Inot na Cronica 13:1-14
13 Kinonsulta ni David an mga namamayo nin manangribo saka nin mananggatos asin an gabos na lider.+
2 Dangan sinabi ni David sa bilog na katiripunan* nin Israel: “Kun gusto nindo saka kun uyon si Jehova na satong Diyos, magpadara kita nin mensahe sa iba pa niyatong mga tugang sa gabos na rehiyon nin Israel asin sa mga saserdote saka sa mga Levita na nasa saindang mga siyudad na may mga pasabsaban+ na magdirigdi asin umiba sa sato.
3 Asin ibalik ta an Kaban+ kan satong Diyos.” Pinabayaan kaya ninda ini kan panahon ni Saul.+
4 Uminuyon digdi an bilog na katiripunan huling para sa bilog na banwaan, iyan an tama na gibuhon.
5 Kaya tinipon ni David an bilog na Israel, puon sa salog nin* Ehipto sagkod sa Lebo-hamat,*+ para kuanon sa Kiriat-jearim an Kaban kan tunay na Diyos.+
6 Si David asin an bilog na Israel nagpasiring sa Baala,+ sa Kiriat-jearim na sakop kan Juda, tanganing kuanon duman an Kaban kan tunay na Diyos na si Jehova, na nakatukaw sa saiyang trono na nasa ibabaw* kan mga kerubin,+ an kaban kun sain nag-aapod sa pangaran niya an banwaan.
7 Alagad, isinakay ninda an Kaban kan tunay na Diyos sa sarong bagong kareta+ asin dinara ninda iyan hali sa harong ni Abinadab, asin si Uzah saka si Ahio an nag-antabay kan kareta.+
8 Ganadong marhay na nagselebrar si David asin an bilog na Israel sa atubangan kan tunay na Diyos; nagkaranta sinda asin nagtugtog nin mga arpa, iba pang mga instrumentong de-kuwerdas, mga tamburin,+ mga simbal,+ asin mga trumpeta.+
9 Pero kan makaabot sinda sa ginikan ni Kidon,* diit-diitan pang maituwal kan mga baka an Kaban kaya iinunat ni Uzah an kamot niya asin kinaputan iyan tanganing dai mahulog.
10 Huli kaini, naanggot* na marhay si Jehova ki Uzah, asin ginadan Niya siya huling kinaputan kaini an Kaban.+ Nagadan siya duman sa atubangan kan Diyos.+
11 Alagad naanggot* si David sa nangyaring biglang pagkaanggot ni Jehova ki Uzah. Iyan an dahilan kun taano ta inapod an lugar na idto na Perez-uzah* sagkod sa aldaw na ini.
12 Kaya natakot sa tunay na Diyos si David kan aldaw na idto asin nagsabi: “Paano ko dadarahon sa sako an Kaban kan tunay na Diyos?”+
13 Kaya an Kaban dai na dinara ni David sa saiya sa Siyudad ni David. Imbes, ipinadara niya ini sa harong ni Obed-edom na Giteo.
14 Tulong bulan na nasa harong ni Obed-edom, sa kaibanan kan saiyang pamilya, an Kaban kan tunay na Diyos, asin padagos na binendisyunan ni Jehova an pamilya ni Obed-edom saka an gabos na sadiri niya.+
Mga Nota
^ O “kongregasyon.”
^ O “puon sa Sihor kan.”
^ O “sa entrada kan Hamat.”
^ O posibleng “tahaw.”
^ O posibleng “nin Kidon.”
^ O “nadagit.”
^ O “nahadit.”
^ Nangangahulugan na “Biglang Pagkaanggot ki Uzah.”
