?Sran i fuɛn yralɛ’n i su ndɛ benin yɛ Biblu’n kan-ɔn?

Ndɛ nga Biblu’n kan’n

Biblu’n kanman sran fuɛn yralɛ’n i su ndɛ trele sa. Biblu’n mmla fi seman kɛ sɛ sran wu’n, maan be sie i annzɛ be yrɛ i.

Sanngɛ, Biblu’n kan Ɲanmiɛn i sufuɛ kpa wie mɔ be sieli be sran ng’ɔ wuli’n be ndɛ. Be nun kun yɛle Abraamun. Kɛ i yi Sara wuli’n, ɔ miɛnnin i ɲin kpa kunndɛli lika kun sieli i.—Bo Bolɛ 23:2-20; 49:29-32.

Biblu’n kan Ɲanmiɛn i sufuɛ kpa wie mɔ be wɔli be sran nga be wuli’n be fuɛn’m be nun’n, be ndɛ wie. Kɛ Famiɛn Saili nin i wa yasua nsan’m be ɔli alɛ kunlɛ mɔ be kunnin be’n, be kpɔfuɛ’m be yoli be fuɛn’m be finfin. Kɛ Izraɛlifuɛ’m be tili sa sɔ’n nun’n, be nun sran nga be ti Ɲanmiɛn sufuɛ nanwlɛfuɛ’n, be ɔli be ko fali Saili nin i mma’m be fuɛn’n naan b’a yra be. (1 Samiɛl 31:8-13) Biblu’n nun kusu, b’a seman kɛ i sɔ mɔ be yoli’n ti tɛ.—2 Samiɛl 2:4-6.

Sran fuɛn yralɛ’n, i su ndɛ nga sran’m be kan m’ɔ timan su’n

Ndɛ nga sran’m be kan’n: Ɔ ti sran’n i fuɛn’n i finfin yolɛ.

Ndɛ ng’ɔ ti nanwlɛ’n: Biblu’n se kɛ be nga b’a wu’n, be sa be sin be kaci fa. Kɛ sran kun wu’n, i fuɛn’n kplɔ, kpɛkun kɛ ɔ́ cɛ́ kɔ́’n, ɔ kaci fa. (Bo Bolɛ 3:19) I wafa kunngba’n, kɛ be wɔ sran kun i fuɛn’n nun, ɔ kaci nzuɛn annzɛ fa wie. Ɔ cɛman lele naan w’a kaci fa.

Ndɛ nga sran’m be kan’n: Lalafuɛ nun’n, be nga b’a yoman Ɲanmiɛn i klun sa’n sran’m be yrali be fuɛn’n niɔn.

Ndɛ ng’ɔ ti nanwlɛ’n: Izraɛlifuɛ’m be blɛ su’n, be yrali sa tɛ yofuɛ wie’m be fuɛn’n. Kɛ Akan nin i awlofuɛ’m be liɛ’n yoli sɔ-ɔ. (Zozie 7:25) Sanngɛ, nɛ́n i sɔ yɛ be yoli i titi-ɔ. (Mmla’n 21:22, 23) Ɲanmiɛn i sufuɛ kpa wie mun bɔbɔ’n, be yrali be fuɛn’n. Be nun kun yɛle Famiɛn Saili i wa Zonatan.

Ndɛ nga sran’m be kan’n: Sɛ be yra sran kun i fuɛn’n Ɲanmiɛn su kwlá cɛnmɛn i.

Ndɛ ng’ɔ ti nanwlɛ’n: Kɛ sran kun ko wu’n, sɛ be sieli i-o, sɛ be yrɛli i fuɛn’n nin-o, sɛ jenvie’n yɛ ɔ dili i-o, sɛ kusu nnɛn wlɛ wie yɛ ɔ dili i-o, Ɲanmiɛn kwla cɛn i sɔfuɛ’n. (Sa Nglo Yilɛ 20:13) Ɲanmiɛn kwla sa kwlaa yo. Ɔ kwla bo sran’n sɔ’n i uflɛ.—1 Korɛntifuɛ Mun 15:35, 38.

Sran’n i sielɛ annzɛ i fuɛn’n i yralɛ: ?Beninfuɛ’n yɛ amún fá-ɔ?

Kwlaa naan amun a fa ajalɛ kun’n, maan amun bu ndɛ nga’m be akunndan:

Like nga sran’n kunndɛli kɛ amun yo’n. Biblu’n kan sran wie mɔ kwlaa naan b’a wu’n, be kleli like nga be kunndɛli kɛ be osufuɛ’m be yo’n i ndɛ. Kɛ be wuli’n, be osufuɛ’m be yoli i kɛ nga be fa kannin’n sa.—Bo Bolɛ 50:4, 5; Ezipt Lɔ Tulɛ 13:19.
Wafa nga amun tranwlɛ’n nun lɔ’n sran’m be yo ninnge mun’n. Lika wie’m be nun’n, kɛ sran wu’n, ɔ le wafa nga sran’m be yo i fuɛn’n niɔn. (Zan 19:40) I wie yɛle kɛ, Izraɛlifuɛ’m be blɛ su’n, kɛ sran wu’n, be sie i. (Bo Bolɛ 49:31; 1 Samiɛl 28:3) Andɛ kusu’n, sran kun kwla se kɛ, sɛ wafa nga i tranwlɛ lɔ sran’m be yo be fuɛn mun’n, ɔ fɔnman Ɲanmiɛn i mmla mun’n, ɔ́ nían su.
Awa’n i mmla’n. Biblu’n se kɛ maan e ɲin yi siefuɛ mun. (Rɔmunfuɛ Mun 13:1) Nvle wie’m be nun’n, awa’n mannin like ng’ɔ fata kɛ be fa yo sran’m be fuɛn’n i su mmla. I wie yɛle kɛ, klɔ wie’m be su’n, awa’n manman atin kɛ be fa sran’n i saka mɔ be yrɛli i’n, i nzuɛn’n be guɛ i lika wie’m be nun.
Wafa nga i sɔ yolɛ’n kwla yo sran uflɛ mun’n. Biblu’n wla e fanngan kɛ nán e bu e ngunmin e wun akunndan. (Filipufuɛ Mun 2:4) Kwlaa naan amun a fa ajalɛ kun’n, maan amun usa amun wun kɛ: ‘?Wafa sɛ yɛ min osufuɛ’m be bu sran fuɛn yralɛ’n annzɛ i sielɛ’n niɔn? ?Wafa sɛ yɛ lika nga n tran lɛ’n, sran’m be bu i sɔ yolɛ’n niɔn?’

Ndɛ uflɛ wie mun

Nguan nin Wie’n Kosan mɔ biblu’n tɛ be su’n

Ninnge wie mɔ be kwla yo ɔ fɛ ekun'n

NINNGE CINNJIN NGA BIBLU’N KLE BE’N

https://cms-imgp.jw-cdn.org/img/p/502018130/univ/art/502018130_univ_sqr_xl.jpg

ijwbq ndɛ 144

Zoova i Lalofuɛ mun

?Sran i fuɛn yralɛ’n i su ndɛ benin yɛ Biblu’n kan-ɔn?

Ndɛ nga Biblu’n kan’n

Sran fuɛn yralɛ’n, i su ndɛ nga sran’m be kan m’ɔ timan su’n

Ndɛ uflɛ wie mun

Ninnge wie mɔ be kwla yo ɔ fɛ ekun'n

?Be nga be wuli’n be o nin?

?Ngue yɛle sran cɛnlɛ’n?

Se e naan e wa nian ɔ osu