An Inot na Surat ni Juan 3:1-24
3 Hilinga kun anong klaseng pagkamuot an ipinahiling kan Ama sa sato,+ mala ta inapod ngani kitang mga aki nin Diyos!+ Asin mga aki man nanggad niya kita. Iyan an dahilan kaya dai kita midbid kan kinaban,+ huling dai siya kaiyan namidbid.+
2 Mga namumutan, mga aki na kita ngunyan nin Diyos,+ pero dai pa ihinahayag kun magigin ano kita.+ An aram niyato iyo na pag ihinayag na siya, magigin arog kita sa saiya, huling mahihiling ta siya kun ano man nanggad siya.
3 Asin an lambang saro na may arog kaining paglaom sa saiya dinadalisay an sadiri niya,+ kun paanong an sarong iyan dalisay.
4 An lambang saro na padagos na naggigibo nin kasalan padagos man na nagbabalga sa katugunan, asin an kasalan pagbalga sa katugunan.
5 Aram man nindo na siya ihinayag tanganing halion an satuyang mga kasalan,+ asin mayo nin kasalan sa saiya.
6 An lambang saro na nagdadanay na kasaro niya dai nagpapadagos sa paggibo nin kasalan;+ mayo nin siisay man na padagos na naggigibo nin kasalan an nakahiling sa saiya o nakamidbid sa saiya.
7 Mga namumutan* na aki, dai kamo magpalagalag sa kiisay man; an saro na padagos na naggigibo nin katanusan matanos, kun paanong an sarong idto matanos.
8 An saro na padagos na naggigibo nin kasalan gikan sa Diyablo, huling an Diyablo nagkakasala na puon sa kapinunan.*+ Sa katuyuhan na ini ihinayag an Aki nin Diyos, tanganing rauton* an mga gibo kan Diyablo.+
9 An lambang saro na iminundag gikan sa Diyos dai nagpapadagos sa paggibo nin kasalan,+ huli ta an Saiyang banhi* nagdadanay sa sarong iyan, asin dai niya magigibong padagos na magkasala, huli ta iminundag siya gikan sa Diyos.+
10 An mga aki nin Diyos asin an mga aki kan Diyablo namimidbid sa arog kaining paagi: An siisay man na dai naggigibo nin katanusan bakong gikan sa Diyos, ni an siisay man na dai namumuot sa saiyang tugang.+
11 Huli ta iyo ini an mensahe na saindong nadangog puon sa kapinunan, na dapat niyatong kamutan an lambang saro;+
12 bakong arog ni Cain, na naggikan sa saro na maraot asin naggadan sa saiyang tugang.+ Asin ano an dahilan ta ginadan niya siya? Dahil an saiyang mga gibo maraot,+ pero an sa tugang niya matanos.+
13 Mga tugang, dai kamo magngalas na an kinaban nauungis sa saindo.+
14 Aram niyato na naliwat na kita hali sa pagigin gadan pasiring sa pagigin buhay,+ huling namumutan ta an mga tugang.+ An saro na dai namumuot nagdadanay sa pagigin gadan.+
15 An lambang saro na nauungis sa saiyang tugang sarong paragadan,+ asin aram nindo na mayong paragadan an may buhay na daing katapusan.+
16 Naaraman ta an manungod sa pagkamuot, huling itinao kan sarong idto an saiyang buhay* para sa sato,+ asin may obligasyon kita na itao an satong buhay* para sa satuyang mga tugang.+
17 Alagad kun an saro igwa nin materyal na mga pagsadiri sa kinaban na ini asin nahihiling niya na nangangaipo an saiyang tugang pero habo niyang magpahiling nin malasakit sa saiya, paano masasabing may pagkamuot siya sa Diyos?+
18 Mga namumutan* na aki, dapat kitang mamuot, bakong paagi sa tataramon o paagi sa dila,+ kundi paagi sa gibo+ asin katotoohan.+
19 Paagi kaiyan, maaaraman niyato na naggikan kita sa katotoohan, asin maaasigurar* ta an satuyang puso sa atubangan niya
20 dawa pa may mga bagay na diyan kinokondenar kita kan satuyang puso, huling an Diyos mas urog kisa sa satuyang puso asin nakakaaram kan gabos na bagay.+
21 Mga namumutan, kun dai kita kinokondenar kan satuyang puso, nagigibo tang makipag-ulay sa Diyos na dai nag-aalangan;+
22 asin ano man an hagadon ta sa saiya itinatao niya sa sato,+ huli ta inuutob ta an saiyang mga tugon asin ginigibo an mga bagay na nakakaugma sa saiyang paghiling.
23 Iyo baga ini an saiyang tugon: na magtubod kita sa pangaran kan saiyang Aki na si Jesu-Cristo+ asin kamutan an lambang saro,+ arog kan ipinagbuot niya sa sato.
24 Dugang pa, an saro na nag-uutob kan saiyang mga tugon nagdadanay na kasaro niya, asin siya man nagdadanay na kasaro kan sarong iyan.+ Asin paagi sa espiritu na itinao niya sa sato, aram tang nagdadanay siyang kasaro niyato.+
Mga Nota
^ O “saradit.”
^ O “puon kan siya magpuon.”
^ O “laglagon.”
^ An buot sabihon, banhi na may kakayahan na magprodusir nin bunga.
^ O “kalag.”
^ O “kalag.”
^ O “saradit.”
^ O “makukumbinsir.”
