Atrɛkpa’n a nin yasua kun annzɛ bla kun amun su nian amun wiengu nzuɛn. Kpɛkun a sie ninnge wie’m be nzɔliɛ mɔ be sanngan wɔ akunndan-ɔn. ?Ngue yɛ ɔ fata kɛ a yo-ɔ? ?Ɔ fata kɛ amun titi nun annzɛ sɛ? Ndɛ akpasua nga wá úka wɔ naan w’a wun ajalɛ ng’ɔ fata kɛ a fa’n.

Ndɛ nga nun

•  Kɛ ninnge wie’m be sanngan wɔ akunndan’n

•  Ndɛ nga a kwla bu su akunndan’n

•  ?Yɛ sɛ ɔ fata kɛ amun titi nun’n nin?

 Kɛ yasua kun nin bla kun be bo be wiengu nzuɛn nianlɛ bo’n, be bu i kɛ be nuan sɛ́ ndɛ kwlaa su. Sanngɛ kɛ ɔ́ kɔ́ i ɲrun’n, be wun kɛ ɔ timan sɔ, naan ɔ le sran kun nin i nzuɛn. Wie liɛ’n:

•   Kun klo nzue wuɛlɛ. Sanngɛ kun klo ajalɛ tulɛ.

•   Kun klo ijɔlɛ. Sanngɛ kun ti diin.

•   Kun diman nanwlɛ blɛ kwlaa nun. Sanngɛ kun’n klo nanwlɛ dilɛ.

 Ninnge nga e kannin be ndɛ lɛ’n, be fa e ɲin sie i ninnge cinnjin nsan be su. Ndɛ ɲanman klikli’n kle kɛ be nɲɔn’n be kloman like kunngba’n. Ndɛ ɲanman nɲɔn su’n kle kɛ be nɲɔn’n be nzuɛn’n timan kun. Kpɛkun ndɛ ɲanman nsan su’n kle kɛ ɔ le sran kun nin i like liɛ m’ɔ ti i cinnjin-ɔn.

 Bu ndɛ nga i sin nian: ?Sa nsan nga e boli be su lɛ’n, be nun onin yɛ sɛ a ja bla annzɛ bian’n i trawlɛ’n kwla yo kekle man wɔ-ɔ? ?Yɛ be nun onin yɛ ɔ kwla sɔn ɔ nun-ɔn?

 Kannzɛ yasua kun nin i yi be kloman like kunngba’n naan be nzuɛn’n timan kun’n, sanngɛ be kwla di aklunjɔɛ be aja’n nun. Kannzɛ bɔbɔ be ti be wun aniɛn kpa’n, sanngɛ i sɔ’n kleman kɛ be klo ninnge kunngba mun. Kpɛ sunman’n, bla’n annzɛ yasua’n fɛ i ɲin sie like nga i wun’n annzɛ i yi’n klo i’n su, kpɛkun ɔ nin i be yo like sɔ’n likawlɛ. Wie liɛ bɔbɔ’n, be ɲan be wiengu kun’n i nzuɛn’n i su ye. a

 Sanngɛ ninnge nga be ti ɔ cinnjin kpafuɛ’n be liɛ’n, ɔ fata kɛ be yo i cinnjin wie. I wie yɛle kɛ ɔ fata kɛ ɔ su Ɲanmiɛn kɛ wɔ sa, i nzuɛn’n yo kpa kɛ wɔ liɛ’n sa, yɛ mmla nga a di be su’n ɔ fata kɛ ɔ di be su wie. Sanngɛ sɛ a wunmɛn i kɛ ninnge sɔ’m be ti i cinnjin wie’n, ɔ kle kɛ ɔ fata kɛ a yi ɔ ja.

 I wie yɛle Ɲanmiɛn sulɛ’n i liɛ’n. Fluwa kun m’ɔ kan aja’n i ndɛ’n se kɛ: “E sieli i nzɔliɛ kɛ blɛ sunman nun’n, yasua nin i yi nga be Ɲanmiɛn sulɛ wafa’n timan kun’n, be yra.”

 Afɔtuɛ nga Biblu’n man’n: “Nán amun nin be nga be lafi-man Krist su’n, bɔ amun nzuɛn’n sɛ-man’n, an san nun.”—2 Korɛntifuɛ Mun 6:14, Nyanmiɛn Ndɛ’n.

 Biblu’n se kɛ be nga be ja bla annzɛ bian’n “bé wún be ɲin su.” (1 Korɛntifuɛ Mun 7:28) Ɔ maan sɛ a nin yasua kun annzɛ bla kun amun su nian amun wiengu nzuɛn naan ndɛ kanngan wie’m be tɔ amun afiɛn dɔ nga su’n, nɛ́n i sɔ’n bo ɔ nuan.

 Nán kɛ mɔ ndɛ kanngan wie’m be tɔ amun afiɛn’n ti yɛ á sé kɛ ɔ su yoman ye-ɔ. Kosan ng’ɔ fata kɛ a fa usa ɔ wun’n yɛle kɛ: ?Kɛ ndɛ kun tɔ’n, e kwla siesie i wɛtɛɛ su? Ɔ fata kɛ amun suɛn i sɔ yolɛ dɔ nga su. I liɛ’n, sɛ cɛn wie lele amun ja’n, i sɔ’n úka amun.

 Afɔtuɛ nga Biblu’n man’n: “An yo amun wiengu ye, an si aunnvɔɛ, yɛ an yaci amun wiengu i wun sa cɛ i klun ufue su.”—Efɛzifuɛ Mun 4:32.

 Sanngɛ sɛ cɛn kwlaa ndɛ tɔ amun afiɛn, annzɛ ndɛ nga be tɔ’n, be siesielɛ leman ba’n, i sɔ’n kle kɛ atrɛkpa’n tranlɛ’n wá yó kekle. Sɛ a wun i sɔ liɛ’n i wlɛ dɔ nga su’n, ɔ flunman tra kɛ amun ja ka naan w’a wun i sɔ liɛ’n i wlɛ.

 Maan ndɛ nga ka ɔ klun: Atrɛkpa’n, sa wie’m be ti’n, a wun kɛ sran nga a nin i be san nun’n, ɔ su yoman bla kpa annzɛ bian kpa. Annzɛ kusu a wun i wlɛ kɛ a nin-a juman bla annzɛ bian jalɛ. Sɛ i sɔ’n akunndan’n ba ɔ ti nun’n, nán se kɛ ɔ yoman like fi.

 Afɔtuɛ nga Biblu’n man’n: “Sran ng’ɔ sɛsɛ i wun’n, kɛ ɔ wun kɛ sa wie su ba’n, kpɛkun w’a fia, sanngɛ be nga be siman sa’n, be kuku be wun ko yi nun, kpɛkun be wun be ɲrun.”—Ɲanndra Mun 22:3.

 Kɛ a nin sran kun be san nun, mɔ kasiɛn su’n amun titi nun’n, i sɔ’n yo ya kpa. Sanngɛ sɛ sa wie’m be ti’n, ɔ akunndan’n w’a sanngan, annzɛ amun nɲɔn’n yɛ amun akunndan’n w’a sanngan’n, ɔ flunman kɛ amun titi nun.

 ?Wafa sɛ yɛ ɔ fata kɛ amun titi nun-ɔn? Sɛ w’a yoman kɛ ndɛ cinnjin wie ti’n, nán klɛ sran’n i mesazi pɔɔtablu nun annzɛ ɛntɛnɛti su se i kɛ an titi nun. Sanngɛ maan amun nuan sɛ cɛn ɔ nin dɔ ɔ nin lika nga amun kwla yia’n be su. Kpɛkun amun yia be koko ndɛ cinnjin sɔ’n i su yalɛ’n.

 Afɔtuɛ nga Biblu’n man’n: “Maan amun kan ndɛ nanwlɛ kle amun wiengu.”—Zakari 8:16.

 ?Sɛ amun titi nun’n, ɔ kle kɛ ɔ liɛ su yoman ye? Nɛ́n i sɔ-ɔ. Afin kɛ sran nɲɔn be san nun naan bé nían be wiengu nzuɛn’n, i agualiɛ su’n be fa ajalɛ. Yɛle kɛ be kwla ja annzɛ be kwla titi nun. Sɛ be titi nun bɔbɔ’n, be kwla fa sa ng’ɔ juli’n tu be wun fɔ.

 Usa ɔ wun kɛ: ‘?Ngue yɛ sa ng’ɔ juli’n ɔ kle min-ɔn? ?Ɔ fata kɛ min ɲin ti kan ekun? ?Sɛ e nin sran uflɛ e san nun’n, ngue yɛ n su yomɛn i kun-ɔn? ?Yɛ ngue yɛ ń yó i siɛn’n niɔn?