Inot na Cronica 10:1-14
-
Nagadan si Saul asin an saiyang mga aking lalaki (1-14)
10 Nakipaglaban sa Israel an mga Filisteo. Nagdurulag sa mga Filisteo an mga suldados kan Israel, asin dakul sa mga ini an nagkagaradan sa Bukid nin Gilboa.+
2 Linapag kan mga Filisteo si Saul asin an saiyang mga aking lalaki, asin nagadan kan mga Filisteo an mga aki ni Saul na si Jonathan, Abinadab, asin Malki-sua.+
3 Nagin matindi an pakikipaglaban ninda ki Saul, tapos nahiling siya kan mga parapana. Pinana ninda siya asin tinamaan.+
4 Dangan sinabi ni Saul sa paradara kan saiyang pangalasag: “Hugkuta an espada mo tapos saksakon mo ako tanganing dai ako abutan kan mga bakong turing lalaking iyan asin pasakitan+ ako.”* Pero habo ining gibuhon kan paradara kan saiyang pangalasag ta natakot siyang marhay. Kaya kinua ni Saul an saiyang espada asin dinaplaan an panas kaiyan.+
5 Kan mahiling kan paradara kan pangalasag na gadan na si Saul, dinaplaan man kaini an panas kan sadiri kaining espada asin nagadan.
6 Kaya nagadan si Saul saka an saiyang tulong aki, asin an gabos sa saiyang harong magkairibanan na nagadan.+
7 Kan mahiling kan gabos na Israelitang nasa kababan* na nagdurulag na an gabos asin nagadan na si Saul saka an saiyang mga aki, binarayaan ninda an saindang mga siyudad asin nagdurulag; dangan nag-arabot an mga Filisteo asin sinda an nag-iristar diyan.
8 Kan suminunod na aldaw, kan dinumanan kan mga Filisteo an mga nagadan ninda tanganing samsaman, nahiling ninda sa Bukid nin Gilboa si Saul asin an saiyang mga aki na gadan na.+
9 Kaya kinurua ninda an sulot niyang mga pangalasag asin pinugutan ninda siya asin nagpadara sinda nin mensahe sa bilog na daga kan mga Filisteo tanganing ibareta ini sa saindang mga idolo+ asin sa mga tawo.
10 Dangan ilinaog ninda sa harong* kan saindang diyos an saiyang mga pangalasag, asin ipinako ninda an saiyang bungo sa harong ni Dagon.+
11 Kan mabaretaan kan gabos na taga Jabes+ sa Gilead an gabos na ginibo kan mga Filisteo ki Saul,+
12 nagharali an gabos nindang parapakilaban asin kinua ninda an bangkay ni Saul asin an bangkay kan saiyang mga aki. Dinara ninda an mga iyan sa Jabes asin ilinubong sa mismong tungod kan dakulang puon nin kahoy sa Jabes+ an saindang mga tulang, tapos nag-ayuno sinda sa laog nin pitong aldaw.
13 Kaya nagadan si Saul huling dai siya nagin maimbod ki Jehova. Dai niya kaya sinunod an sinabi ni Jehova,+ asin sa sarong espiritista siya nagkonsulta+
14 imbes na ki Jehova maghapot. Kaya ginadan Niya siya asin ilinipat ki David na aki ni Jesse an pagkahadi.+
