An Inot na Surat ni Juan 4:1-21
4 Mga namumutan, dai kamo magtubod sa lambang ipinasabong na kapahayagan,*+ kundi siyertuhon nindo kun an ipinasabong na mga kapahayagan* talagang gikan sa Diyos,+ huli ta dakul na mga bakong tunay na propeta an nagralataw sa kinaban.+
2 Ini an paagi para maaraman nindo kun baga gikan sa Diyos an ipinasabong na kapahayagan: An lambang ipinasabong na kapahayagan na minimidbid na si Jesu-Cristo nag-abot bilang tawo* sarong kapahayagan na gikan sa Diyos.+
3 Pero an lambang ipinasabong na kapahayagan na dai minimidbid si Jesus bakong gikan sa Diyos.+ Saro pa, iyan an ipinasabong na kapahayagan kan anticristo na nadangog nindo na maabot,+ asin ngunyan naglalakop na iyan sa kinaban.+
4 Naggikan kamo sa Diyos, mga namumutan* na aki, asin dinaog nindo sinda,+ huli ta siya na kasaro nindo+ mas urog kisa saiya na kasaro kan kinaban.+
5 Naggikan sinda sa kinaban;+ iyan an dahilan kaya an sinasabi ninda gikan sa kinaban asin an kinaban nagdadangog sa sainda.+
6 Naggikan kita sa Diyos. An siisay man na nakakamidbid sa Diyos nagdadangog sa sato;+ an siisay man na bakong gikan sa Diyos dai nagdadangog sa sato.+ Sa arog kaining paagi ta mahihiling an pagkakalain kan ipinasabong na kapahayagan nin katotoohan asin kan ipinasabong na kapahayagan nin kaputikan.+
7 Mga namumutan, padagos tang kamutan an lambang saro,+ huli ta an pagkamuot gikan sa Diyos, asin an siisay man na namumuot iminundag gikan sa Diyos saka midbid an Diyos.+
8 An siisay man na dai namumuot dai nakakamidbid sa Diyos, huli ta an Diyos pagkamuot.+
9 Kun manungod sa sato, an pagkamuot nin Diyos nahayag sa arog kaining paagi: Isinugo nin Diyos sa kinaban an Saiyang bugtong na Aki+ tanganing magkamit kita nin buhay paagi sa saiya.+
10 An pagkamuot na ini arog kaini: Bako ining dahil namutan ta an Diyos, kundi dahil namutan niya kita asin itinao niya an saiyang Aki bilang pampagian nin buot na atang+ para* sa satong mga kasalan.+
11 Mga namumutan, kun namutan kita nin Diyos sa arog kaining paagi, may obligasyon man kitang kamutan an lambang saro.+
12 Mayo nin siisay man na nakahiling sa Diyos kasuarin man.+ Kun padagos tang mamumutan an lambang saro, an Diyos magdadanay na kaibanan niyato asin an saiyang pagkamuot mahihiling sa sato nin lubos.+
13 Aram niyato na nagdadanay kitang kasaro niya asin na siya nagdadanay na kasaro niyato, huling itinao niya sa sato an saiyang espiritu.
14 Dugang pa, nahiling ta mismo asin nagpapatotoo kita na isinugo kan Ama an saiyang Aki bilang paraligtas kan kinaban.+
15 Kun an siisay man minimidbid na si Jesus an Aki nin Diyos,+ an Diyos nagdadanay na kasaro niya asin siya nagdadanay na kasaro nin Diyos.+
16 Asin naaraman niyato na namumutan kita nin Diyos asin kumbinsido kita kaiyan.+
An Diyos pagkamuot,+ asin an saro na danay na nagpapahiling nin pagkamuot nagdadanay na kasaro nin Diyos asin an Diyos nagdadanay na kasaro niya.+
17 Sa paaging ini an pagkamuot mahihiling sa sato nin lubos, tanganing libre kitang makapagtaram*+ sa aldaw nin paghukom, huli ta sa kinaban na ini kita mismo kapareho kan sarong idto.
18 Sa pagkamuot mayo nin takot,+ imbes hinahali nin lubos na pagkamuot an takot, huli ta an takot nakakapugol sa sato. Tunay nanggad, an saro na natatakot bako pang lubos an pagkamuot.+
19 Kita namumuot, huli ta inot niya kitang namutan.+
20 Kun sasabihon nin siisay man, “Namumutan ko an Diyos,” pero nauungis siya sa saiyang tugang, saro siyang putikon.+ Huli ta kun an saro dai namumuot sa saiyang tugang,+ na nahihiling niya, dai man niya magigibong mamuot sa Diyos, na dai niya nahihiling.+
21 Saka ini an tugon niya sa sato, na an siisay man na namumuot sa Diyos dapat man na mamuot sa saiyang tugang.+
Mga Nota
^ Sa literal, “an mga espiritu.”
^ Sa literal, “lambang espiritu.”
^ Sa literal, “nag-abot sa laman.”
^ O “saradit.”
^ O “bilang atang na pambayad.”
^ O “magkaigwa kita nin kumpiyansa.”
