Salamat sa interes mo na maggibo nin mga report manungod sa mga aktibidad kan mga Saksi ni Jehova. Ginibo an giyang ini para tabangan ka sa ispeling asin kahulugan kan mga terminong ginagamit kan samong relihiyon. Kun may hapot ka na dai nasimbag digdi, tabi na kontakon an sangang opisina kan Mga Saksi ni Jehova.

An Torrengbantayan Nagpapahayag kan Kahadian ni Jehova. An bilog na titulo kan panginot na magasin na ipinupublikar asin idinidistribwir kan Mga Saksi ni Jehova. Inaapod man na An Torrengbantayan. An pangaran na iyan hali sa ideya na padagos na magbantay sa kautuban kan mga katuyuhan nin Diyos. (Mateo 24:42) An pampublikong edisyon kan An Torrengbantayan libreng inaalok sa mga tawong interesado. An pag-aadalan na edisyon kan An Torrengbantayan ginagamit sa mga hapot-simbagan na pagtukar kada semana sa mga kongregasyon sa bilog na kinaban. An Torrengbantayan dagos-dagos na ipinupublikar puon pa kan 1879. Saro ini sa mga magasin na may pinakamahiwas na sirkulasyon sa kinaban.

asembleya. Hilingon:  pansirkitong asembleya.

Assembly Hall kan Mga Saksi ni Jehova. Sarong dakulang lugar para sa pagsamba na pagsadiri kan Mga Saksi ni Jehova. Ginagamit ini para sa mga darakulang pagtiripon kan mga kongregasyon sa sarong espesipikong lugar. Inaapod man ini na “Assembly Hall.”

Awake! Magasin na ipinupublikar asin idinidistribwir kan Mga Saksi ni Jehova. Inot ining ipinublikar na The Golden Age kan 1919, tapos rinibayan an pangaran kaini na Consolation kan 1937. Puon sa isyu nin Agosto 22, 1946, inapod na ining Awake! Pinili an titulong ini para iduon sa mga parabasa na dapat nindang maaraman an kahulugan kan mga nangyayari sa kinaban. Saro ini sa mga magasin na may pinakamahiwas na sirkulasyon sa kinaban.

Bagong Kinaban na Traduksiyon kan Banal na Kasuratan. An bilog na titulo kan Hebreong Kasuratan (“Lumang Tipan”) asin kan Griegong Kasuratan (“Bagong Tipan”) na trinadusir asin ipinublikar kan Mga Saksi ni Jehova. Inaapod man iyan na Bagong Kinaban na Traduksiyon.

Bethel, Bethelite, pamilyang Bethel. Hebreong tataramon an “Bethel” na nangangahulugan na “Harong nin Diyos.” Ini an apod sa mga pasilidad na ginagamit kan Mga Saksi ni Jehova para asikasuhon saka suportaran an saindang basado sa Bibliyang espirituwal mga aktibidad sa kada nasyon o rehiyon. An mga Saksi na naglilingkod sa mga pasilidad na ini kabilang sa sarong relihiyosong orden asin inaapod na mga “Bethelite.” Dai sindang suweldo. Bilang sarong grupo, inaapod sindang “pamilyang Bethel” huling, arog nin sarong pamilya, magkairibanan sindang nag-iistar, nagsasamba, asin nagtatrabaho sa mga pasilidad na iyan. An terminong “Bethelite” dai ginagamit bilang sarong titulo na nagtatao nin onra.

brother. Sarong lalaki na bawtisadong Saksi ni Jehova. Kun gagamiton sa pangkagabsan, iyan naka-lowercase. Kun gagamiton kaiba an pangaran kan sarong lalaking Saksi, iyan naka-cap (hal., Brother Smith). Dai ini ginagamit bilang sarong titulo na nagtatao nin onra. Kapareho iyan sa paggamit sa pag-apod kan sarong babaying Saksi (hal., Sister Smith).

elder. Sarong maygurang sa espirituwal na lalaking Saksi na ninombrahan na magtukdo asin atamanon an espirituwal na kapakanan kan mga miyembro kan kongregasyon. An sarong elder dapat na padagos na nakakaabot sa mga kuwalipikasyon na sinambit sa Kasuratan sa 1 Timoteo 3:1-7; Tito 1:5-9; Santiago 3:17, 18; asin 1 Pedro 5:2. An mga elder bakong sinusuwelduhan na mga ministro asin bako sindang mga empleyado kan saindang kongregasyon o kan ano man na korporasyon na konektado sa Mga Saksi ni Jehova. An kadaklan na elder nagtatrabaho tanganing masuportaran an saindang sadiri asin pamilya. An mga elder bakong lider nin relihiyon, asin dai sinda nakakalangkaw sa mga miyembro. Dai ginagamit an terminong ini bilang sarong titulo na nagtatao nin onra.

Gilead, Paadalan nin Gilead. Pinahalipot na pangaran kan Watchtower Bible School of Gilead. Naestablisar iyan kan 1943 na kan inot an katuyuhan iyo na magsanay nin mga misyonero. Sa ngunyan, iyan limang-bulan na kurso nin pag-adal sa Bibliya para sa mga Saksi ni Jehova na naimbitaran na mag-adal diyan. I-lowercase an “paadalan” kun gagamiton na iyan sana.

 internasyonal na kumbensiyon. Tulong aldaw na pagtiripon para sa pagsamba asin pagtutukdo sa Bibliya na inoorganisar kan Mga Saksi ni Jehova asin ginigibo sarong beses kada pirang taon sa manlain-lain na mga lokasyon sa bilog na kinaban. Iniimbitaran an mga Saksi hali sa iba-ibang nasyon na mag-atender bilang mga delegado. Bukas sa publiko an mga kumbensiyon na ini asin katuyuhan kaini na tabangan an mga nag-aatender na magin harani sa Diyos asin pakusugon an pambilog na kinaban pagkasararo kan mga Saksi ni Jehova. Sa parati, an mga internasyonal na kumbensiyon isinasagibo sa arkiladong mga pasilidad puon Biyernes sagkod Domingo. Libre an mga ini asin mayong ginigibong pangongolekta diyan.

Jehova. An personal na pangaran kan Diyos na makakamhan sa gabos asin Kaglalang sigun sa Kasuratan. (Salmo 83:18) An “Jehova” dai dapat gamiton bilang pag-apod (hal., “Jehova siya”) sa sarong Saksi ni Jehova.

Jesu-Cristo. An bugtong na Aki nin Diyos. (Juan 3:16) Minimidbid kan mga Saksi ni Jehova si Jesu-Cristo bilang an saindang Lider asin pinagmamaigutan nindang arugon an saiyang halimbawa asin gibuhon an saiyang itinutukdo. Ibinibilang siya kan mga Saksi na pinakanangungurog na tawo na nabuhay kasuarin man, an panginot na Saksi ni Jehova, asin an gagamiton kan Diyos na Jehova sa pagliligtas sa katawuhan.—Isaias 9:6, 7; Kapahayagan 1:5.

kasararuan nin magturugang. An pambilog na kinaban na asosasyon kan mga Saksi ni Jehova (mga lalaki asin babayi).—1 Pedro 5:9.

Kingdom Hall kan Mga Saksi ni Jehova. Lokal na lugar nin pagsamba na ginagamit kan saro o labi pang mga kongregasyon. Inaapod sa parati na “Kingdom Hall.” Likayan tabi an paggamit kan terminong “simbahan.”

Komite kan Sangay. Pag may naestablisar na sangang opisina, sarong Komite kan Sangay, na kompuwesto nin tulong elder o labi pa, an ninonombrahan para asikasuhon an mga aktibidad sa nasyon o mga nasyon na sakop kan sangang opisinang iyan.

kongregasyon. Organisadong grupo nin mga Saksi na regular na nagtitiripon para sa pagsamba. Sarong grupo nin mga elder an pinili na magkaigwa nin paninimbagan sa pagkondukta kan manlain-lain na programa nin pagtutukdo sa Bibliya asin sa pagtao nin espirituwal na paggiya sa kongregasyon bilang sarong grupo o sa kada indibidwal. Bukas sa publiko an mga pagtiripon kan kongregasyon. Libre iyan asin mayong ginigibong pangongolekta diyan.

kumbensiyon. Hilingon:  internasyonal na kumbensiyon asin  pangrehiyon na kumbensiyon.

Memoryal kan kagadanan ni Cristo. An taunan na paggirumdom sa kagadanan ni Jesu-Cristo. Inaapod man na Pamanggihan kan Kagurangnan, Huring Pamanggihan, Memoryal, o Memoryal kan kagadanan ni Jesus. Para sa mga Saksi ni Jehova, iyan an pinakaimportanteng okasyon kan taon asin an solamenteng relihiyosong seremonya na espesipikong ipinagbuot ni Cristo na gibuhon kan saiyang mga parasunod.—Lucas 22:19, 20.

 Mga Saksi ni Jehova. Sarong Kristiyanong relihiyon na an mga miyembro sinasamba an Diyos na Jehova asin aktibong ipinapalakop an pagtutukdo sa Bibliya paagi sa manlain-lain na pamamaagi nin pag-ebanghelyo. An pokus kan saindang gibuhon na pagtutukdo sa Bibliya iyo an paghulit kan maugmang bareta manungod sa Kahadian, o gobyerno, nin Diyos. (Mateo 24:14) Lain sa ibang relihiyon an pangaran ninda, ta iyan nanunungod bako lang sa kun siisay an irinerepresentar ninda kundi pati man sa saindang boluntad na gibuhon na paglilingkod sa ngaran nin Diyos. Maibibilang na Saksi ni Jehova an saro pag igwa na siya nin tamang pakasabot sa panginot na mga katukduan sa Bibliya, kuwalipikado na siyang magpartisipar sa ministeryo sa publiko saka nakaasosyar sa sarong kongregasyon kan mga Saksi ni Jehova, asin nabawtismuhan na siya bilang simbolo kan saiyang personal na pagdusay sa Diyos na Jehova. Pag sasambiton sa sarong artikulo, dapat na gamiton sa inot na pagsambit an bilog na opisyal na pangaran na “Mga Saksi ni Jehova.” Naka-cap an “Mga” kun iyan nanunungod sa pangaran kan organisasyon o relihiyon (hal., “an relihiyon na Mga Saksi ni Jehova”). Puwedeng gamiton an naka-lowercase na “mga” sa iba pang mga pagsambit. Puwede man gamiton an “mga Saksi.” Sala na apudon na “Jehova” an sarong Saksi.—Isaias 43:10.

ministeryal na lingkod. Sarong maygurang sa espirituwal na lalaking Saksi na ninombrahan tanganing magtabang sa mga elder sa pag-asikaso kan kongregasyon. Para makapaglingkod bilang ministeryal na lingkod, kaipuhan na padagos niyang naaabot an basado sa Kasuratan na mga kuwalipikasyon na yaon sa 1 Timoteo 3:8-10, 12, 13 asin Tito 2:6-8. Inaasikaso kan mga ministeryal na lingkod an importanteng mga gibuhon sa pag-organisar asin pagsuportar sa kongregasyon. Dai sindang suweldo asin bako sindang mga empleyado sa saindang kongregasyon o sa ano man na mga korporasyon na konektado sa Mga Saksi ni Jehova. Kadaklan sa mga ministeryal na lingkod igwang sekular na trabaho tanganing masuportaran an saindang sadiri asin pamilya. An ibang mga ministeryal na lingkod, pag-abot nin panahon, puwedeng makuwalipikar na maglingkod bilang elder. Dai ginagamit an terminong ini bilang sarong titulona nagtatao nin onra.

misyonero. Sarong bawtisadong Saksi na inasignar kan Namamahalang Grupo kan Mga Saksi ni Jehova sa manlain-lain na lugar sa bilog na kinaban. Andam an mga misyonero na bayaan an saindang harong asin tibaad maglipat sa ibang nasyon tanganing tumabang sa pagpalakop kan maugmang bareta kan Kahadian.—Mateo 24:14.

Namamahalang Grupo kan Mga Saksi ni Jehova. Sarong sadit na grupo nin mga elder na ninombrahan tanganing asikasuhon an espirituwal na mga pangangaipo kan mga Saksi ni Jehova sa bilog na kinaban. Ginagamit sa parati an pinahalipot na pangaran na “Namamahalang Grupo.” Direkta sindang nakikikabtang sa pagpreparar nin basado sa Bibliyang mga publikasyon. Bagaman an Namamahalang Grupo an nanginginot sa pagkoordinar kan pambilog na kinaban na mga aktibidad kan mga Saksi, si Jesu-Cristo sana an minimidbid ninda bilang an Lider kan mga Saksi ni Jehova. An mga opisina kan Namamahalang Grupo nasa World Headquarters kan Mga Saksi ni Jehova sa Warwick, New York, U.S.A.

paghuhulit. Hilingon:  paglilingkod sa langtad.

 paglilingkod sa langtad. An ministeryo sa publiko kan mga Saksi, na sinusunod an pagbuot ni Jesus na ihulit an ‘maugmang bareta kan Kahadian’ sa mga tawo “sa bilog na kinaban bilang patotoo sa gabos na nasyon.”—Mateo 24:14; 28:19.

pagtiripon sa tahaw kan semana. Semanal na pagtiripon kan kongregasyon na sa parati ginigibo sa banggi nin sarong ordinaryong aldaw kan semana. An programa igwa nin tulong kabtang asin inaapod iyan na An Satong Kristiyanong Pamumuhay Asin Ministeryo. Dinisenyo an pagtiripon para tabangan an mga Saksi na magin mas epektibong mga ministro nin Diyos. Arog kan gabos na pagtiripon kan Mga Saksi ni Jehova, libre an pag-atender nin in-person o sa virtual asin mayong ginigibong pangongolekta diyan.

Pampublikong Pagtiripon. Semanal na pagtiripon kan kongregasyon, na sa parati ginigibo sa puro kan semana, kun sain may 30 minutong diskurso na basado sa Bibliya na ipinepresentar para sa publiko. Sinusundan ini sa parati kan Pag-adal sa Torrengbantayan, na sarong oras na pagtukar sa sarong tema na basado sa Bibliya gamit an sarong artikulo sa pag-aadalan na edisyon kan An Torrengbantayan. Arog kan gabos na pagtiripon kan Mga Saksi ni Jehova, libre an pag-atender nin in-person o sa virtual asin mayong ginigibong pangongolekta diyan.

 pangrehiyon na kumbensiyon. Taunan na tulong aldaw na pagtiripon kan dakul na kongregasyon sa sarong rehiyon, na dinisenyo tanganing tabangan an mga tawo na rumani sa Diyos. Bukas iyan sa publiko. Kabali sa programa kaiyan an mga suhestiyon na makakatabang sa gabos na nag-atender, ano man an edad ninda, na makinabang sa sadol kan Bibliya. May ipinepresentar diyan na mga pag-akto manungod sa pang-aroaldaw na buhay asin mga salaysay sa Bibliya, na nagpapahiling kun paano iaaplikar an mga prinsipyo sa Bibliya. Ginigibo an mga kumbensiyon sa dakulang mga arkiladong pasilidad, arog nin mga arena, istadyum, asin convention center. An mas sadit na mga pangrehiyon na kumbensiyon puwedeng gibuhon sa haraning mga Assembly Hall kan Mga Saksi ni Jehova. Sa parati, an in-person na mga sesyon iniiskedyul sa mga aldaw nin Biyernes sagkod Domingo. Sa nakaagi pa sanang mga taon, may mga rekording kaiyan na madadalan online. Arog kan gabos na pagtiripon kan Mga Saksi ni Jehova, libre an pag-atender asin mayong ginigibong pangongolekta diyan.

 pansirkitong asembleya. Sarong aldaw na pagtiripon nin dakul na kongregasyon kan mga Saksi ni Jehova na isinasagibo duwang beses kada taon. Bukas sa publiko an mga pansirkitong asembleya asin dinisenyo iyan para tabangan an mga tawo na rumani sa Diyos. Kabali sa programa an mga suhestiyon para tabangan an mga nag-aatender na makinabang sa sinasabi kan Bibliya ano man an saindang edad. May halipot na mga pag-akto tanganing ipahiling kun paano magagamit an mga leksiyon sa Bibliya sa pang-aroaldaw na buhay. Isinasagibo sa parati sa mga Assembly Hall kan Mga Saksi ni Jehova. Ginigibo man sa mga arkiladong pasilidad o nadadalan online. Sa parati, iniiskedyul an mga asembleya sa puro kan semana. Libre an gabos na sesyon asin mayong ginigibong pangongolekta diyan.

paraataman nin sirkito. Sarong eksperyensiyadong elder na naglilingkod sigun sa pagdirehir kan sangang opisina asin (kaiba kan saiyang agom, kun siya may agom) regular na nagdadalaw sa kada kongregasyon na nasa sarong sirkito, sa parati duwang beses kada taon. Apuwera sa pagtao nin personal na pampakusog sa mga nakaasosyar sa kada kongregasyon, nagtatao siya nin pampakusog asin instruksiyon sa mga elder asin ministeryal na lingkod. An mga paraataman nin sirkito nag-aandam nin sarong espesyal na programa nin pagtutukdo para sa kada kongregasyon. Dai ginagamit an terminong ini bilang sarong titulo na nagtatao nin onra.

parahayag. Saro na nagpapartisipar sa ministeryo sa publiko asin nakaasosyar sa sarong kongregasyon kan Mga Saksi ni Jehova. Kabali sa mga kuwalipikasyon kaiyan an pakasabot asin pagtubod sa panginot na mga katukduan kan Bibliya asin pamumuhay na kauyon kan mga prinsipyo nin Diyos. Daing suweldo an mga parahayag sa saindang pagpartisipar sa ministeryo asin bako sindang mga empleyado sa saindang kongregasyon o sa ano man na korporasyon na konektado sa Mga Saksi ni Jehova. Dai ginagamit an terminong ini bilang sarong titulo na nagtatao nin onra.

payunir. An apod sa sarong bawtisadong Saksi na naghihinguwang gumamit nin espesipikong bilang nin mga oras para sa pagmiministeryo sa publiko. Sa parati nanunungod ini sa “regular payunir,” sarong Saksi na naggagamit nin 600 na oras kada taon (50 oras kada bulan). Kun minsan, nanunugod man ini sa “auxiliary payunir,” saro na naggagamit nin 15 o 30 oras sa sarong bulan o sa pirang sunod-sunod na mga bulan. Daing suweldo an mga payunir sa saindang ministeryo sa publiko asin bako sindang mga empleyado sa saindang kongregasyon o sa ano man na korporasyon na konektado sa Mga Saksi ni Jehova. Kadaklan sa mga payunir igwang sekular na trabaho tanganing masuportaran an saindang sadiri. Dai ginagamit an terminong ini bilang sarong titulo na nagtatao nin onra.

sangang opisina. Lokal na pasilidad na ginagamit kan Komite kan Sangay para sa pag-administrar. Ginagamit man ini tanganing suportaran asin panginutan an espirituwal na mga aktibidad kan mga Saksi ni Jehova sa nasyon o mga nasyon na sakop kaiyan. Ginagamit kun minsan an pinahalipot na apod na “sangay.”

sirkito. Grupo nin mga kongregasyon kan mga Saksi ni Jehova sa sarong espesipikong lugar.

sister. Sarong babayi na bawtisadong Saksi ni Jehova. Kun gagamiton sa pangkagabsan, iyan naka-lowercase. Kun gagamiton kaiba an pangaran kan sarong babaying Saksi, iyan naka-cap (hal., Sister Smith). Dai ini ginagamit bilang sarong titulo na nagtatao nin onra. Kapareho iyan sa paggamit kan pag-apod sa sarong lalaking Saksi (hal., Brother Smith).

MANGNUHON: Kun magibo nin report manungod sa Mga Saksi ni Jehova, tabi na gamiton an kumpletong pangaran sa inot na pagsambit kaiyan. Para sa dagdag pang impormasyon, hilingon an:  Mga Saksi ni Jehova.