Zoova i Lalofuɛ’m be klo Ɲanmiɛn nin be wiengu mun. I sɔ’n ti’n be kan Biblu’n nun ndɛ’n be kle sran kwlaa. Be nga be se be kɛ be ndɛ’n timan be cinnjin bɔbɔ’n be kan Biblu’n nun ndɛ’n be kle be wie. (Matie 22:37-39) Ɲanmiɛn mɔ be klo i’n ti’n be yo like nga i Wa’n seli be kɛ be yo’n. I waan ‘be bo jasin be kle sran mun.’ (Sa Nga Be Yoli’n 10:42; 1 Zan 5:3) Kɛ ɔ ko naan y’a kwla yo sɔ’n e kan Ɲanmiɛn ndɛ be kle sran mun kpɛ sunman kɛ nga Ɲanmiɛn nuan ijɔfuɛ’m be fa yoli i laa’n sa. (Zeremin 25:4) Kɛ mɔ e klo e wiengu mun’n ti’n, e bo ‘Ɲanmiɛn Sielɛ’n i jasin fɛ’n’ m’ɔ man nguan’n e kle sran kwlaa. Be nga be seli e laa kɛ ndɛ’n loman be bɔbɔ’n, e bo jasin fɛ’n e kle be wie.—Matie 24:14.

 Ɔ ju wie’n, kɛ e sa e sin e ko nian be nga i bo bolɛ nun’n e ndɛ’n w’a yoman be cinnjin be osu’n, e nin be e koko yalɛ klanman. Sa nsan ti yɛ e yo sɔ-ɔ:

•   Sran’m be tu ko tran lika uflɛ.

•   E ndɛ’n kwla lo sran uflɛ awlo kunngba’n nun.

•   Sran’m be kaci. Mɛn nun sa mun nin sran’m be su sa’m be ti’n, be kwla “wun i wlɛ kɛ be mian Ɲanmiɛn wun,” kpɛkun be sɔ Ɲanmiɛn ndɛ’n nun. (Matie 5:3) Be nga be tanndannin e ɲrun bɔbɔ’n be akunndan’n kwla kaci kɛ akoto Pɔlu liɛ’n sa.—1 Timote 1:13

 Sanngɛ e mianman sran fi kɛ ɔ tie e ndɛ’n. (1 Piɛli 3:15) E bu i kɛ Ɲanmiɛn sulɛ nun’n, sran kun bɔbɔ yɛ ɔ fata kɛ ɔ fɛ i tiaun ajalɛ-ɔ.—Mmla’n 30:19, 20.