Inot na Cronica 29:1-30
29 Sinabi ngunyan ni Hading David sa bilog na katiripunan:* “An aki kong si Solomon na pinili nin Diyos,+ hoben pa asin dai pang eksperyensiya,*+ asin dakula an trabaho, huling an templo* na ini bakong para sa tawo kundi para sa Diyos na Jehova.+
2 Asin ginibo ko an gabos kong makakaya tanganing iandam para sa harong kan sakuyang Diyos an bulawan para sa mga bagay na gibo sa bulawan, an plata para sa mga bagay na gibo sa plata, an tanso para sa mga bagay na gibo sa tanso, an lansang para sa mga bagay na gibo sa lansang,+ an mga kahoy+ para sa mga bagay na gibo sa kahoy, an mga batong onyx, asin an mga batong isesemento, an makukulor saka saradit na batong pandekorasyon, an gabos na klase nin mamahalon na gapo, asin an dakulon na gapong alabastro.
3 Asin huling ikinakaugma kong marhay an harong kan sakuyang Diyos,+ itinatao ko man para sa harong kan sakuyang Diyos an sadiri kong mga kayamanan,+ bulawan asin plata, bilang dagdag sa gabos na naiandam ko na para sa banal na harong;
4 kaiba an 3,000 na talentong* bulawan hali sa Ofir+ saka an 7,000 na talentong dinalisay na plata, na gagamiton na pangkalupkop sa mga lanob kan mga kuwarto,*
5 an bulawan para sa mga bagay na gibo sa bulawan saka an plata para sa mga bagay na gibo sa plata, asin para sa gabos na gigibuhon kan mga ekspertong trabahador. Ngunyan, siisay sa saindo an gikan sa buot na matao nin regalo ki Jehova ngunyan na aldaw?”+
6 Kaya gikan sa buot na nagrani an mga pamayo* kan mga angkan, an mga pamayo* kan mga tribo nin Israel, an mga namamayo nin manangribo saka nin mananggatos,+ asin an mga namamahala sa mga gibuhon kan hadi.+
7 Asin nagtao sinda para* sa harong kan tunay na Diyos nin 5,000 na talentong bulawan, 10,000 na daric,* 10,000 na talentong plata, 18,000 na talentong tanso, asin 100,000 na talentong lansang.
8 An siisay man na igwa nin mamahalon na mga bato, itinao an mga iyan sa sarayan nin kayamanan sa harong ni Jehova, na nasa pamamahala ni Jehiel+ na Gersonita.+
9 Nag-ugma an banwaan huli sa mga gikan-sa-buot na dulot na ini na saindang itinao, huling itinao ninda an mga iyan ki Jehova nin bilog na puso,+ asin nag-ugma man na marhay an hading si David.
10 Dangan inumaw ni David si Jehova sa atubangan kan bilog na katiripunan. An sabi ni David: “Pag-umawon ka lugod, O Jehova na Diyos ni Israel na samuyang ama, sa bilog na panahon na daing kasagkudan.*
11 Saimo, O Jehova, an kadakulaan,+ an kakusugan,+ an kagayunan, an kamurawayan, pati an kamahalan,*+ huling saimo an gabos na bagay sa kalangitan asin sa daga.+ Saimo an kahadian, O Jehova.+ Ika an Saro na ilinalangkaw an sadiri bilang pamayo kan gabos.
12 Hali sa saimo an mga kayamanan saka an kamurawayan,+ asin namamahala ka sa gabos na bagay,+ asin sa saimong kamot igwa nin kapangyarihan+ saka kakusugan,+ asin kaya kan saimong kamot na ibantog+ saka pakusugon an gabos.+
13 Asin ngunyan, O samuyang Diyos, pinapasalamatan mi ika asin inuumaw an magayon mong pangaran.
14 “Alagad siisay man ako asin siisay man an sakong banwaan para magtao nin mga gikan-sa-buot na dulot na arog kaini? Huling hali sa saimo an gabos na bagay, asin an mga itinao mi sa saimo hali man sana sa sadiri mong kamot.
15 Huling kami mga dayuhan na residente sa atubangan mo asin mga nakikiistar sana, arog kan gabos ming apuon.+ Huling an mga aldaw mi sa ibabaw kan daga garo sarong anino+—mayong paglaom.
16 O Jehova na samuyang Diyos, hali sa sadiri mong kamot an gabos na kayamanan na ini na samong inandam tanganing magtugdok para sa saimo nin harong para sa saimong banal na pangaran, asin gabos ini sadiri mo.
17 Aram kong marhay, O sakuyang Diyos, na sinisiyasat mo an puso+ asin na ikinakaugma mo an integridad.*+ Sa sinseridad* kan sakong puso, gikan sa buot kong idinulot an gabos na bagay na ini, asin ugmahon akong mahiling na an saimong banwaan na yaon digdi nagtao saimo nin mga gikan-sa-buot na dulot.
18 O Jehova, na Diyos ni Abraham, ni Isaac, asin ni Israel, na samong mga apuon, papagdanayon mo sagkod lamang sa puso kan saimong banwaan an pagmawot* asin an kaisipan na ini, asin giyahan mo an saindang puso pasiring sa saimo.+
19 Asin tabangan mo an aki kong si Solomon na sunudon nin bilog na puso*+ an saimong mga tugon,+ mga pagirumdom, saka mga regulasyon. Tabangan mo siyang magibo an gabos na ini asin maitugdok an templo* na sakong pinag-andaman.”+
20 Dangan sinabi ni David sa bilog na katiripunan: “Umawon nindo ngunyan si Jehova na saindong Diyos.” Asin inumaw kan bilog na katiripunan si Jehova na Diyos kan saindang mga apuon asin nagduko sinda saka naglaob sa atubangan ni Jehova asin kan hadi.
21 Asin kan suminunod na aldaw, nagpadagos sinda na magdulot nin mga atang ki Jehova asin na mag-atang ki Jehova nin mga dulot na pigtututong,+ 1,000 torilyong baka, 1,000 lalaking karnero, 1,000 lalaking kordero, asin an mga dulot na inumon na kaiba kaiyan.+ Dakulon an inatang ninda para sa bilog na Israel.+
22 Padagos sindang nagkarakan asin nag-irinom sa atubangan ni Jehova kan aldaw na iyan na may dakulang pag-ugma,+ asin sa ikaduwang pagkakataon, iprinoklamar nindang hadi an aki ni David na si Solomon. Asin sa atubangan ni Jehova, linahidan ninda siya na magin lider,+ tapos linahidan man ninda si Zadok na magin saserdote.+
23 Dangan nagtukaw si Solomon sa trono ni Jehova+ bilang hadi na kasalida kan saiyang amang si David, asin nagin mapanggana siya, asin nagin masinunod sa saiya an gabos na Israelita.
24 Nagpasakop sa hading si Solomon an gabos na pamayo,*+ an matitibay na mga parapakilaban,+ pati an gabos na aki ni Hading David.+
25 Asin pinabantog na marhay ni Jehova si Solomon sa atubangan kan bilog na Israel asin tinawan niya siya nin pambihirang dignidad bilang hadi na dai pa nakamtan nin siisay man na nagin hadi sa Israel.+
26 Kaya naghadi sa bilog na Israel si David na aki ni Jesse,
27 asin an lawig* kan paghadi niya sa Israel 40 taon. Naghadi siya nin 7 taon sa Hebron+ asin 33 na taon sa Jerusalem.+
28 Asin nagadan siyang gurang nang marhay,+ kontento sa halawig niyang buhay,* kayamanan, saka kamurawayan; asin si Solomon na saiyang aki an nagsalida sa saiya bilang hadi.+
29 Kun manungod sa mga nangyari sa buhay ni Hading David, puon sa kapinunan sagkod sa katapusan, nakasurat iyan sa mga isinurat* ni Samuel na tagasabot,* ni Natan+ na propeta, asin ni Gad+ na bisyonaryo,
30 kaiba an mga nangyari sa bilog na panahon kan saiyang paghadi, an pambihira niyang mga gibo, asin an mga pangyayari may koneksiyon sa saiya asin sa Israel saka sa gabos na nakapalibot na kahadian.
Mga Nota
^ O “kongregasyon.”
^ O “dai pa handa.”
^ O “kuta; palasyo.”
^ An sarong talento katumbas nin 34.2 kilos. Hilingon an Apendise B14.
^ Sa literal, “harong.”
^ O “prinsipe.”
^ O “prinsipe.”
^ O “para sa paglilingkod.”
^ An daric sarong bulawan na sinsilyo kan Persia. Hilingon an Apendise B14.
^ O “puon sa panahon na daing sagkod sundo sa panahon na daing sagkod.”
^ O “dignidad.”
^ O “pagigin matanos; katanusan.”
^ O “katanusan.”
^ O “ingklinasyon.”
^ O “nin bilog na debosyon kan puso.”
^ O “kuta; palasyo.”
^ O “prinsipe.”
^ Sa literal, “an mga aldaw.”
^ Sa literal, “sa mga aldaw.”
^ O “tataramon.”
