KOKO nun wa’n, fluwa sifuɛ kun fali asɔnun blu nin nɲɔn tra su be nun gbanflɛn nin talua 800. I waan ɔ́ úsa bé nían sɛ be lafi su kɛ Zezi yɛ ɔ tɛ be srɛlɛ’n su o. Be nun 480 tra su be seli kɛ Zezi yɛ ɔ tɛ be su ɔ. Sanngɛ talua kun liɛ’n, ɔ seli kɛ “Ɲanmiɛn” yɛ ɔ ti i srɛlɛ’n niɔn.

?Yɛ ɔ li, a bu i sɛ? ?Zezi yɛ ɔ fata kɛ e srɛ i yɛ, annzɛ kusu Ɲanmiɛn Kpli ɔ? a Sɛ e waan é wún i wlɛ’n, ɔ fata kɛ e fa e ɲin sie i srɛlɛ’n i su ndɛ nga Zezi kan kleli i sɔnnzɔnfuɛ mun’n i su.

Zezi kleli e sran ng’ɔ fata kɛ e srɛ i’n.

NDƐ NG’Ɔ KANNIN’N: Cɛn kun’n, Zezi i sɔnnzɔnfuɛ kun seli i kɛ: “Nannan, kle ye sran nin Nyanmiɛn be yalɛ kokolɛ.” Zezi tɛli i su kɛ: “Sɛ amún kókó yalɛ klé Nyanmiɛn’n, an se kɛ: ‘E Si.’” (Lik 11:1, 2) Cɛn kun ekun’n, kɛ Zezi kán Ɲanmiɛn ndɛ’n oka’n su lɔ’n, ɔ seli i ndɛ tiefuɛ mun kɛ be ‘srɛ be Si.’ Kpɛkun, ɔ seli ekun kɛ: “Amun Si si like nga amun sa miɛn i wun’n i sin naan amu’an se i.” (Matie 6:6, 8) Kɔnguɛ kasiɛn’n nun kwlaa naan b’a trɛ i kɛ bé kó kún i’n, ɔ seli i sɔnnzɔnfuɛ mun kɛ: “Like kwlaa nga an srɛ n Si min dunman nun’n, ɔ́ fá mán amun.” (Zan 16:23) I lɛ’n nun’n, Zezi kle e kɛ i Si Zoova m’ɔ ti e Si wie’n, i kunngba cɛ yɛ ɔ fata kɛ e srɛ i ɔ.​—Zan 20:17.

KƐ I BƆBƆ SRƐ́’N: Kɛ Zezi bɔbɔ srɛ́’n, ɔ seli kɛ: “N Si, wɔ bɔ a sie like’n kwlaa nyanmiɛn su lɔ nin asiɛ’n su wa’n, kwla o.” (Lik 10:21) Cɛn kun’n, Zezi “mɛnnin i nyin su niannin nyanmiɛn’n su lɔ, yɛ ɔ seli kɛ: ‘N Si, kwla o, afin ndɛ nga n kannin’n, a tili.’” (Zan 11:41) Kpɛkun, kɛ be boboli i waka’n su m’ɔ́ ká nun’n, ɔ seli kɛ: “N Si, wa fa min o!” (Lik 23:46) Zezi srɛli i Si Ɲanmiɛn m’ɔ “sie like’n kwlaa nyanmiɛn su lɔ nin asiɛ’n su wa’n.” Ajalɛ yɛ ɔ kleli e naan e kwlakwla e nian su ɔ. (Matie 11:25; 26:41, 42; 1 Zan 2:6) ?Zezi i sɔnnzɔnfuɛ klikli’m be nantili ajalɛ sɔ’n su?

Kɛ Zezi wuli’n, ɔ sɛli i sin ɲanmiɛn su lɔ. W’a cɛman lele, i kpɔfuɛ’m be boli i sɔnnzɔnfuɛ’m be yalɛ klelɛ bo. (Sa Nga Be Yoli’n 4:18) Kɛ ɔ yoli sɔ’n, be srɛli. ?Sanngɛ, wan yɛ be srɛli i ɔ? Biblu’n se kɛ: “Be kwlaa be mannin be nɛn’n su be [srɛli] Nyanmiɛn.” Be seli i kɛ ɔ jran be sin “Jésus i dunman nun.” (Sa Nga Be Yoli’n 4:24, 30) I sɔ’n kle kɛ Zezi i sɔnnzɔnfuɛ’m be nantili ajalɛ ng’ɔ kleli’n su. Be srɛli Ɲanmiɛn, b’a srɛman Zezi.

Kɛ afuɛ wie’m be sinnin’n, Pɔlu kannin wafa nga i bɔbɔ nin i wiengu’m be srɛli’n i ndɛ. Ɔ seli i niaan Klistfuɛ mun kɛ: “E la e Min Jésus-Krist i Si Nyanmiɛn’n i ase, yɛ e srɛ i titi kɛ ɔ nian amun su.” (Kolɔsfuɛ Mun 1:3) Cɛn kun ekun’n, ɔ seli be kɛ: “Sa’n kwlakwla nun’n, an la e si Nyanmiɛn ase titi e Min Jésus-Krist dunman nun.” (Efɛzfuɛ Mun 5:20) E wun kɛ Pɔlu wlɛli i  niaan’m be fanngan kɛ sa kwlaa nun’n, be srɛ “e si Nyanmiɛn.” Sanngɛ, maan be srɛ i Zezi i dunman nun.​—Kolɔsfuɛ Mun 3:17.

Kɛ Klistfuɛ klikli’m be fa yoli’n sa’n, maan e kusu e nanti ajalɛ nga Zezi kleli’n su. Sɛ e yo sɔ’n, é klé kɛ e ɲin yi i. (Zan 14:15) Sɛ e srɛ e Si Ɲanmiɛn kunngba cɛ’n, é kán ndɛ nga jue tofuɛ’n kannin’n wie. Jue Mun 116:1, 2 nun’n, ɔ seli kɛ: “N klo Anannganman, afin ɔ ti min aniɛn’n. [...] Kɛ min nyin tɛ o su’n, n yacimɛn i kpan flɛlɛ le.” b