E sieli i nzɔliɛ kɛ be nga be kɔ asɔnun’n, be nun sunman be klo kɛ e nin be e koko Biblu’n nun ndɛ’m be su yalɛ. Kannzɛ e lafiman like kunngba’n su’n, e ɲin yi be yɛ e mianman be fii kɛ be fa nga e kan’n su.

 Kɛ e nin sran kun e kan Ɲanmiɛn sulɛ ndɛ’n, e mian e ɲin e nian ndɛ nga Biblu’n kan’n su. E kan ndɛ’n “wɛtɛɛ su” nin “amanniɛn su.” (1 Piɛli 3:15) E si kɛ sran’m wie’m be su sɔman ndɛ nga e kan’n nun klanman. (Matie 10:14) Sanngɛ e si kɛ sɛ e nin sran kun e nin a kokoman yalɛ’n, sɛ ɔ́ sɔ́ e ndɛ’n nun-o annzɛ ɔ su sɔman nun-o, e kwlá wunmɛn i wlɛ. Asa kusu’n, sran’m be su sa’m be kacikaci.

 I wie yɛle kɛ, e kwla to sran kun mɔ junman sɔn i su-ɔ. Ɔ maan ɔ su kpliman su kɛ ɔ nin i e kókó yalɛ. Sanngɛ, sɛ e sa e sin e ba blɛ uflɛ nun’n, aklunjuɛ su ɔ kwla kplin su kɛ ɔ nin e kókó yalɛ. Wie’m be kusu’n, sa mɔ w’a tɔ be su annzɛ sa uflɛ wie’m be ti’n, be kwla fa be ɲin be sie i Biblu’n nun ndɛ’n su. I ti yɛ e sa e sin e ko nian sran’m be osu kpɛ sunman’n niɔn.