Sanvuɛsa nga be ju e su andɛ’n, be finman Ɲanmiɛn. Sanngɛ be nga i sɔ sa wie ɲan be’n, be ndɛ lo Ɲanmiɛn. Sanvuɛsa’m be o ninnge nga be yo maan klɔ sran’m be fɛ mɔ Ɲanmiɛn sielɛ blɛ’n nun’n be su tranman lɛ kun’n, be nun. Ka naan i sɔ blɛ’n w’a ju’n, Ɲanmiɛn fɔnvɔ be nga sanvuɛsa’m be ɲan be’n.—2 Korɛntifuɛ Mun 1:3.

•  ?Ngue ti yɛ e si kɛ sanvuɛsa nga be ɲan e’n be timan fɔ mɔ Ɲanmiɛn su tu e-ɔ?

•  ?Sanvuɛsa’m be kle kɛ e o mɛn’n i awieliɛ blɛ’n nun?

•  ?Wafa sɛ yɛ Ɲanmiɛn uka be nga sanvuɛsa ɲan be mun-ɔn?

•  ?Ka naan sanvuɛsa wie w’a ju’n Biblu’n kwla uka e naan y’a siesie e wun?

•  Biblu’n nun ndɛ mma nga be kwla fɔnvɔ be nga sanvuɛsa ɲan be’n

 Ɲanmiɛn fali ninnge kɛ nzue annzɛ asiɛ m’ɔ keje sa’n fa tuli sran wie’m be fɔ. Wafa ng’ɔ fali ninnge sɔ mun fa yoli i klun sa’n, ɔ nin wafa nga sanvuɛsa’m be ju’n ɔ timan kun.

•   Kɛ sanvuɛsa tɔ’n ɔ kpaman sran nun. Biblu’n kle kɛ kɛ Ɲanmiɛn fá ninnge kɛ nzue annzɛ asiɛ m’ɔ keje sa’n fá tú sran’m be fɔ’n, klunwifuɛ’m be ngunmin yɛ be wu-ɔ. I wie yɛle kɛ kɛ Ɲanmiɛn núnnún Sodɔmun nin Gomɔru’n, ɔ yoli maan Lɔtu nin i wa bla nɲɔn’m be fiteli nun. (Bo Bolɛ 19:29, 30) Blɛ sɔ’n nun’n, Zoova niannin klɔ sɔ’n i sufuɛ’m be awlɛn’n nun yɛ be nga be klun yo wi’n be ngunmin yɛ ɔ nunnunnin be-ɔ.—Bo Bolɛ 18:23-32; 1 Samiɛli 16:7.

•   Kwlaa naan sanvuɛsa kun w’a tɔ’n ɔ ju wie’n sran’m be siman sɔ bɔbɔ. Sanngɛ Ɲanmiɛn liɛ’n, kwlaa naan w’a fa like kɛ nzue annzɛ asiɛ m’ɔ keje sa’n w’a fa nunnun klunwifuɛ mun’n, ɔ dun mmua bo i jɔ. Be nga be sie be su i nuan bo’n, be fite nun.—Bo Bolɛ 18:23-32; 1 Samiɛli 16:7.

•   Ɔ ju wie’n sran’m be bɔbɔ yɛ be yo maan sanvuɛsa ɲan be-ɔ. ?Ngue ti yɛ e se sɔ-ɔ? Sran’m be saci asiɛ’n yɛ be kplan sua lika nga asiɛ’n kwla keje lɛ’n nun. Asa’n be yo ninnge mun lika nga nzue kwla di lɛ’n annzɛ i wunsu sa wie’m be kwla ju lɛ’n nun. (Sa Nglo Yilɛ 11:18) Kɛ sran’m be fɛ i sɔ ajalɛ mɔ sa ɲan be’n, e kwlá seman kɛ Ɲanmiɛn ti yɛ sa sɔ’n juli be su-ɔ.—Ɲanndra Mun 19:3.

 Ɛɛn-ɛn, Biblu’n se kɛ “mɛn’n i awieliɛ blɛ’n” nun’n sanvuɛsa’m bé jú. (Matie 24:3; 2 Timote 3:1) Kɛ Zezi kán e blɛ nga i ndɛ’n ɔ seli kɛ: “Awe’n wá kpɛ́n, yɛ asiɛ’n wá kéje. Kɛ amún tí i kɛ w’a keje lika nga sa nun’n, amún tí i ekun-ɔn, w’a keje lika uflɛ.” (Matie 24:7) Sanngɛ ɔ ka kan’n, Ɲanmiɛn wá yí ninnge kwlaa nga be fa ɲrɛnnɛn yi i klɔ sran’m be su’n. Ninnge sɔ’m be nun wie mun yɛle sanvuɛsa mun.—Sa Nglo Yilɛ 21:3, 4.

•   Ɲanmiɛn sin Biblu’n m’ɔ ti i nuan ndɛ’n i lika fɔnvɔ be nga sanvuɛsa ɲan be’n. Biblu’n se kɛ e ndɛ lo Ɲanmiɛn yɛ kɛ sa’m be o e su’n wafa nga e wun yo e’n ɔ wun i wlɛ. (Ezai 63:9; 1 Piɛli 5:6, 7) Asa’n, Ɲanmiɛn ta e nda kɛ blɛ kun wá jú’n sanvuɛsa’m be su juman kun.—Kanngan kuku nga be flɛ i kɛ “ Biblu’n nun ndɛ mma wie mɔ be kwla fɔnvɔ be nga sanvuɛsa ɲan be’n” i nun.

•   Ɲanmiɛn sin i sufuɛ’m be lika fɔnvɔ be nga sanvuɛsa ɲan be’n. Ɲanmiɛn se i sufuɛ’m be kɛ be nian Zezi i ajalɛ’n su. Ɲanmiɛn nuan ijɔfuɛ’m be seli kɛ Zezi wá fɔ́nvɔ “be nga be awlɛn’n w’a kpɔtɔ be klun’n” nin “be kwlaa nga be o sɛ nun’n.” (Ezai 61:1, 2) Ɲanmiɛn i sufuɛ’m be mian be ɲin be yo like nga Zezi yoli’n wie.—Zan 13:15.

   Asa’n Ɲanmiɛn se i sufuɛ’m be kɛ be yo ninnge trele wie mun fa uka be nga sanvuɛsa ɲan be’n.—Sa Nga Be Yoli’n 11:28-30; Galasifuɛ Mun 6:10.

 Ɛɛn-ɛn. Kannzɛ Biblu’n timan fluwa kun m’ɔ kle e ninnge nga e kwla yo be fa siesie e wun ka naan sanvuɛsa wie w’a ju’n, sanngɛ ɔ man e afɔtuɛ wie mɔ be kwla e uka kpa-ɔ. Be nun wie mun yɛ:

•   Maan e siesie e wun e sie. Biblu’n se kɛ: “Sran ng’ɔ sɛsɛ i wun’n, kɛ ɔ wun kɛ sa wie su ba’n, kpɛkun w’a fia.” (Ɲanndra Mun 22:3) Sɛ e dun mmua e bu like nga é yó i sa kekle wie nun’n e sie’n, é klé kɛ e ti ngwlɛlɛfuɛ. I sɔ yolɛ nun’n, maan e fa ninnge wie mun e sie i pata kun nun e sie. I liɛ’n sɛ sanvuɛsa wie ju naan ɔ fata kɛ e wanndi’n é fá kɔ́. Asa’n maan e bu lika nga e awlobofuɛ’m be kwlaa be ti kwla yia lɛ’n i akunndan e sie.

•   Maan e nguan’n yo e cinnjin tra e sa nun ninnge mun. Biblu’n se kɛ: “Y’a faman like fi y’a baman mɛn’n nun, yɛ e su faman like fi e kɔman.” (1 Timote 6:7, 8) Sɛ sanvuɛsa wie ti’n ɔ fata kɛ e yaci e sua’n nin e bo ninnge mun e wanndi’n, nán e sisi e bo i sɔ yolɛ’n nun. Nán e wla fi su kɛ e nguan’n ti cinnjin tra aɲanbeun ninnge mun lele.—Matie 6:25.