An Inot na Surat ni Juan 5:1-21
5 An lambang saro na nagtutubod na si Jesus iyo an Cristo iminundag gikan sa Diyos,+ asin an lambang saro na namumuot sa Ama namumuot man sa mga aki na iminundag gikan sa Saiya.
2 Naaaraman niyato na namumutan ta an mga aki nin Diyos+ sa paaging ini, pag namumutan ta an Diyos asin isinasagibo an saiyang mga tugon.
3 Huli ta ini an kahulugan kan pagkamuot sa Diyos, an utubon ta an saiyang mga tugon;+ alagad ta an saiyang mga tugon bakong pagabat,+
4 huli ta an siisay man* na iminundag gikan sa Diyos dinadaog an kinaban.+ Asin dinaog niyato an kinaban paagi kan bagay na ini, an satuyang pagtubod.+
5 Siisay an makakadaog kan kinaban?+ Bako daw na idtong nagtutubod na si Jesus an Aki nin Diyos?+
6 Siya an nag-abot paagi sa tubig asin dugo, si Jesu-Cristo, pero bako sanang igwa kan tubig,+ kundi igwa kan tubig asin kan dugo.+ Asin an espiritu nagpapatotoo manungod kaiyan,+ huli ta an espiritu iyo an katotoohan.
7 Igwa kaya nin tulong nagpapatotoo:
8 an espiritu+ asin an tubig+ saka an dugo;+ asin an tulong ini nagkakauruyon.
9 Kun inaako ta ngani an patotoo nin mga tawo, nakakalabi diyan an patotoo nin Diyos. Huli ta an patotoong itinao nin Diyos iyo an patotoo niya manungod sa saiyang Aki.
10 An tawo na nagtutubod sa Aki nin Diyos inaako an patotoo na itinao sa saiya. An tawo na mayong pagtubod sa Diyos ginigibo an Diyos na putikon,+ huli ta dai siya nagtutubod sa patotoo na itinao nin Diyos mapadapit sa saiyang Aki.
11 Asin iyo ini an patotoo, na tinawan kita nin Diyos nin buhay na daing katapusan,+ asin an buhay na ini nasa saiyang Aki.+
12 An saro na inaako an Aki igwa kan buhay na ini; an saro na dai inaako an Aki nin Diyos mayo kan buhay na ini.+
13 Sinusuratan ko kamo kan mga bagay na ini tanganing maaraman nindo na igwa kamo nin buhay na daing katapusan,+ kamo na nagtutubod sa pangaran kan Aki nin Diyos.+
14 Asin may kumpiyansa kita sa saiya*+ na ano man na hagadon ta kauyon kan saiyang kabutan, dinadangog niya kita.+
15 Asin kun aram niyato na dinadangog niya kita may koneksiyon sa ano man na hinahagad ta, aram tang makakamtan niyato an mga bagay na hinahagad ta, huling sa saiya ta iyan hinagad.+
16 Kun mahiling nin saro an saiyang tugang na may ginigibong kasalan na bako man maninigo sa kagadanan, dapat niya siyang ipamibi, asin tatawan siya nin Diyos nin buhay.+ Iyo, para ini sa mga tawong an kasalan bako man maninigo sa kagadanan. Igwa kaya nin kasalan na maninigo sa kagadanan.+ An arog kaiyan na kasalan an sinasabi ko sa saro na dai ipamibi.
17 An gabos na gibong bakong matanos kasalan,+ pero igwa nin kasalan na bako man maninigo sa kagadanan.
18 Aram niyato na an siisay man na iminundag gikan sa Diyos dai nagpapadagos sa paggibo nin kasalan, alagad binabantayan siya kan saro na iminundag gikan sa Diyos,* asin an saro na maraot mayo nin magigibong ano man sa saiya.*+
19 Aram niyato na kita naggikan sa Diyos, pero an bilog na kinaban nasa kapangyarihan kan saro na maraot.+
20 Pero aram tang nag-abot an Aki nin Diyos,+ asin tinawan niya kita nin pakasabot* tanganing magkaigwa kita kan kaaraman mapadapit sa saro na totoo. Asin kasaro kita kan saro na totoo+ paagi kan saiyang Aki na si Jesu-Cristo. Iyo ini an tunay na Diyos asin an buhay na daing katapusan.+
21 Mga namumutan* na aki, maglikay kamo sa mga idolo.+
Mga Nota
^ Sa literal, “an gabos na bagay.”
^ O “Asin libre kitang nakakapagtaram.”
^ O “dai makakapugol sa saiya.”
^ An buot sabihon, si Jesu-Cristo, an Aki nin Diyos.
^ Sa literal, “pakamansay; intelektuwal na kakayahan.”
^ O “saradit.”
