Inot na Cronica 15:1-29
15 Asin padagos siyang nagtugdok nin mga harong para sa sadiri niya sa Siyudad ni David. Naghanda man siya nin lugar para sa Kaban kan tunay na Diyos asin nagpatindog nin tolda para digdi.+
2 Kan panahon na iyan sinabi ni David: “Mayo nin ibang magdadara kan Kaban kan tunay na Diyos kundi an mga Levita, huling sinda an pinili ni Jehova na magdara kan Kaban ni Jehova asin maglingkod pirmi sa saiya.”+
3 Dangan tinipon ni David sa Jerusalem an bilog na Israel tanganing darahon an Kaban ni Jehova patukad sa lugar na ihinanda niya para digdi.+
4 Tinipon ni David an mga gikan ni Aaron+ asin an mga Levita:+
5 hali sa mga Kohatita, si Uriel na pamayo asin 120 sa mga tugang niya;
6 hali sa mga Merarita, si Asaias+ na pamayo asin 220 sa mga tugang niya;
7 hali sa mga Gersomita, si Joel+ na pamayo asin 130 sa mga tugang niya;
8 hali sa mga gikan ni Elizafan,+ si Semaias na pamayo asin 200 sa mga tugang niya;
9 hali sa mga gikan ni Hebron, si Eliel na pamayo asin 80 sa mga tugang niya;
10 hali sa mga gikan ni Uziel,+ si Aminadab na pamayo asin 112 sa mga tugang niya.
11 Ipinaapod man ni David an mga saserdoteng si Zadok+ saka Abiatar+ asin an mga Levitang si Uriel, Asaias, Joel, Semaias, Eliel, saka Aminadab,
12 asin sinabi niya sa sainda: “Kamo an mga pamayo kan mga angkan kan mga Levita. Pabanalon nindo an saindong sadiri, kamo asin an saindong mga tugang, tapos darahon nindo an Kaban ni Jehova na Diyos kan Israel patukad sa lugar na ihinanda ko para diyan.
13 Huling kan inot na bako kamo an nagdara kaiyan,+ naanggot sa sato si Jehova na satong Diyos;+ dai ta kaya sinunod an tamang paagi.”+
14 Kaya pinabanal kan mga saserdote asin kan mga Levita an saindang sadiri tanganing madara ninda an Kaban ni Jehova na Diyos kan Israel.
15 Dangan pinasan kan mga Levita an Kaban kan tunay na Diyos gamit an mga ulayán,*+ arog kan ipinagbuot ni Moises sigun sa sinabi ni Jehova.
16 Sinabi ni David sa mga pamayo kan mga Levita na pumili hali sa mga tugang nindang parakanta, tanganing iyo an maugmang magkanta na sinasabayan nin mga instrumento sa musika: mga instrumentong de-kuwerdas, mga arpa,+ asin mga simbal.+
17 Kaya pinili kan mga Levita si Heman+ na aki ni Joel asin si Asaf+ na aki ni Berekias, na hali sa saiyang mga tugang, saka si Etan+ na aki ni Kusaias, na hali sa mga tugang nindang Merarita.
18 Kaiba ninda an mga tugang ninda na kabilang sa ikaduwang grupo,+ si Zacarias, Ben, Jaaziel, Semiramot, Jehiel, Uni, Eliab, Benaias, Maaseias, Matitias, Elifelehu, Mikneias, saka an mga bantay sa trangkahan na si Obed-edom asin Jeiel.
19 An mga parakanta na si Heman,+ Asaf,+ asin Etan an matugtog kan mga simbal na tanso;+
20 si Zacarias, Aziel, Semiramot, Jehiel, Uni, Eliab, Maaseias, asin Benaias an matugtog kan mga instrumentong de-kuwerdas na nakatono sa Alamoth;*+
21 asin si Matitias,+ Elifelehu, Mikneias, Obed-edom, Jeiel, saka Azazias an matugtog kan mga arpa na nakatono sa Sheminith;*+ sinda man an maserbing mga direktor.
22 Si Kenanias+ na pamayo kan mga Levita an namamahala sa pagdara kan Kaban, huling eksperto siya digdi,
23 asin si Berekias saka Elkana an mga bantay sa trangkahan na mabantay kan Kaban.
24 An mga saserdoteng si Sebanias, Josafat, Netanel, Amasai, Zacarias, Benaias, asin Eliezer an makusog na nagpatanog kan mga trumpeta sa atubangan kan Kaban kan tunay na Diyos,+ asin si Obed-edom saka Jehias nagserbi man na mga bantay sa trangkahan na mabantay kan Kaban.
25 Dangan si David asin an kamagurangan kan Israel saka an mga namamayo nin manangribo iribang naglakaw tanganing itukad nin may pag-ugma an kaban kan tipan ni Jehova hali sa harong ni Obed-edom.+
26 Huling tinabangan kan tunay na Diyos an mga Levita na nagdara kan kaban kan tipan ni Jehova, nag-atang sinda nin pitong torilyong baka asin pitong lalaking karnero.+
27 Nakasulot si David nin pang-ibabaw na bado na daing manggas na gibo sa de-kalidad na tela, siring man an gabos na Levita na nagdadara kan Kaban, an mga parakanta, asin si Kenanias na namamahala sa mga nagdadara kan Kaban saka sa mga parakanta; nakasulot man si David nin efod* na lino.+
28 Mantang itinutukad kan gabos na Israelita an kaban kan tipan ni Jehova, maugma sindang nagkukururahaw,+ na nagpapatanog nin hamudyong, mga trumpeta,+ mga simbal, asin makusog na nagtutugtog nin mga instrumentong de-kuwerdas saka mga arpa.+
29 Pero kan makaabot sa Siyudad ni David an kaban kan tipan ni Jehova,+ nagtanaw sa bintana si Mical+ na aki ni Saul asin nahiling niya si Hading David na naglulukso-lukso saka isineselebrar an nangyari; asin hinamak niya siya sa saiyang puso.+
