?Koko nun wa’n ɔ janvuɛ annzɛ ɔ osufuɛ kun wuli? Sɛ ɔ ti sɔ’n, ndɛ nga wá úka ɔ naan w’a jran ɔ awlabɔɛ’n i ɲrun kekle.

Ndɛ nga nun’n é wá tɛ́ kosan nga’m be su:

•  ?Min wla bo min wun dan ngboko?

•  ?Ngue yɛ ɔ kwla uka min naan m’an jran awlabɔɛ’n i ɲrun kekle-ɔ?

•  Ndɛ nga ɔ wiengu’m be kan’n

 Sran kpanngban be liɛ’n, kɛ be awlɛn su sran kun wu’n be awlabɔɛ yo dan yɛ ɔ wieman ndɛ.

 Be flɛ talua kun kɛ Olivia. Ɔ seli kɛ: “Ɔ leman cɛn ba kun sa mɔ n buman min nannan yasua’n i akunndan-ɔn. Kannzɛ ɔ wuli w’a di afuɛ nɲɔn’n sanngɛ kɛ ń kɛ́n i ndɛ’n saan ń sún.”

 Be flɛ talua kun kɛ Alisɔnun. Ɔ seli kɛ: “Min nannan bla’n wlali min fanngan titi kɛ n yia ninnge nga n fa sie min ɲrun kɛ ń yó be’n be nuan.Sanngɛ ɔ wuli ka naan m’an kwla yo ninnge sɔ mun. Blɛ kwlaa nga n yo ninnge sɔ’m be nun kun’n min wla bo min wun, afin ɔ nunman lɛ naan w’a wun i.”

 Kɛ e awlɛn su sran kun wu’n, wafa nga e wun yo e’n ti fanunfanun.

 Be flɛ talua kun kɛ Nadinin. Ɔ seli kɛ: “Kɛ min tɔntɔn’n wuli’n, ɔ boli min nuan dan. Yɛ i sɔ’n cɛli kpa. Kpɛ klikli nga min awlɛn su sran kun wu’n yɛ ɔ o lɛ-ɔ. I wulɛ’n fuli min nun yɛ ɔ yoli min ya kpa.”

 Be flɛ gbanflɛn kun kɛ Kaalɔsu. Ɔ seli kɛ: “Kɛ min nannan yasua wuli’n n fɛli i wun ya. Afin e seli i kɛ ɔ niɛn i wun su ninnge wie’m be nun sanngɛ w’a yoman sɔ.”

 Be flɛ talua kun kɛ Adriana. Ɔ seli kɛ: “Kɛ e nannan yasua’n wú’n, e nin min niaan bla e ngunmin cɛ yɛ y’a wunman nun-ɔn. Ɔ maan min akunndan’n buli min fɔ, afin ɔ yo min kɛ m’an kwlá kalemɛn i sa..”

 Be flɛ gbanflɛn kun kɛ Zarɛdi. Ɔ seli kɛ: “Aniaan kun nin i yi mɔ e si be kpa’n be wuli asidan nun. Ɔ maan blɛ kwlaa nga min osufuɛ kun fite’n srɛ kun min. Afin ɔ yo min kɛ sa kunngba’n su wa ju i su wie sa.”

 Be flɛ talua kun kɛ Zuliana. Ɔ seli kɛ: “Min nannan wuli w’a di afuɛ nsan. I nun m’ɔ te o nguan nun’n e nin i y’a yoman ninnge sunman likawlɛ. Ɔ maan i sɔ’n yo min nsisɔ.” 

 Kɛ e awlɛn su sran kun wu’n, ɔ kwla bo e nuan, e kwla fa ya, e akunndan’n kwla bu e fɔ, srɛ kwla kun e yɛ ninnge wie mɔ e nin i y’a kwlá yoman be’n ti’n ɔ kwla yo e nsisɔ. Sɛ ɔ wun yo ɔ sɔ wie’n gua ɔ wla ase afin kɛ ɔ́ cɛ́ kɔ́’n, i ya’n ɔ́ kán ase. ?Sanngɛ lele naan wa yo sɔ’n ngue yɛ a kwla yo i dɔ nga su naan awlabɔɛ’n w’a tinman ɔ su-ɔ?

 Kan wafa ng’ɔ wun yo wɔ’n kle ɔ janvuɛ kun. Biblu’n se kɛ janvuɛ kpa’n “kɛ lika’n jran ɔ su’n, ɔ kaci ɔ niaan.” (Ɲanndra Mun 17:17) Sɛ a kan wafa ng’ɔ wun yo wɔ’n i ndɛ kle sran’n, i sɔ’n úka ɔ naan w’a jran kekle.

 Be flɛ talua kun kɛ Ivɛti. Ɔ seli kɛ: “Sɛ ɔ sran wu naan ɔ wla bo ɔ wun’n ɔ timan tɛ. Ɔ ju wie’n sɛ a kunndɛ kɛ á ká ɔ ngunmin’n ɔ ti su. Sanngɛ blɛ sɔ nun’n ɔ akunndan’n kwla tran ninnge nga be wlaman fanngan’n be su. I sɔ’n ti yɛ ɔ ti cinnjin kɛ a kan ɔ klun ndɛ kle sran’n niɔn.”

 Nán ɔ wla fi ɔ sran ng’ɔ wuli’n su. Biblu’n se kɛ “sran kpa’n, ɔ yi like kpa i ninnge kpakpa nga be o i awlɛn’n nun’n be nun fite.” (Liki 6:45) A kwla klɛ ninnge kpakpa nga a nin sran’n be yoli m’ɔ wla kpɛn be su’n sie annzɛ a kwla fɛ i foto wie mun sie. Kpɛkun cɛn kunngun a kwla kanngan ndɛ sɔ’n nun annzɛ a kwla nian foto sɔ mun.

 Be flɛ gbanflɛn kun kɛ Jefre. Ɔ seli kɛ: “N klɛli like kwlaa nga min janvuɛ’n kleli min ka naan w’a wu’n n sieli. I sɔ mɔ n yoli’n ɔ ukali min naan m’an niɛn i ajalɛ’n su titi. Kɛ n klɛli min sran ng’ɔ wuli’n i su ndɛ’n i sɔ’n ukali min naan m’an jran min awlabɔɛ’n i ɲrun kekle.”

 Nian ɔ wun lika. Biblu’n kle kɛ be wun kpinngbinlɛ’n yo be wun sa ye. (1 Timote 4:8) Di like kpa, kpinngbin ɔ wun yɛ lo wunmiɛn kpa.

 Be flɛ talua kun kɛ Maria. Ɔ seli kɛ: “Kɛ sran kun i wla bo i wun’n i akunndan’n sanngan. Ɔ maan ɔ fata kɛ a nian ɔ wun lika kpa. I lɛ nun’n di aliɛ kpa yɛ lafi kpa.”

 Uka sran uflɛ. Biblu’n se kɛ: “Sɛ a cɛ sran like’n, ɔ klun jɔ kpa tra kɛ be cɛ wɔ like’n.”—Sa Nga Be Yoli’n 20:35.

 Be flɛ gbanflɛn kun kɛ Kaalɔsu. Ɔ seli kɛ: “Yo ninnge wie mun fa ti sran’m be wun ɲanman nun. I li be nga be sran wuli’n be yɛ ɔ fata kɛ a uka be kpa-ɔ. I sɔ’n kwla uka ɔ naan w’a wun i wlɛ kɛ nán ɔ ngunmin yɛ sa sɔ’n wo ɔ su-ɔ.”

 Kan ɔ klun ndɛ kle Ɲanmiɛn. Biblu’n se kɛ Zoova ‘tie e srɛlɛ mun.’ (Jue Mun 65:2) Asa’n ɔ se kɛ Zoova “yo be nga be awlɛn’n w’a kpɔtɔ be klun’n be juejue. Ɔ cici be kannin’m be su.”—Jue Mun 147:3.

 Be flɛ talua kun kɛ Zanɛti. Ɔ seli kɛ: “Srɛ Zoova kɛ ɔ suan ɔ bo. Ɔ ju wie’n lika’n kwla jran kpa yɛ ɔ ju wie kusu’n lika’n kwla yo kpa. Sanngɛ blɛ kwlaa sɔ nun’n Zoova su yaciman ɔ le.”

 Nán fa ɔ wun sunnzun ɔ wiengu. Kɛ sran kun i sran wu’n wafa nga i wun fa yo i’n ɔ nin sran uflɛ liɛ’n timan kun. Biblu’n se kɛ kɛ Zakɔbu buli i kɛ i wa’n w’a wu’n “w’a kplinman su kɛ be fɔnvɔ i.” (Bo Bolɛ 37:35) Ɔ maan sɛ ɔ awlabɔɛ’n cɛ’n nán maan i sɔ’n bo ɔ nuan.

 Be flɛ talua kun kɛ Telɔɔ. Ɔ seli kɛ: “Min nannan bla i niaan bla wuli i afuɛ 15 yɛ sanngɛ kɛ n wun ninnge wie mun’n min wla ka lɛ kpɛn i su.”

 Sɛ ɔ lika kun bu’n, ɔ lika sɔ’n yo ɔ ya yɛ ɔ cɛ naan w’a sa su ekun. Blɛ sɔ nun’n dɔɔtrɔ ng’ɔ nian ɔ lika’n kwla kle wɔ ayre wie mun annzɛ ɔ kwla se wɔ kɛ a yo ninnge wie mun naan w’a yo juejue.

 I wafa kunngba’n kɛ e awlɛn su sran kun wu’n ɔ yo e ya yɛ kɛ ɔ ko yo naan w’a si e wun’n ɔ fa blɛ. I ti’n tra ɔ awlɛn. Fa ɔ ɲin sie i ninnge nga e kannin be ndɛ’n be su yɛ nian nga be kwla uka ɔ kpa’n.