?Sa nga be ju’n, ɔ ti mɔ e fa usa Ɲanmiɛn?
?Sa nga be ju’n, ɔ ti mɔ e fa usa Ɲanmiɛn?
SRAN wie’m be waan ɔ nin i fataman kɛ be usa Ɲanmiɛn kɛ ngue ti yɛ ɔ yo sa ɔ, annzɛ ngue ti yɛ w’a yoman sa ɔ. Be waan sɛ sran kun yo sɔ’n, nn ɔ su fɛ i ɲin wlawla Ɲanmiɛn. ?Yɛ ɔ li, a bu i sɔ wie?
Sɛ a bu i sɔ wie’n, nn ɔ fata kɛ a si kɛ sran nanwlɛfuɛ wie’m be seli Ɲanmiɛn kɛ ɔ kan sa nga ti yɛ sa wie’m be juli’n, be ndɛ kle be.
Zɔbu m’ɔ suli Ɲanmiɛn nanwlɛ su’n, ɔ usɛli i kɛ: “?Ɔ yo sɛ ti yɛ a kaci ɔ sin a si min bɔ a yo kɛ ɔ kpɔfuɛ yɛlɛ min sa nin-ɔn?”—Zɔb 13:24.
Abakiki m’ɔ ti Ɲanmiɛn i nuan ijɔfuɛ nanwlɛfuɛ’n, ɔ usɛli i kɛ: “?Yɛ wuun nguɛ ti yɛ a nian sa tɛ yofuɛ sɔ’m be aeliɛ’n, bɔ a tɛ-man be su nin-ɔn? ?Kɛ klunwifuɛ’m bé trá be bɔ be ti nanwlɛfuɛ mun bɔ bé núnkun be’n, nguɛ ti yɛ a kan-man ndɛ nin-ɔn?”—Abakik 1:13.
Zezi Klist usɛli i kɛ: “?Min Nyanmiɛn, min Nyanmiɛn, nguɛ ti yɛ a kaci ɔ sin a si min-ɔn?”—Matie 27:46.
Kɛ e kanngan Biblu’n i lika sɔ’m be nun’n, e wunmɛn i lɔ kɛ, sa nga i sufuɛ’m be usɛli i lɛ’n ti’n Ɲanmiɛn Zoova * fali be wun ya. Sanngɛ i sɔ’n boman e nuan. Afin kɛ e sa mian like wie kɛ aliɛ sa’n i wun’n, naan e srɛ Ɲanmiɛn kɛ ɔ man e’n, ɔ wɔmɛn i safle, ɔ man e. (Matie 6:11, 33) I kunngba’n, sɛ ndɛ wie yɛ ɔ kwla uka e naan e wla w’a gua ase naan e wun w’a fa e feke’n, ɔ fiaman su, ɔ bo su kle e. (Filipfuɛ Mun 4:6, 7) I ti’n, Zezi wlɛli i sɔnnzɔnfuɛ’m be fanngan seli kɛ: “An srɛ, bé fá mán amun, an kunndɛ, amún nyɛ́n.” (Matie 7:7) Ɔ maan, Zezi su se kɛ like kwlaa nga i sɔnnzɔnfuɛ’m be sa miɛn i wun’n, be srɛ Ɲanmiɛn kɛ ɔ fa man be. Sanngɛ nán like kɛ aliɛ sa’n i ngunmin i ndɛ yɛ ɔ kan ɔn. Ndɛ nga sran kun fa usɛ i wun m’ɔ kunndɛ kɛ Ɲanmiɛn yiyi nun kle i’n, ɔ o nun wie.
?Sɛ a ɲɛn i wun atin’n, kosan nga be o yɛ’n be nun onin yɛ á fá úsa Ɲanmiɛn ɔn?
● ?Ngue ti yɛ n wo asiɛ’n su ɔ?
● ?Sɛ n wu’n, min liɛ yó sɛ?
● ?Ngue ti yɛ a yaci min lɛ mɔ n wun ɲrɛnnɛn ɔn?
Á wá wún kosan sɔ’m be su tɛlɛ’n Biblu’n m’ɔ ti Ɲanmiɛn Ndɛ’n i nun. Afin “Nyanmiɛn Ndɛ nga be klɛli’n, i bɔbɔ yɛ ɔ fɛ i kwlaa mannin sran mun yɛ be klɛli-ɔ.” (2 Timote 3:16) Sran wie’m be fali kosan sɔ’m be usali be wun wie. Like nga ti yɛ be fa usali be wun’n, ɔ nin wafa nga Biblu’n tɛ be su’n, maan e nian.
[Ja ngua lɛ ndɛ’n]
^ Biblu’n kle kɛ Ɲanmiɛn i dunman’n yɛle Zoova.
