Inot na Cronica 18:1-17
18 Pakalihis nin pirang panahon, nakipaglaban si David sa mga Filisteo asin nadaog niya sinda. Naagaw niya sa kamot kan mga Filisteo+ an Gat+ saka an nakapalibot na mga banwa diyan.*
2 Dangan nadaog niya an Moab,+ asin nagin mga lingkod ni David an mga Moabita asin nagdara sinda nin tributo.*+
3 Nadaog ni David harani sa Hamat+ si Hading Hadadezer+ kan Zoba+ kan pasiring ini sa Salog nin Eufrates+ tanganing iestablisar an saiyang kontrol sa lugar na iyan.
4 Naagaw ni David sa saiya an 1,000 karwahe saka nabihag an 7,000 na parakabayo asin 20,000 na suldados kaini.+ Dangan pinirilay* ni David an gabos na kabayong pangkarwahe pero nagtada siya nin 100 sa mga kabayong ini.+
5 Kan mag-arabot an mga Siriano hali sa Damasco tanganing tabangan si Hading Hadadezer kan Zoba, ginaradan ni David an 22,000 sa mga Siriano.+
6 Dangan nagbugtak si David nin mga garison sa Damasco na siyudad kan Siria. Nagin mga lingkod ni David an mga Siriano asin nagdara sinda nin tributo. Tinawan ni Jehova si David nin kapangganahan* sain man siya magduman.+
7 Apuwera diyan, kinurua ni David an gibo sa bulawan na mga bilog na kalasag kan mga lingkod ni Hadadezer asin dinara an mga iyan sa Jerusalem.
8 Kadakul man na tanso an kinurua ni David sa Tibhat asin Cun, na mga siyudad ni Hadadezer. Iyan an ginamit ni Solomon sa paggibo kan tansong tangke nin tubig,*+ kan mga harigi, saka kan mga tansong kagamitan.+
9 Kan mabaretaan ni Hading Tou kan Hamat na nadaog ni David an bilog na hukbo ni Hading Hadadezer+ kan Zoba,+
10 isinugo niya tulos an aki niyang si Hadoram pasiring ki Hading David tanganing ikumusta niya siya ki David asin umawon ini huling linabanan asin dinaog ni David si Hadadezer (parati kayang nakikipaglaban kaidto si Hadadezer ki Tou), saka nagpadara siya nin gabos na klase nin kagamitan na bulawan, plata,* asin tanso.
11 Pinabanal ni Hading David an mga ini para ki Jehova,+ arog kan ginibo niya sa mga plata asin bulawan na nasamsam niya hali sa gabos na nasyon: hali sa Edom asin Moab, hali sa mga Ammonita,+ mga Filisteo,+ asin mga Amalekita.+
12 Ginaradan ni Abisai+ na aki ni Zeruia+ an 18,000 na Edomita sa Kababan nin Asin.+
13 Nagbugtak siya nin mga garison sa Edom, asin nagin mga lingkod ni David an gabos na Edomita.+ Tinawan ni Jehova si David nin kapangganahan* sain man siya magduman.+
14 Padagos na naghadi si David sa bilog na Israel,+ asin pinamahalaan niya na may hustisya asin katanusan an bilog niyang banwaan.+
15 Si Joab na aki ni Zeruia an pamayo kan hukbo,+ si Jehosafat+ na aki ni Ahilud an pararekord,
16 si Zadok na aki ni Ahitub saka si Ahimelec na aki ni Abiatar an mga saserdote, asin si Savsa an sekretaryo.
17 Si Benaias na aki ni Jehoiada an namamayo sa mga Keretita+ saka mga Peleteo.*+ Asin an mga aking lalaki ni David iyo an mga panginot na opisyal na sunod sa hadi.
Mga Nota
^ O “an mga banwa na nakadepende diyan.”
^ An buot sabihon, pinurutol an mga litid sa likod kan paa.
^ O “kaligtasan.”
^ O “tansong Dagat.”
^ Sa Ingles, silver.
^ O “kaligtasan.”
^ An buot sabihon, an mga guwardiya ni David.
