Inot na Cronica 5:1-26
5 Ini an mga aki ni Ruben+ na panganay ni Israel. Siya an panganay, pero huling dinigtaan* niya an higdaan kan saiyang ama,+ an deretso niya bilang panganay itinao sa mga aki ni Jose+ na aki ni Israel, kaya sa saindang rekord nin mga ginikanan bako siya an ilinistang may deretso kan pagigin panganay.
2 Dawa pa mas nakakalabi si Juda+ kisa sa mga tugang niya asin sa saiya naggikan an saro na magigin lider,+ ki Jose itinao an deretso bilang panganay.
3 An mga aki ni Ruben na panganay ni Israel iyo si Hanok, Palu, Hezron, asin Carmi.+
4 Aki ni Joel si Semaias, na ama ni Gog, na ama ni Simei,
5 na ama ni Mikas, na ama ni Reaias, na ama ni Baal,
6 na ama ni Beerah na idinistiyero* ni Hading Tilgat-pilneser+ kan Asiria; nagin siyang pamayo kan tribo ni Ruben.
7 An saiyang mga tugang sigun sa saindang rekord nin mga ginikanan kan mga pamilya iyo si Jeiel na pamayo, si Zacarias,
8 asin si Bela na aki ni Azaz, na aki ni Sema, na aki ni Joel. An pamilya ni Bela nag-istar sa Aroer+ sagkod sa Nebo saka Baal-meon.+
9 An inistaran ninda sa bandang sirangan nakaabot sagkod sa gilid kan kaawagan, na minasagkod sa Salog nin Eufrates,+ huling duminakul na marhay sa daga nin Gilead an ataman nindang hayop.+
10 Kan panahon ni Saul, nakigiyera sinda sa mga Hagrita, na nadaog ninda, kaya nag-istar sinda sa mga tolda kan mga ini sa bilog na teritoryo sa sirangan kan Gilead.
11 An mga gikan ni Gad nag-istar sa daga nin Basan sagkod sa Saleca;+ kataid sinda kan mga gikan ni Ruben.
12 Si Joel an pamayo sa Basan, an ikaduwa si Safam, asin may mga katungdan man si Janai saka Safat.
13 Asin an pito nindang paryente sa ama iyo si Miguel, Mesulam, Sheba, Jorai, Jacan, Zia, asin Eber.
14 Sinda an mga aki ni Abihail, na aki ni Huri, na aki ni Jaroa, na aki ni Gilead, na aki ni Miguel, na aki ni Jesisai, na aki ni Jahdo, na aki ni Buz.
15 Si Ahi na aki ni Abdiel na aki ni Guni iyo an pamayo kan saindang angkan.
16 Nag-istar sinda sa Gilead,+ sa Basan+ asin sa nakapalibot na mga banwa diyan,* asin sa gabos na mga pasabsaban kan Saron sagkod sa mga sagkudan kaiyan.
17 Gabos sinda ilinista sa rekord nin mga ginikanan kan panahon ni Hading Jotam+ kan Juda asin kan panahon ni Hading Jeroboam*+ kan Israel.
18 An tribo ni Ruben, tribo ni Gad, asin an kabanga kan tribo ni Manases igwa nin 44,760 matitibay na parapakilaban sa saindang hukbo na may mga kalasag asin mga espada saka armado nin mga pana,* asin sinanay sinda sa pakikigiyera.
19 Nakigiyera sinda sa mga Hagrita,+ ki Jetur, Nafis,+ asin Nodab.
20 Kan nakikipaglaban sinda sa sainda, tinabangan sinda nin Diyos asin itinao sa kamot ninda an mga Hagrita saka an gabos na kasurog kaini, huling namibi sinda sa Diyos na tabangan sinda sa giyera, asin dinangog niya an saindang pakimahirak huling nagtiwala sinda sa saiya.+
21 Sinamsam ninda an saindang mga ataman na hayop—50,000 na kamelyo, 250,000 na karnero, asin 2,000 na asno—asin nabihag man ninda an 100,000 katawo.*
22 Dakul an nagadan, huling an tunay na Diyos an nakigiyera.+ Asin sinda na an nag-istar sa lugar kan mga ini sagkod sa panahon kan saindang pagkadistiyero.*+
23 An mga gikan kan kabanga kan tribo ni Manases+ nag-istar sa Basan sagkod sa Baal-hermon asin sa Senir saka sa Bukid nin Hermon.+ Dakulon sinda.
24 Ini an mga pamayo kan saindang mga angkan: si Efer, Isi, Eliel, Azriel, Jeremias, Hodavias, asin Jahdiel. Matitibay sindang mga parapakilaban, bantog na mga lalaki, asin mga pamayo kan saindang mga angkan.
25 Pero dai sinda nagin maimbod sa Diyos kan saindang mga apuon asin nagsamba sinda sa mga diyos* kan mga banwa na nakaistar sa kadagaan na ini,+ na pinuho nin Diyos sa atubangan ninda.
26 Kaya an Diyos kan Israel pinahiro si* Hading Pul kan Asiria+ (na iyo si Hading Tilgat-pilneser+ kan Asiria) tanganing puwersahan na pahalion an tribo ni Ruben, an tribo ni Gad, asin an kabanga kan tribo ni Manases asin darahon sinda sa Hala, Habor, Hara, saka sa may salog nin Gozan,+ asin diyan sinda nakaistar sagkod sa aldaw na ini.
Mga Nota
^ O “linapastangan.”
^ O “puwersahan na dinara.”
^ O “sa mga banwa na nakadepende diyan.”
^ An buot sabihon, si Jeroboam II.
^ Sa literal, “saka nagtutungtong nin busog.”
^ O “na kalag nin tawo.”
^ O “kan puwersahan na pagdara sa sainda sa ibang nasyon.”
^ O “asin garo hostes na nakisaro sa mga diyos.”
^ Sa literal, “pinukaw an espiritu ni.”
