Inot na Cronica 12:1-40
-
Mga nagsuportar sa pagigin hadi ni David (1-40)
12 Ini an mga lalaking nagduruman ki David sa Ziklag+ kan panahon na limitado an saiyang hiro huli ki Saul+ na aki ni Kis. Kabilang sinda sa mga matitibay na parapakilaban na nagtabang sa saiya sa pakikipaglaban.+
2 Armado sinda nin pana, asin kaya nindang maglagpitaw+ o magpana gamit an tuo o wala nindang kamot.+ Mga tugang sinda ni Saul, hali sa tribo ni Benjamin.+
3 An namamayo sa sainda iyo si Ahiezer, kaiba si Joas, na mga aki ni Semaa na taga Gibeah;+ kaiba ninda si Jeziel asin Pelet na mga aki ni Azmavet,+ si Beraca, Jehu na Anatotita,
4 Ismaias na Gibeonita+ na matibay na parapakilaban na kabilang sa treynta+ asin iyo an namamayo kan treynta; asin si Jeremias, Jahaziel, Johanan, Jozabad na taga Gedera,
5 Eluzai, Jerimot, Bealias, Semarias, Sefatias na Harifita,
6 asin si Elkana, Issias, Azarel, Joezer, asin Jasobeam na mga Korahita;+
7 asin si Joela saka Zebadias na mga aki ni Jeroham na taga Gedor.
8 An iba sa mga Gadita kuminampi ki David asin nagduruman sa pinagtataguan niya sa kaawagan;+ mga matitibay sindang parapakilaban, mga suldados na sinanay sa pakikigiyera, eksperto sa paggamit nin dakulang kalasag saka nin garod, na may mga lalawgon* na garo lalawgon nin leon asin maririkas na garo mga gasela sa kabukidan.
9 Si Ezer an panginot, an ikaduwa si Obadias, an ikatulo si Eliab,
10 an ikaapat si Mismana, an ikalima si Jeremias,
11 an ikaanom si Atai, an ikapito si Eliel,
12 an ikawalo si Johanan, an ikasiyam si Elzabad,
13 an ikasampulo si Jeremias, asin an ikaonse si Macbanai.
14 Sinda an mga Gadita+ na mga namamayo sa hukbo. An pinakamaluya sa sainda katimbang nin 100, asin an pinakamatibay katimbang nin 1,000.+
15 Sinda an mga lalaking nagbaralyo sa Jordan kan inot na bulan kan lantop nin tubig an mga pangpang kaiyan, asin pinaralayas ninda an gabos na nakaistar sa kapatagan, sa sirangan asin sa sulnupan.
16 An iba sa mga lalaki kan Benjamin asin Juda nagduruman man ki David sa pinagtataguan niya.+
17 Dangan, nagluwas si David asin nagsabi sa atubangan ninda: “Kun katuninungan an tuyo kan pagdigdi nindo sa sako asin gusto nindo akong tabangan, magigin kasaro nindo an puso ko. Pero kun napadigdi kamo para trayduron ako asin itao ako sa sakong mga kalaban mantang mayo man akong ginigibong sala,* mahiling lugod iyan kan Diyos kan satong mga apuon asin siya an maghusgar.”+
18 Dangan an espiritu nin Diyos uminabot* ki Amasai+ na namamayo kan treynta, asin nagsabi siya:
“Saimo kami, O David, asin kaiba mo kami, O aki ni Jesse.+
An katuninungan, mapasaimo an katuninungan, asin mapasaiya na nagtatabang sa saimo,Huling tinatabangan ka kan saimong Diyos.”+
Kaya inako sinda ni David asin ninombrahan sinda na magin kabilang sa mga namamayo kan mga suldados.
19 Nagharali man sa hukbo ni Saul an iba sa mga lalaki kan tribo ni Manases para kumampi ki David kan mag-iba ini sa mga Filisteo tanganing makipaglaban ki Saul. Pero dai niya tinabangan an mga Filisteo huling pagkatapos na mag-urulay-ulay an mga tagapamahala kan mga Filisteo,+ pinahali ninda siya. An sabi ninda: “Babayaan kita kaiyan asin makampi sa kagurangnan niyang si Saul, tapos mamemeligro an buhay ta.”+
20 Kan magduman siya sa Ziklag,+ ini an mga hali sa tribo ni Manases na kuminampi saiya: si Adnah, Jozabad, Jediael, Miguel, Jozabad, Elihu, asin Ziletai. Mga namamayo sinda nin manangribo sa tribo ni Manases.+
21 Tinabangan ninda si David laban sa grupo nin nananakyadang tropa, huling gabos sinda matitibay, makukusog an buot na lalaki,+ asin nagin sindang mga namamayo sa hukbo.
22 Kada aldaw, may mga nag-aarabot tanganing tabangan si David+ sagkod na magdakula an saiyang hukbo, arog kadakula kan hukbo nin Diyos.+
23 Ini an bilang kan mga parapakilaban na armado para sa pakikipaglaban na nagduruman ki David sa Hebron+ tanganing ilipat sa saiya an pagkahadi ni Saul arog kan ipinagbuot ni Jehova.+
24 An mga lalaki kan Juda na nagdadara nin darakulang kalasag saka garod may bilang na 6,800; armado sinda para sa pakikipaglaban.
25 Hali sa mga gikan ni Simeon, igwa nin 7,100 na matitibay asin makukusog an buot na mga suldados kan hukbo.
26 Hali sa mga Levita, 4,600.
27 Si Jehoiada+ an lider kan mga aki ni Aaron,+ asin 3,700 an kaiba niya;
28 kabilang sa sainda si Zadok+ na sarong matibay asin makusog an buot na hoben na lalaki saka an 22 na pamayo hali sa angkan kaini.
29 Hali sa mga Benjaminita, na mga tugang ni Saul,+ igwa nin 3,000. An kadaklan sa sainda dating maimbod na naglilingkod sa pamilya* ni Saul.
30 Hali sa mga Efraimita, igwa nin 20,800 na matitibay, makukusog an buot, asin bantog na mga lalaki hali sa saindang mga angkan.
31 Hali sa kabanga kan tribo ni Manases, igwa nin 18,000 na pinili na magduman ki David para gibuhon siyang hadi.
32 Hali sa tribo ni Isacar, igwa nin 200 sa mga namamayo sa sainda na nakakasabot kan dalagan kan panahon asin nakakaaram kun ano an dapat gibuhon kan Israel, asin nasa pamamahala ninda an gabos nindang tugang.
33 Hali sa tribo ni Zebulon, igwa nin 50,000 na puwedeng umiba sa hukbo, na andam na makigiyera asin kumpleto sa armas. Gabos sinda nag-iba ki David nin may dai nababangang kaimbudan.*
34 Hali sa tribo ni Neftali, igwa nin 1,000 namamayo, asin kaiba ninda an 37,000 na may darakulang kalasag saka garod.
35 Hali sa tribo ni Dan, igwa nin 28,600 na andam na makigiyera.
36 Asin hali sa tribo ni Aser, igwa nin 40,000 na makakaiba sa hukbo asin andam na makigiyera.
37 Hali sa ibong kan Jordan,+ hali sa tribo ni Ruben, ni Gad, asin sa kabanga kan tribo ni Manases, may 120,000 na suldados na igwa kan gabos na klase nin armas na panggiyera.
38 Gabos sinda mga suldados na andam na mag-iba sa giyera; may bilog na puso sindang nagduruman sa Hebron tanganing gibuhon na hadi si David sa bilog na Israel. Nagkakasararo man sa pagmawot an* gabos na iba pa sa Israel na gibuhon na hadi si David.+
39 Asin nagdanay sinda duman nin tulong aldaw kaiba ni David, na nagkakarakan asin nag-iirinom huling naghanda an saindang mga tugang para sa sainda.
40 Siring man idtong mga harani sa sainda, asin dawa idtong hali pa sa teritoryo ni Isacar, Zebulon, asin Neftali, nagdarara nin kakanon na nakakarga sa mga asno, mga kamelyo, mga mula,* asin mga baka. Nagdara sinda nin kadakul na suplay nin harina, mga tinapay na gibo sa pinilpig na igos* asin gibo sa pasas, saka arak, lana, pati mga baka saka mga karnero, huling may kaugmahan sa Israel.
Mga Nota
^ O “pandok.”
^ O “mayo man nin ginigibong sala an sakong mga kamot.”
^ Sa literal, “guminubing.”
^ Sa literal, “harong.”
^ O “Gabos na nag-iba ki David bakong doble an puso.”
^ Sa literal, “Saro an puso kan.”
^ An Hebreong termino nanunungod sa ugbon nin lalaking asno asin babaying kabayo.
^ An bunga kan kahoy na higera.
