Inot na Cronica 11:1-47
11 Pag-abot nin panahon, nagduruman ki David sa Hebron+ an gabos na Israelita asin nagsarabi: “Mga kadugo mo kami.*+
2 Kaidto, kan si Saul pa an hadi, ika an nanginot sa Israel sa mga pakikipaglaban.*+ Asin sinabi saimo ni Jehova na saimong Diyos: ‘Ika an magpapastor sa banwaan kong Israel, asin ika an magigin lider kan banwaan kong Israel.’”+
3 Kaya nagpasiring sa Hebron an gabos na kamagurangan kan Israel asin dinumanan an hadi. Asin nakipagtipan sa sainda si David sa Hebron sa atubangan ni Jehova. Dangan linahidan* ninda si David na magin hadi kan Israel,+ arog kan sinabi ni Jehova paagi ki Samuel.+
4 Kan huri, si David saka an bilog na Israel nagpasiring sa Jerusalem, na iyo an Jebus,+ kun sain nakaistar an mga Jebusita.+
5 Tinuya-tuya si David kan mga nakaistar sa Jebus: “Dai ka makakalaog digdi!”+ Pero, nasakop ni David an may matibay na depensang siyudad* nin Sion,+ na iyo ngunyan an Siyudad ni David.+
6 Kaya sinabi ni David: “An siisay man na inot na makakasalakay sa mga Jebusita magigin pamayo* asin halangkaw na opisyal.”* Asin si Joab+ na aki ni Zeruia an inot na nagsalakay, kaya siya an nagin pamayo.
7 Dangan nag-istar si David sa may matibay na depensang siyudad na iyan. Iyan an dahilan kaya inapod ninda iyan na Siyudad ni David.
8 Pinunan niyang magtugdok sa enterong siyudad, puon sa Bulod-bulod* sagkod sa mga nakapalibot na lugar digdi, asin si Joab an naghirahay kan iba pang parte kan siyudad.
9 Kaya lalo pang nagin makapangyarihan si David,+ asin nasa kaibanan niya si Jehova na pamayo nin mga hukbo.
10 Ini an mga namamayo sa mga matitibay na parapakilaban ni David, na lubos na nagsuportar sa saiyang pagkahadi kaiba kan bilog na Israel, tanganing gibuhon siyang hadi arog kan sinabi ni Jehova may koneksiyon sa Israel.+
11 Ini an lista kan mga matitibay na parapakilaban ni David: si Jasobeam+ na aki nin Hakmonita, an namamayo sa tulong matitibay na parapakilaban.+ Sa sarong pagkakataon, 300 katawo an nagadan niya gamit an saiyang garod.*+
12 An sunod saiya iyo si Eleazar+ na aki ni Dodo na Ahohita.+ Saro siya sa tulong matitibay na parapakilaban.
13 Kaiba siya ni David sa Pas-damim,+ kun sain nagtiripon kaidto an mga Filisteo para makigiyera; may uma duman na pano nin tanom na sebada. Asin nagdurulag an mga suldados huli sa mga Filisteo.
14 Pero nagtindog siya sa tahaw kan uma asin dinepensahan niya ini asin ginaradan an mga Filisteo, kaya tinawan sinda ni Jehova nin dakulang kapangganahan.*+
15 An tulo sa 30 namamayo nagpasiring ki David sa may dakulaon na gapo, sa kuweba sa Adulam,+ mantang sarong hukbo nin mga Filisteo kaidto an nagkakampo sa Kababan* nin Refaim.+
16 Yaon kaidto si David sa pinagtataguan niya, asin may garison nin mga Filisteo sa Betlehem.
17 Dangan nagsabi si David: “Kun makakainom lamang kuta ako nin tubig hali sa kalot na istakan nin tubig na yaon sa may entrada kan Betlehem!”+
18 Kaya pinirit kan tulo na makalaog sa kampo kan mga Filisteo asin nagkua sinda nin tubig sa kalot na istakan nin tubig na yaon sa may entrada kan Betlehem asin dinara iyan ki David; pero habo ining inumon ni David kundi iinula niya ini para ki Jehova.
19 An sabi niya: “Dai ko nanggad ini magigibo huling may pagkatakot ako sa sakuyang Diyos! Iinumon ko daw an dugo kan mga lalaking ini na isinapeligro an saindang buhay?*+ Huli ta isinapeligro ninda an saindang buhay* para madara ini.” Kaya dai niya iyan ininom. Ini an mga ginibo kan saiyang tulong matitibay na parapakilaban.
20 Si Abisai+ na tugang ni Joab+ an nagin namamayo sa tulo pang matitibay na parapakilaban; 300 katawo an nagadan niya gamit an saiyang garod, asin may reputasyon siya na siring kan sa tulong nainot na matitibay na parapakilaban.+
21 Sa tulo pang matitibay na parapakilaban na ini, mas midbid siya kisa sa duwa asin siya an namamayo sa sainda; pero dai niya napantayan an tulong nainot na matitibay na parapakilaban.
22 Si Benaias+ na aki ni Jehoiada sarong lalaking daing takot.* Dakul siyang pambihirang mga ginibo sa Kabzeel.+ Ginadan niya an duwang aki ni Ariel na taga Moab. Sarong aldaw, kan nag-uuran nin niyebe, nagbaba siya sa sarong kalot na tipunan nin tubig asin ginadan an sarong leon.+
23 Ginadan man niya an sarong Ehipsiyo na sobra kadakula—limang maniko* an langkaw.+ Dawa an Ehipsiyo may kapot na garod na arog kadakula kan biga nin habulan nin tela,+ dinaguso niya siya gamit an sarong sugkod asin inagaw an garod sa kamot kan Ehipsiyo asin ini an ipinanggadan niya sa saiya.+
24 Iyan an mga ginibo ni Benaias na aki ni Jehoiada, asin may reputasyon siya na siring kan sa tulong nainot na matitibay na parapakilaban.
25 Dawa mas midbid siya kisa sa treynta, dai niya napantayan an tulong nainot na matitibay na parapakilaban.+ Pero, ginibo siya ni David na magin namamayo sa saiyang mga guwardiya.
26 An mga matitibay na parapakilaban kan hukbong militar iyo si Asahel+ na tugang ni Joab, Elhanan na aki ni Dodo na taga Betlehem,+
27 Samot na Harorita, Helez na Pelonita,
28 Ira+ na aki ni Ikes na Tekoita, Abi-ezer+ na Anatotita,
29 Sibecai+ na Husatita, Ilai na Ahohita,
30 Maharai+ na Netofatita, Heled+ na aki ni Baanah na Netofatita,
31 Itai na aki ni Ribai na Benjaminita na taga Gibeah,+ Benaias na Piratonita,
32 Hurai na hali sa mga sulugan na kababan* nin Gaas,+ Abiel na Arbatita,
33 Azmavet na Baharumita, Eliaba na Saalbonita,
34 an mga aki ni Hasem na Gizonita, Jonathan na aki ni Sage na Hararita,
35 Ahiam na aki ni Sacar na Hararita, Elifal na aki ni Ur,
36 Hefer na Mekeratita, Ahias na Pelonita,
37 Hezro na taga Carmel, Naarai na aki ni Ezbai,
38 Joel na tugang ni Natan, Mibar na aki ni Hagri,
39 Zelek na Ammonita, Naharai na Berotita na paradara kan pangalasag ni Joab na aki ni Zeruia;
40 si Ira na Itrita, Gareb na Itrita,
41 Urias+ na Hiteo, Zabad na aki ni Alai,
42 Adina na aki ni Siza na Rubenita na sarong namamayo sa mga Rubenita asin 30 an kaiba niya;
43 si Hanan na aki ni Maaca, Josafat na Mitnita,
44 Uzia na taga Astarot, si Sama asin Jeiel na mga aki ni Hotam na taga Aroer;
45 si Jediael na aki ni Simri, asin an tugang niyang si Joha na Tizita;
46 si Eliel na Mahavita, Jeribai asin Josavias na mga aki ni Elnaam, asin Itma na Moabita;
47 si Eliel, Obed, asin Jaasiel na Mezobaita.
Mga Nota
^ Sa literal, “Tulang asin laman mo kami.”
^ Sa literal, “ika an nagpapaluwas asin nagpapalaog sa Israel.”
^ O “an kuta.”
^ O “asin prinsipe.”
^ Sa literal, “payo.”
^ O “Millo.” Hebreong termino na nangangahulugan na “itinambak.”
^ O “budyak.”
^ O “kaligtasan.”
^ O “Hababang Kapatagan.”
^ O “kalag.”
^ O “kalag.”
^ Sa literal, “sarong aking lalaki nin sarong lalaking pusuan.”
^ An langkaw niya mga 2.23 metros (7.3 piye). Hilingon an Apendise B14.
