn fali Klist Zezi sieli i Famiɛn bia’n su’n, sran kpanngban be fali ajalɛ kɛ bé súɛn i bo. Afin, be kunndɛman kɛ bé yó Satan i mɛn nga i nunfuɛ. Ɔ maan be kpliman mɛn nga i ti. Sanngɛ, be fa be sa nun ninnge’m be suan Ɲanmiɛn i Sielɛ’n i bo yɛ be fa be wun nannan su.—Rɔm. 14:7, 8.
6. ?Ngue ti yɛ e kwla se kɛ Zoova i Lalofuɛ’m be ti aofuɛ ɔ?
6 Zoova i Lalofuɛ’m be ti nvlenvle 200 tra su nunfuɛ. Yɛ be ɲin yi nvle sɔ’m be mmla mun. Sanngɛ, e kwla se kɛ be ti aofuɛ. Yɛle kɛ kan kwlaa nga be tran’n, be faman be wun wlaman politiki nin anuannzɛ nga be kunndɛ kɛ bé yó mɛn nga i kpa’n be nun. Afin mɛn uflɛ nga Ɲanmiɛn waan ɔ́ fá mán be’n, i su yɛ be wla’n wo ɔ. Ɔ ka kaan mɛn tɛ nga be ti nun wlanwlanfuɛ yɛ’n, ɔ́ wá wíe. Yɛ bé wá trán mɛn uflɛ sɔ’n nun tititi. Nanwlɛ, i sɔ’n yo be fɛ dan.
7. ?Blɛ benin nun yɛ Ɲanmiɛn i sufuɛ’m be su yoman wlanwlanfuɛ asiɛ’n su kun ɔn? ?Yɛ ninfan yɛ bé trán ɔn?
7 Ɔ ka kaan Klist wá núnnún Satan i mɛn tɛ nga. Yɛ ɔ nin sran nanwlɛfuɛ nga ɔ nin bé dí famiɛn’n bé wá yó naan fɔ m’ɔ o sran’m be nun’n ɔ nin be su afɛ’n be wie. I sin’n, be nga be kplinman su kɛ Zoova sie be’n, bé núnnún be sekeseke. I agualiɛ su’n, Ɲanmiɛn i sufuɛ kpa’m be su yoman wlanwlanfuɛ kun. Yɛle kɛ bé trán asiɛ mɔ ɔ́ wá káci lika klanman’n su tititi. (An kanngan Sa Nglo Yilɛ 21:1-5 nun.) Ɔ maan, kɛ ɔ́ fɛ́ i lɛ’n, ninnge nga Ɲanmiɛn yili be’n be kwlaa “bé nyán be ti, be su saci-man kun, yɛ nyrun nga Nyanmiɛn mma’m bé nyɛ́n i cɛn nga bé nyán alaje’n, be dunman’n tɛ́ nun wie.”—Rɔm. 8:21.
WAFA NG’Ɔ FATA KƐ KLISTFUƐ NANWLƐFUƐ’M BE NZUƐN’N YO’N
8, 9. ?Ngue ti yɛ Piɛli waan e ‘wla konvi b’ɔ maan [e] nyin blo ninnge’m be su’n i ase ɔ’?
8 Piɛli kannin wafa nga ɔ fata kɛ Klistfuɛ’m be nzuɛn’n yo’n, i ndɛ. Ɔ seli kɛ: “N sran kpa mun, an ti aofuɛ nin wlan-wlanfuɛ asiɛ’n su, ɔ maan ń srɛ́ amun kɛ an wla amun konvi b’ɔ maan amun nyin blo ninnge’m be su’n i ase, afin konvi sɔ’n kwla kun ye.” (1 Piɛ. 2:11) Ndɛ nga Piɛli kɛnnin i lɛ’n, ɔ ti Klistfuɛ nga Ɲanmiɛn kpali be sieli be ngunmin’n be liɛ trele. Sanngɛ ndɛ sɔ’n wɔ Zezi i sɔnnzɔnfuɛ onga’m be wie.
9 Wafa nga Ɲanmiɛn yili e’n maan e konvi o ninnge wie’m be yolɛ’n su. I wie yɛle aliɛ dilɛ’n nin nzan nɔnlɛ’n ɔ nin e ɲin su yiyilɛ’n ɔ nin nzɛmunlɛ bolɛ’n. Asa’n yasua kun nin i yi be konvi kwla tran sua silɛ’n su. Kɛ e yo ninnge sɔ mun kɛ Ɲanmiɛn kunndɛ’n sa’n, ɔ timan tɛ. Kpɛkun ɔ yo maan nguan nun tranlɛ’n yo fɛ. (1 Kor. 7:3-5) Sanngɛ nán ninnge ngba yɛ ɔ fata kɛ e konvi sɔ be ɔ. I ti’n, Piɛli seli kɛ e wla “konvi b’ɔ maan [e] nyin blo ninnge’m be su’n i ase, afin konvi sɔ’n kwla kun ye.” Yɛle kɛ ninnge wie’m be o lɛ’n, sɛ e konvi sɔ be naan e yo be’n, e nin Ɲanmiɛn e afiɛn’n sáci. I sɔ’n ti’n, ɔ fata kɛ e nian e wun su kpa. Ɔ timɛn i ti’n, e nguan’n fí e sa.
10. ?Ninnge benin mun yɛ Satan fa laka Ɲanmiɛn i sufuɛ mun ɔn?
10 Klistfuɛ nanwlɛfuɛ’m be kunndɛ kɛ bé yó “wlan-wlanfuɛ” mɛn nga nun. Sanngɛ Satan liɛ’n, ɔ kunndɛman sɔ. Ɔ maan w’a fua e ti kpa. I sɔ ti’n, ɔ fa ninnge kɛ aɲanbeun ninnge kpanngban kunndɛlɛ’n ɔ nin bla nin bian kunndɛlɛ sukusuku’n ɔ nin sran dan yolɛ’n ɔ nin sran kun i bɔbɔ ngunmin i wun akunndan bulɛ’n ɔ nin be nvle’n mɔ be klo i tratra su’n fa laka e. Ɔ maan nán maan e ɲin kpa i sɔ’n su. Sanngɛ maan e sasa e wun ninnge sɔ’m be lika. Sɛ e yo sɔ’n, é klé kɛ e kunndɛman kɛ é yó Satan i mɛn’n nunfuɛ mlɔnmlɔn, naan e mɛn liɛ’n te o siɛn. I sɔ’n ti’n, maan e kplin e ɲin titi. Afin like bɔbɔ kpa nga e kunndɛ’n yɛle kɛ é káci mɛn kpa nga Ɲanmiɛn wá síesíe mán e’n, i nunfuɛ.
E NZUƐN’N TI KPA
11, 12. ?Akunndan benin yɛ sran’m be bu i aofuɛ’m be lika ɔ? ?Yɛ Zoova i Lalofuɛ’m be li, akunndan benin yɛ sran wie’m be bu i be lika ɔ?
11 Piɛli i fluwa klikli’n i ndɛ tre 2 i mma 12 nun’n, ɔ kannin wafa nga ɔ fata kɛ e mɔ e ti “wlan-wlanfuɛ” mɛn nun’n e nanti’n, i ndɛ ekun. Ɔ seli kɛ: “An yo sa ng’ɔ ti kpa’n be nga be ti-man Kristfuɛ’n be nyrun naan sɛ be saci amun dunman kɛ an ti sa tɛ yofuɛ mun’n, be wun sa kpa nga an yo be’n naan cɛn nga Nyanmiɛn bá’n, be mɛnmɛn i.” Titi’n, kɛ aofuɛ’m be o klɔ kun su’n, ɔnvuɛ’m be tɔn be suɛn. Kɛ mɔ be wlawlaman be wun kɛ be sa, mɔ be ijɔman kɛ be sa, mɔ be yoman ninnge wie ekun kɛ be sa’n ti’n, be waan be ti tɛ. Sanngɛ, aofuɛ sɔ’m be ɲoliɛ kpa’n ti’n, kasiɛn be wun i kɛ be suɛn ngbɛn yɛ be tɔnnin ɔn.
12 Zoova i Lalofuɛ’m be kusu maan ɔ yo be ijɔlɛ nun o, annzɛ be ɲin su yiyilɛ nun o annzɛ be wun wlawlalɛ nun o, be yoman kɛ be mantanfuɛ mun sa. I sɔ’n ti’n, sran’m be tɔn be suɛn kɛ be timan kpa. Sanngɛ, Zoova i Lalofuɛ’m be ayeliɛ kpa’n ti’n, sran wie’m be yi be ayɛ.
13, 14. ?Ngue ti yɛ kɛ Zezi seli kɛ ‘waka kpa kwlaa su mma kpakpa’n,’ ɔ ti su ɔ? An fa sa wie mun yiyi nun.
13 E ayeliɛ kpa’n ɔ kwla yo naan sran’m b’a wun i wlɛ kɛ suɛn ngbɛn yɛ be tɔn e ɔ. Zezi bɔbɔ mɔ w’a yoman sa tɛ le’n, sran’m be kɛnnin i wun ndɛ tɛ. Be seli kɛ ɔ ti “aliɛ safuɛ nin nzan nɔnfuɛ, yɛ [ɔ] ti gua bo sika defuɛ nin sa tɛtɛ yofuɛ’m be janvuɛ.” (Mat. 11:19) Sanngɛ i ayeliɛ kpa’n ti’n, sran’m be wunnin i kɛ ɔ ti sran kpa. Ɔ maan Zezi i ndɛ ng’ɔ kɛnnin i yɛ’n, ɔ ti su. Ɔ seli kɛ: “Waka kpa kwlaa su mma kpakpa.” (Mat. 7:17) Wafa nga be yoli Zezi’n, i kunngba’n yɛ andɛ be yo Zoova i Lalofuɛ mun ɔn. I wie yɛle aniaan nga be di junman Alemaɲi Betɛli lɔ’n be liɛ’n. Yɛle kɛ be mantanfuɛ mun be seli kɛ aniaan sɔ’m be faman be wun mantanman sran, naan be o be liɛ ngunmin. Sanngɛ klɔ nga Betɛli’n wo lɔ’n, i su kpɛn’n, ɔ jrannin Zoova i Lalofuɛ’m be sin. Ɔ seli kɛ: “Ɔ ti su kɛ Zoova i Lalofuɛ nga be di junman lika sɔ’n nun’n, be le be mɛn dilɛ wafa. Sanngɛ, be kleman sran’m be yalɛ.”
14 Risi lɔ kusu’n, sran’m be tɔnnin Zoova i Lalofuɛ’m be suɛn kɛ be ti sa tɛtɛ yofuɛ. Yɛle kɛ nvle sɔ’n nun’n, klɔ nga be flɛ i Mɔsku i su jɔlɛ difuɛ’m be waan Zoova i Lalofuɛ’m be ti awlobo sacifuɛ, naan be su sran’m be bo kɛ be kun be wun, naan kɛ be tɔ tukpaciɛ’n be kplinman su kɛ dɔɔtrɔ’m be yo be ayre. I ti’n aniaan’m be fali ndɛ’n ɔli abloki nvle’m be jɔlɛ difuɛ’m be anuannzɛ’n i ja su. Afuɛ nga be flɛ i 2010 nun’n, Zuɛn anglo’n nun’n, anuannzɛ sɔ’n kpɛli ndɛ’n nun. Ɔ seli kɛ Mɔsku klɔ siefuɛ’m be leman atin seman Zoova i Lalofuɛ’m be kɛ nán be su be Ɲanmiɛn’n. Naan kusu, be leman atin seman be kɛ nán be yo be aɲia mun. Anuannzɛ sɔ’n kan ukali su kɛ, ndɛ nga Mɔsku klɔ’n i su jɔlɛ difuɛ’m be kan guali Zoova i Lalofuɛ’m be su’n, ɔ timan su. Afin b’a kwlá yimɛn i nglo kɛ Zoova i Lalofuɛ’m be yoli sa sɔ mun sakpasakpa. Yɛ be kɛnnin i ekun kɛ, Mɔsku klɔ’n i su jɔlɛ difuɛ mun be ndɛ nga be dili be guali Zoova i Lalofuɛ’m be su’n, b’a dimɛn i kpa.
E ƝIN YI KPƐNNGBƐN MUN
15. ?Biblu’n nun ndɛ cinnjin benin yɛ Klistfuɛ nanwlɛfuɛ’m be kwlaa be nanti su ɔ?
15 Piɛli kannin ndɛ kun ekun. Ɔ klɛli i kɛ: “E Min’n ti, maan amun nyin yi kpɛnngbɛn nga be sieli be’n be kwlaa: famiɛn ng’ɔ ti dan nin o, sɛ i sran ng’ɔ sie be b’ɔ sunman be [...] mun o.” (1 Piɛ. 2:13, 14) Ɔ fata kɛ Klistfuɛ’m nanwlɛfuɛ’m be kwlaa be nanti ndɛ sɔ’n su. Asa’n, kannzɛ be timan mɛn nunfuɛ’n, sanngɛ be fa Pɔlu i ndɛ yɛ’n su wie. I waan sɛ kpɛnngbɛn’m be mmla’n ɔ nin Ɲanmiɛn liɛ’n be sansanman be wun’n maan be fa su.—An kanngan Rɔmfuɛ Mun 13:1, 5-7 nun.
16, 17. (a) ?Ngue yɛ ɔ kle kɛ e timan mɛn siefuɛ’m be ɲrun tanndanfuɛ ɔ? (b) ?Ngue yɛ mɛn siefuɛ’m be bɔbɔ be sieli i nzɔliɛ ɔ?
16 Zoova i Lalofuɛ’m be ti “wlan-wlanfuɛ” asiɛ’n su. Sanngɛ, be tanndanman mɛn siefuɛ’m be ɲrun. Yɛ be yoman politiki. Kpɛkun, be nga be waan bé yó naan mɛn nga yo kpa’n, be suanman be bo. Asa ekun’n, Zoova i Lalofuɛ’m be timan kɛ asɔnun onga’m be sa. Be liɛ’n, be kanman politiki ndɛ. Be kleman mɛn siefuɛ’m be politiki yolɛ. Asa kusu’n, be suman sran’m be bo kɛ be jaso mɛn siefuɛ’m be wun. Sran ng’ɔ se kɛ be yo i sɔ sa’n, ɔ su bua ato!
17 Afɔtuɛ nga Piɛli mannin mɔ i waan Klistfuɛ’m be ‘bu famiɛn’n i sran’n,’ Zoova i Lalofuɛ’m be fa su. (1 Piɛ. 2:17) Mɛn siefuɛ’m be bɔbɔ be sieli i nzɔliɛ kɛ Zoova i Lalofuɛ’m be ti sran kpa. I wie yɛle ndɛ nga Alemaɲi lɔ bian kun kannin’n. Ɔ ti i klɔ’n su lɔ politikifuɛ dan kun. Ɔ seli kɛ i nun nga Alemaɲi mɛn nun lɔ’n bé klé Zoova i Lalofuɛ’m be ɲrɛnnɛn’n, be ayeliɛ’n yoli kpa titi. Kɛ be wlali be bisua’n, b’a kpɔciman be Ɲanmiɛn’n le. Yɛ be yoli be nga be nin be o lɔ’n, be ye titi. Ɔ kan guali su kɛ nzuɛn kɛ ngalɛ’n sa’n yɛ ɔ nin i fata kɛ be nvle nunfuɛ’m be yi i nglo ɔ. Afin, Alemaɲi lɔfuɛ’m be nun kpanngban be kloman be nga be fin nvle uflɛ nun’n. Asa’n, sɛ sran wie’m be ninnge nga be lafi su’n ɔ nin be liɛ’n timan kun’n annzɛ be nin be faman politiki ndɛ kunngba’n su’n, be buman be sran.
E YI SRAN KLOLƐ’N I NGLO
18. (a) ?Ngue ti yɛ ɔ timan kekle manman e kɛ e klo e niaan Klistfuɛ mun ɔn? (b) ?Ngue yɛ be nga be timan Zoova i Lalofuɛ’m be sieli i nzɔliɛ Zoova i Lalofuɛ’m be lika ɔ?
18 Akoto Piɛli klɛli i ekun kɛ: “An klo amun niaan Kristfuɛ mun, maan amun nyin yi Nyanmiɛn.” (1 Piɛ. 2:17) Zoova i Lalofuɛ’m be ɲin yi Ɲanmiɛn sakpa. I sɔ’n su be bo naan b’a yoman sa nga mɔ be si kɛ be yo ɔ, ɔ́ kún Zoova i ya’n. Asa’n, be nin be niaan nga be o mɛn wunmuan’n nun’n, be su Zoova likawlɛ. Ɔ maan be ti kɛ awlobo kunngba nunfuɛ sa. Nanwlɛ i sɔ’n yo be fɛ. I ti’n, ‘be niaan Klistfuɛ’m be klolɛ’n’ ɔ timan kekle be sa nun. Be nga be timan Zoova i Lalofuɛ bɔbɔ’n, be wunnin i sɔ’n wie. Afin mɛn tɛ nga nun mɔ sran’m be bu be bɔbɔ ngunmin be wun akunndan’n, be taman sran kɛ Zoova i Lalofuɛ mun sa’n be wun. I sɔ’n yɛ bla kun sieli i nzɔliɛ ɔ. Ɔ di junman susute nga be fa aofuɛ’m be wlanwlan Alemaɲi nvle’n nun klekle be lika mun’n, be nun kun nun. Afuɛ nga be flɛ i 2009 nun’n, Zoova i Lalofuɛ’m be yoli aɲia dan kun Alemaɲi lɔ. Yɛ aniaan nga be fin nvle uflɛ nun bali’n, bla sɔ’n sɔli be nun wie’m be nun. Kɛ ɔ wunnin wafa nga aniaan nga be ti Alemaɲi lɔfuɛ’m be yili be klolɛ’n i nglo aniaan nga be fin nvle uflɛ nun bali’n be lika’n, nanwlɛ ɔ boli i nuan dan. Ɔ seli kɛ ɔ di junman sɔ’n w’a cɛ, sanngɛ ɔ nin a wunmɛn i sɔ’n le. Aniaan bian kun kannin bla sɔ’n i ndɛ seli kɛ: “Wafa nga bla’n kannin e wun ndɛ’n, i kwlaa kle kɛ ndɛ’n boli i nuan dan.” ?Yɛ amun li? Atrɛkpa’n, amun a ti Zoova i Lalofuɛ’m be su ndɛ fɛ wie sran wie i nuan nun e aɲia dan kun bo le.
19. ?Ngue yɛ ɔ kunman e ɲannzuɛn ɔn? ?Yɛ ngue ti ɔ?
19 Kɛ e fa kannin’n sa’n, wafa nga e Zoova i Lalofuɛ mun e fa nanti mɛn’n nun’n, ɔ kle kɛ e ti “wlan-wlanfuɛ” Satan i mɛn tɛ nga nun. Yɛ i sɔ’n kunman e ɲannzuɛn. Like nga e fa e wla gua su’n, ɔ ti nanwlɛ like sakpa. Yɛle kɛ e si kɛ ɔ cɛ kaan sa’n, Ɲanmiɛn wá síesíe mɛn uflɛ kun mán e. Mɛn sɔ’n yɛ ɔ́ yó e liɛ ɔ. E ngba e ɲin o mɛn sɔ’n i sin kpa. ?Nɛ́n i ɔ?
[Kosan mun]
[Foto, bue 23]
E kpliman Satan i mɛn’n i ti.
[Foto, bue 23]
Mɛn nga Ɲanmiɛn mán e’n i ndɛ yɛ e kan ɔn.
[Foto, bue 25]
Biblu’n ukali Risi lɔ awlobo nga nunfuɛ mun, be bo yoli kun.
