?NGUE yɛ yasua kun kwla yo naan i yi’n i wla w’a gua ase ɔ? Yasua sunman be bakan nun’n, be kleli be kɛ like ng’ɔ ti cinnjin’n yɛle kɛ, maan be man be yi nin be mma’m be sika kpanngban. Sanngɛ, bla wie mɔ be wun’m be man be ninnge kpanngban’n, be wla guaman ase. Be klun titi be cɛn kwlaa. I wie yɛle Ɛspaɲi lɔ bla kun mɔ be flɛ kɛ i Roza i liɛ’n. Kɛ ɔ́ kɛ́n i wun’n i ndɛ’n, ɔ seli kɛ: “Gua su lɔ’n, ɔ ti bian kpa. Sanngɛ awlo lɔ’n, ɔ timan sɔ mlɔnmlɔn.” Be flɛ Ananngo bla kun kɛ Jɔi. Ɔ seli kɛ: “Sɛ min wun’n se min kɛ n yo like wie naan ɔ timan min klun su’n, ɔ se min kɛ: ‘Like kwlaa nga n se wɔ kɛ a yo’n, ɔ fata kɛ a yo. Afin n ti ɔ wun.’”

?Wafa sɛ yɛ yasua kun kwla kle kɛ ɔ ti bian kpa ɔ? ?Ngue yɛ ɔ kwla yo naan i yi’n i “wla w’a gua ase ɔ”?​—Rit 1:9.

Ɲanmiɛn ɲrun’n, yasua’m be kpa traman bla mun. Yɛ bla’m be kpa traman yasua mun. Kusu’n, Biblu’n kle yasua kun nin i yi be junman m’ɔ fata kɛ be tinuntinun be di ɔ. Rɔmufuɛ Mun 7:2 se kɛ bla nga i wun’n i ɲin te o su’n, ɔ “di aja’n i nun mmla’n su.” Titi’n, kɛ sran nɲɔn annzɛ sran kpanngban be yia like kun su kɛ bé yó’n, be fa be nun kun sie be su kpɛn. Ɲanmiɛn kusu waan yasua yɛ ɔ sie i yi ɔ. (1 Korɛntfuɛ Mun 11:3) Ɔ maan, yasua mun yɛ ɔ fata kɛ be sie be awlobo mun ɔn.

?Nja mun, kɛ Ɲanmiɛn se kɛ amun sie amun yi mun’n, wafa sɛ yɛ ɔ fata kɛ amun sie be ɔ? Ɲanmiɛn Ndɛ’n se kɛ: “Kɛ Krist kloli Asɔnun’n, amun kusu an klo amun yi mun sɔ.” (Efɛzfuɛ Mun 5:25) Zezi w’a jaman bla. Sanngɛ, ɔ kle yasua’m be ajalɛ klanman kpa. ?Ajalɛ benin yɛ ɔ kle be ɔ?

Zezi guali sran’m be awlɛn su nzue. Be kwlaa nga be wla w’a bo be wun’n, ɔ nin be nga afɛ’n tin be su kɛ trɔ nɔnninnɔnnin wie sa’n, Zezi seli be kɛ: “An bla min sin. [...] Yɛ amun wla wá gúa ase.” (Matie 11:28, 29) Zezi yoli tukpacifuɛ’m be juejue. Kpɛkun, ɔ kleli be like naan be fa be wun mantan Ɲanmiɛn. Kɛ mɔ sran’m be si kɛ Zezi gúa be awlɛn su nzue ti’n, be suli i su titi.

Wafa nga yasua’m be kwla nanti Zezi i ajalɛ’n su’n. Nja mun, kɛ amun yi’m bé dí awlo’n nun junman’n, an  kunndɛ wafa nga amun kwla uka be’n. Roza mɔ e dun mmua kɛnnin i ndɛ’n, ɔ seli kɛ: “Min liɛ’n, m’an kaci min wun i junman difuɛ.” Ndɛ kunngba sɔ’n yɛ bla wie’m be kan ɔn. Be flɛ Gana bian kun kɛ Kueku. I liɛ’n, ɔ ti bian kpa. Ɔ seli kɛ: “Blɛ sunman’n, like nga n kwla yo naan junman w’a tinman min yi’n i su’n, n usɛ i. Kɛ mɔ n klo i’n ti’n, n sisiman min bo naan m’an ukɛ i awlo nun junman’m be dilɛ’n nun.”

Zezi sili aunnvuɛ. Bla kun o lɛ’n, tukpacɛ’n w’a kle i yalɛ lele w’a di afuɛ 12. Kɛ ɔ tili i kɛ Zezi yo abonuan sa mun’n, ɔ “seli kɛ: ‘Sɛ n kwla kɛn i tralɛ’n bɔ cɛ’n, ń yó juejue.’” Kɛ bla’n kannin Zezi i tralɛ’n, ɔ kali lɛ yoli juejue sakpasakpa. Atrɛkpa’n, sran wie’m be seli kɛ bla’n leman atin yoman sɔ. Sanngɛ Zezi liɛ’n, ɔ wunnin i wlɛ kɛ bla’n su fɛ. a I sɔ’n ti’n, ɔ seli kɛ: “N wa, Nyanmiɛn su bɔ a lafi’n ti, w’a nyan ɔ ti. Gua ɔ wla ase, kɔ, maan ɔ tukpacɛ’n wie.” Nanwlɛ, Zezi wunnin i wlɛ kɛ tukpacɛ’n kle bla’n i yalɛ dan. Ɔ maan, w’a ijɔmɛn i. I lɛ’n nun’n, Zezi kleli kɛ ɔ ti sran kpa naan ɔ si aunnvuɛ.​—Mark 5:25-34.

 Wafa nga yasua’m be kwla nanti Zezi i ajalɛ’n su’n. Nja mun, sɛ amun wun kɛ amun yi’m be wun yoman be fɛ’n, maan be ndɛ lo amun. An tra amun awlɛn be wun. Amun kunndɛ like nga ti yɛ be wun yoman be fɛ’n. Kpɛkun, amun wun i wlɛ kɛ sɛ ɔ ti amun’n, kɛ amún yó sɔ wie ɔ. Be flɛ bian kun kɛ Rikardo. Ɔ seli kɛ: “Sɛ n wun kɛ min yi’n i ɲrun’n ti mlanwa’n, n kanman ndɛ wie m’ɔ kwla be i awlɛn ekun ɔn.”

Zezi nin i sɔnnzɔnfuɛ’m be tran be kokoli yalɛ. Zezi nin i janvuɛ’m be kokoli yalɛ titi. Ɔ seli kɛ: “Like nga n suɛnnin n Si sa nun’n, n kleli amun i kwlaa.” (Zan 15:15) Cɛn kunngun’n, Zezi cuɛnnin i wun naan w’a kwla srɛ Ɲanmiɛn. Sanngɛ, ɔ nin i sɔnnzɔnfuɛ’m be kokoli yalɛ titi. Kɔnguɛ nga i nun yɛ be trɛli i naan bé kó kún i’n, ɔ kɛnnin i klun ndɛ kleli i sɔnnzɔnfuɛ mun. Ɔ seli be kɛ: “Awlaboɛ’n su kun min.” (Matie 26:38) Wie liɛ’n, i sɔnnzɔnfuɛ’m b’a yoman sa ng’ɔ ti kpa’n. Sanngɛ, ɔ nin be w’a yaciman yalɛ kokolɛ le.—Matie 26:40, 41.

Wafa nga yasua’m be kwla nanti Zezi i ajalɛ’n su’n. Nja mun, akunndan nga amun bu’n, ɔ nin wafa nga amun wun yo amun’n, amun kan kle amun yi mun. Bla kun kwla sie i nzɔliɛ kɛ gua su lɔ’n, ijɔlɛ’n timan i wun’n i nuan nun tankantankan. Sanngɛ awlo lɔ’n, ɔ tɔ amunle. Be flɛ bla kun kɛ Ana. I liɛ’n, i wun’n nin i be koko yalɛ. Ɔ maan, ɔ seli kɛ: “N wun kɛ min wun’n klo min sakpa. Yɛ e nin i e afiɛn mantan kpa.”

Sɛ amun yi’m be yo amun sa’n, nán amun se kɛ amun nin be ijɔman naan b’a si kɛ b’a yo amun sa. Bla kun seli kɛ: “Kɛ min wun’n fa ya’n, ɔ di cɛn kpanngban ɔ nin min ijɔman. Ɔ yo sɔ naan min wla bo min wun.” Be flɛ bian kun kɛ Ɛdwini. I liɛ’n, ɔ miɛn i ɲin nanti Zezi i ajalɛ’n su. Ɔ seli kɛ: “Kɛ n fa ya’n, n gua min wla ase. N minndɛ blɛ ng’ɔ ti su’n naan y’a siesie e afiɛn.”

Jɔi mɔ e kɛnnin i ndɛ i bo bolɛ’n nun’n, ɔ wunnin kɛ i wun’n wa kacili i ayeliɛ’n. Afin Zoova i Lalofuɛ’m be kle i Biblu’n nun like. Ɔ seli kɛ: “Siɛn’n, ɔ miɛn i ɲin nanti Zezi i ajalɛ’n su. Ɔ maan, w’a yo bian kpa.” Zoova i Lalofuɛ’m be kleli yasua nin bla akpinngbin be Biblu’n nun like. Yɛ sran sɔ’m be ɲannin be like klelɛ’n i su mmlusuɛ. ?A kunndɛ kɛ á sí Biblu’n nun like wie? Sɛ ɔ ti sɔ’n, kan kle Zoova i Lalofuɛ mun. Bé klé ɔ Biblu’n nun like, yɛ a su tuaman be kalɛ.