Mɛksiki i klɔ nga be flɛ i kɛ Tabasiko’n su’n, be nga be kun be wun’n, be sɔnnin kpa. I sɔ’n ti’n afuɛ 2017 nun’n, Zoova i Lalofuɛ’m be fali ajalɛ kɛ bé fá fluwa An Tinnge! ng’ɔ fiteli afuɛ 2014 Avrili anglo’n nun mɔ be flɛi blɔfuɛ nun kɛ “Trois bonnes raisons de s’accrocher à la vie” bé bó jasin fɛ ngunmin kun lele anglo nɲɔn. Jasin fɛ sɔ mɔ be boli’n bali nvlɛ kpa.

Zoova i Lalofuɛ kun m’ɔ suan Fɔstino’n boli jasin fɛ’n kleli bla kun. Blɛ sɔ nun’n, nn bla’n i wa m’ɔ le afuɛ 22 i ti nun w’a sanngan ɔ maan ɔ kunndɛli kɛ ɔ́ kún i wun. I sɔ’n ti’n, bla’n i wla’n w’a bo i wun. Ɔ siman wafa nga ɔ kwla ukɛ i wa’n. Sanngɛ kɛ Fɔstino fali periodiki mɛnnin i’n, ɔ seli kɛ: “Like nga min wa’n miɛn i wun’n yɛ.” Kɛ i aliɛ cɛnnin’n, Fɔstino ɔli bla’n i wa’n i osu nianlɛ yɛ be kokoli Biblu’n nun afɔtuɛ nga be o periodiki nun’n, be su yalɛ. Kɛ Fɔstino ko niannin ba’n i osu kpɛ sunman’n, be sieli i nzɔliɛ kɛ ɔ timan kɛ laa’n sa kun. Fɔstino seli kɛ: “Siɛn’n, i wun w’a fɛ feke kan yɛ ɔ di aklunjuɛ.” I kpa’n, ɔ kan like ng’ɔ nin Fɔstino be suan’n i ndɛ kle i niaan kan mɔ i ti nun w’a sanngan wie’n.

Kaala m’ɔ tran Wimangilo’n, fali periodiki sɔ’n ukali i janvuɛ suklu ba kun. Ɔ seli kɛ: “N sieli i nzɔliɛ kɛ sa kun kle min janvuɛ suklu ba bla kun m’ɔ le afuɛ 14 i yalɛ. Ɔ maan e nin i e kokoli yalɛ. I lɛ nun’n, ɔ yiyili sa ng’ɔ o i awlobo’n su kleli min. E yalɛ kokolɛ nun’n, n sieli i nzɔliɛ kɛ kannin kannvuɛn’m be o i sa bɛ’n su.” Afin ɔ fa like kpɛkpɛ i sa nin i ja’m be wun. Sa nga ti yɛ ɔ yoli sɔ’n yɛle kɛ ɔ se wun kɛ ɔ timan klanman naan ɔ o i liɛ mɛn nun sa ngbɛn. Kɛ Kaala fali fluwa An Tinnge! sɔ’n mɛnnin i janvuɛ’n m’ɔ kanngannin nun’n, ɔ seli Kaala kɛ i liɛ ti yɛ be klɛli ndɛ ng’ɔ o fluwa’n nun’n niɔn. Ɔ srili puɛɛ yɛ ɔ seli Kaala kɛ ɔ wun i wlɛ kɛ ɔ ti cinnjin kɛ ɔ tran nguan nun.

Bian kun tran klɔ nga be flɛ i kɛ Vilaɛmoza’n su. I wla w’a bo i wun dan. Afin i junman’n fili i sa, kpɛkun i yi yacili ba mun i sa nun ɔli. Ɔ srɛli Ɲanmiɛn titi kɛ ɔ ukɛ i, sanngɛ kɛ lika’n cɛ́n m’ɔ́ sán’n nn i awlabɔɛ’n yó dan. Cɛn kun m’ɔ kunndɛli kɛ ɔ́ kún i wun’n, yɛ Maatin nin Miguɛli mɔ be ti Zoova i Lalofuɛ’n, be boboli i anuan-ɔn. Kɛ bian’n tikeli anuan’n, aniaan’m be fali fluwa An Tinnge! be mɛnnin i. Kɛ bian’n wunnin ndɛ ng’ɔ klɛ An Tinnge! su’n, ɔ seli kɛ Ɲanmiɛn tɛli i srɛlɛ’n su. Maatin nin Miguɛli be fali Biblu’n nun ndɛ’n be fɔnvɔli i yɛ kɛ be sali be sin i wun lɔ’n, be sieli i nzɔliɛ kɛ bian i wla w’a gua ase. Andɛ’n, be nin bian sɔ’n be suan Biblu’n nun like kpɛ nɲɔn lemɔcuɛ kun nun.

Blɛ sɔ nun kusu’n, Zoova i Lalofuɛ’m be ɔli Tabasiko bisua sunman nun. Be ɔli kɛ bé kó fá Biblu’n nun afɔtuɛ wie’m bé úka bisuafuɛ mun naan be wun like trele nga bé fá be nguan’n bé yó’n. Zoova i Lalofuɛ’m be siesieli be wun naan sɛ be ju lɔ’n, bé fá video’m bé klé bisuafuɛ mun kpɛkun bé yíyí Biblu’n nun ndɛ kun nun nzra nun. Asa ekun’n, be waan be nin bé kókó ndɛ nga be yiyili be nun periodiki sɔ’n nun’n be su yalɛ. Ajalɛ sɔ’n jɔli bisuafuɛ mun nin be nga be nian be su’n, be klun kpa. Bisuafuɛ’m be nun kun seli kɛ: “N sunnzunnin kɛ ń kún min wun kpɛ nsan. Sran wie’m be seli min kɛ min ndɛ lo Ɲanmiɛn, sanngɛ b’a kleman min lika nga be klɛli i sɔ’n Biblu’n nun le. Ndɛ nga amun kan kleli min’n wlali min fanngan dan.”

Nanwlɛ, sran’m be sieli jasin fɛ bolɛ ngunmin kun sɔ’n i nzɔliɛ kpa. Afin, awa’n i janunfuɛ ng’ɔ nian sran’m be ayre yolɛ’n su’n, yoli Zoova i Lalofuɛ’m be mo ukalɛ mɔ be mian be ɲin be uka sran mun’n ti. I kpa’n, lɔ zronali kun kannin jasin fɛ ngunmin kun sɔ’n i ndɛ. Be klɛli i zronali sɔ’n su kɛ: “Be uka sran mun naan b’a buman be wun kunlɛ akunndan kun.”