NDƐ NG’Ɔ KLƐ FLUWA’N SU’N | ?WAN YƐLE ZOOVA I LALOFUƐ MUN?
?Sran benin yɛle Zoova i Lalofuɛ mun?
E ti asɔnun akpasua klonglo kun. E o nvle kpanngban nun. Etazini lɔ yɛ e asɔnun’n i bo bia’n wo ɔ. E ju sran kɔe miliɔn mɔcuɛ. Yɛ e kle sran mun Biblu’n nun like nvle ya nɲɔn ablasan (230) tra su nun. Kɛ e yo sɔ’n, e nanti ndɛ nga Zezi kannin’n su. Ɔ seli kɛ: “Bé wá kán Nyanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Nyanmiɛn ndɛ’n.”—Matie 24:14.
Sɛ nvle nga Zoova i Lalofuɛ’m be o su’n be mmla’n nin Ɲanmiɛn liɛ’n be sansanman be wun’n, Zoova i Lalofuɛ’m be nanti su. Sanngɛ e yoman politiki. Yɛ kɛ nvle’m bé kún alɛ’n, e kunman wie. Afin, e nanti ndɛ nga Zezi kannin’n su. Ɔ seli Klistfuɛ mun kɛ “be ti-man mɛn nunfuɛ.” (Zan 15:19; 17:16) I sɔ’n ti, kɛ bé kún alɛ dan’n i nɲɔn su’n, be wlali Zoova i Lalofuɛ wie’m be bisua. Be kleli be ɲrɛnnɛn tɛtɛ kpa. Yɛ be kunnin wie mun. Alemaɲi lɔ Ɲanmiɛn sulɛ wafa’m be kpɛnngbɛn kun kannin Zoova i Lalofuɛ’m be ndɛ. Ɔ seli kɛ: “Be kwla si be wue nun be se kɛ be ngunmin cɛ, b’a jranman Itilɛli sin.”
“[Zoova i Lalofuɛ’m] be nzuɛn’n ti kpa. Sran sɔ’m be buman be ngunmin be wun akunndan. Be kwla di awa junman dandan mun. Sanngɛ, be yoman politiki. [...] Be ɲin yi siefuɛ mun. Sanngɛ, be lafi su kɛ Ɲanmiɛn Sielɛ’n i kunngba cɛ yɛ ɔ kwla yo sran’m be ye mlɔnmlɔn ɔn.” —Nova, ɔ ti Cekɔslovaki lɔ fluwa kun.
Kannzɛ e timan mɛn’n nunfuɛ’n, sanngɛ e yiman e wun mɛn’n nun. Kɛ Zezi srɛ́ i sɔnnzɔnfuɛ’m be ti’n, ɔ seli Ɲanmiɛn kɛ: “N srɛ-man wɔ kɛ a yi be mɛn’n nun.” (Zan 17:15) Ɔ maan, a kwla wun kɛ e kɔ junman, e kɔ gua dilɛ. Yɛ e mma’m be kɔ suklu’m be nun.
Ninnge wie mɔ be kwla yo ɔ fɛ ekun'n
KOSAN MƆ BIBLU’N TƐ BE SU’N
?Ngue yɛle Ɲanmiɛn Sielɛ’n?
Nian like nga ti yɛ Ɲanmiɛn Sielɛ’n ti kpa tra sran’m be awa mun lele’n.
