Biblu’n se kɛ Ɲanmiɛn kunndɛman kɛ klɔ sran’m be ‘kunndɛ bla annzɛ bian sukusuku, annzɛ be yo i wunsu ɲannzuɛn sa mun.’ (1 Tesalonikifuɛ Mun 4:3) Kɛ Biblu’n kan “bla nin bian kunndɛlɛ sukusuku nin i wunsu ɲannzuɛn sa’m be ndɛ’n,” i wie yɛle be wiengu bo bian annzɛ bla kunndɛlɛ’n, ɔ nin yasua mɔ be nin be wiengu yasua be la’n annzɛ bla mɔ be nin be wiengu bla be la’n, ɔ nin be nga be nin-a jaman mɔ be si sua’n.

•  ?Ngue ti yɛ Ɲanmiɛn ɲrun’n ɔ ti cinnjin kɛ yasua kun nin bla kun be ja kwlaa naan b’a tran likawlɛ-ɔ?

•  ?Yasua kun nin bla kun be kwla se kɛ bé trán likawlɛ kwlaa naan b’a bu aja’n i akunndan?

•  ?Ngue yɛ yasua kun nin bla kun be kwla yo naan be aja’n w’a taka kpa-ɔ?

•   Ɲanmiɛn yɛ ɔ kpɛli aja’n i ba-ɔ. Kɛ Ɲanmiɛn fali bla klikli’n mannin yasua klikli’n, i lɛ nun yɛ ɔ kpɛli aja’n i ba-ɔ. (Bo Bolɛ 2:22-24) Ɔ maan Ɲanmiɛn ɲrun’n sɛ yasua kun nin bla kun b’a ja’n yɛ be kwla tran likawlɛ-ɔ.

•   Ɲanmiɛn si like ng’ɔ ti kpa man klɔ sran mun. Ɲanmiɛn kunndɛ kɛ yasua nin bla nga b’a ja’n be tran likawlɛ titi, naan be awlofuɛ’m be kwlaa be ɲan su ye. Maan e fa sa kun e yiyi nun. Maan e se kɛ y’a to tabli kun. Wie liɛ’n, be wlɛ i sin fluwa yɛ fluwa sɔ’n yɛ ɔ kle wafa ng’ɔ fata kɛ be wlawla tabli’n niɔn. I wafa kunngba’n, Ɲanmiɛn yɛ ɔ kle e like ng’ɔ fata kɛ e yo naan e aja’n w’a taka kpa’n niɔn. Sran ng’ɔ nanti Ɲanmiɛn i mmla’m be su’n ɔ ɲan su ye titi.—Ezai 48:17, 18.

•   Kɛ yasua kun nin bla kun b’a jaman mɔ be si sua’n i bo’n kwla gua tɛ kpa. I wie yɛle kɛ bla’n kwla fa kuɛ kusu nn ɔ timɛn i klun su. Asa’n be kwla man be wiengu tukpacɛ, annzɛ i sɔ’n kwla yo maan be wla bo be wun.

•   Ɲanmiɛn mannin yasua’n nin bla’n be atin kɛ be si sua naan be wu ba. Ɲanmiɛn ɲrun’n nguan’n ti like cinnjin kpa. Kɛ Ɲanmiɛn mannin klɔ sran’m be atin kɛ be wu ba’n, ɔ ti like cinnjin kpa kun m’ɔ fa cɛli be-ɔ. Kɛ e bu aja’n i like cinnjin’n, e kle kɛ e bu atin mɔ Ɲanmiɛn mannin klɔ sran mun kɛ be wu ba’n i like cinnjin wie.—Ebre Mun 13:4.

 Ɔ timan cinnjin kɛ yasua kun nin bla kun be se kɛ bé dún mmúa trán likawlɛ ka naan b’a ja. Sanngɛ kɛ yasua kun nin bla kun be bo yo kun be jran sa nga be tɔ be su be aja’n nun i ɲrun kekle’n yɛ be di aklunjɔɛ-ɔ. a Kɛ yasua kun nin bla kun be ja’n, i sɔ’n wla be fanngan naan b’a kwla tran likawlɛ titi.—Matie 19:6.

 Aja wie fi nunman lɛ mɔ ndɛ nunman nun-ɔn. Sanngɛ yasua nin bla nga be nanti Biblu’n nun ndɛ’n su’n be aja’n kwla taka kpa. Biblu’n nun afɔtuɛ sɔ’m be nun wie mun yɛ:

•   Maan ɔ wun annzɛ ɔ yi i ninnge liɛ’m be yo ɔ cinnjin tra ɔ liɛ mun.—1 Korɛntifuɛ Mun 7:3-5; Filipufuɛ Mun 2:3, 4.

•   Maan amun klo amun wiengu yɛ amun ɲin yi amun wiengu.—Efɛzifuɛ Mun 5:25, 33.

•   Maan amun bu ndɛ nga amún kán klé amun wiengu’n i sin ka naan amun a kan.—Ɲanndra Mun 12:18.

•   Maan amun tra amun awlɛn amun wiengu wun, yɛ amun yaci sa cɛ ndɛndɛ.—Kolɔsufuɛ Mun 3:13, 14.