LIBAN lɔ waka nga be flɛ i kɛ sɛdri’n, ɔ yo dan tra olivie waka mun leleele. Sanngɛ, olivie waka’m be cɛ kpa, be wuman ndɛndɛ. Olivie waka wie’m b’a di afuɛ kɔe 1.000. Olivie waka’n i olui’m be wla ase kpa. Ɔ maan, sɛ be kpɛ i bo naan i olui’m b’a wuman kee’n, ɔ fɛfɛ ekun.

Ɲanmiɛn i sufuɛ Zɔbu lafili su kpa kɛ sɛ ɔ wu’n, Ɲanmiɛn maan ɔ́ cɛ́n nguan. (Zɔb 14:13-15, NW) Ɔ fali waka kun i sunnzun ase fa kleli kɛ Ɲanmiɛn kwla yo sɔ sakpa. Atrɛkpa’n, olivie waka’n i ndɛ yɛ Zɔbu kannin ɔn. Ɔ seli kɛ: “Sɛ be kpɛ waka’n su’n, ɔ fɛfɛ ekun-ɔn ɔ yo ye, ɔ fɛfɛ kpanngban ekun.” Kɛ wawa kpɛn’n, olivie waka’n wu kee. Sanngɛ kɛ nzue’n tɔ su’n, á nían ɔn, i olui’m b’a fɛfɛ. A wun i “sama mun sa-a, ɔ waan blɛ li yɛ ɔ su jaso su-ɔ.”​—Zɔb 14:7-9.

Be nga be di olivie fie’n, be kunndɛ kɛ olivie waka m’ɔ wu kee’n, ɔ fɛfɛ i olui kun su ndɛndɛ. I wafa kunngba’n, Zoova kunndɛ kɛ ɔ́ cɛ́n i sufuɛ nin sran kpanngban nga be wuli mun ndɛndɛ. (Mat. 22:31, 32; Zan 5:28, 29; Yol. 24:15) Kɛ é wá wún i sɔfuɛ mun’n, nanwlɛ, ɔ́ yó e fɛ dan.