Inot na Samuel 12:1-25
12 Sa katapos-tapusi, sinabi ni Samuel sa bilog na Israel: “Ginibo ko na an* gabos na hinagad nindo sa sako, asin nagnombra ako nin sarong hadi na mamamahala sa saindo.+
2 Uya na an hadi na manginginot* sa saindo!+ Gurang na ako saka ubanon na, tapos an mga aki ko kaibanan na nindo.+ Puon kan ako hoben pa sagkod sa aldaw na ini, ako an nanginot sa saindo.+
3 Uya ako. Sabihon nindo sa atubangan ni Jehova asin sa atubangan kan saiyang linahidan+ kun igwa kamong reklamo laban sa sako. Igwa daw akong kinuang toro o asno sa kiisay man sa saindo?+ O may dinaya daw ako o inapi? May inako daw akong suhol* hali sa kiisay man para palampason ko na sana an saiyang ginibo?+ Kun igwa, ibabalik ko an mga iyan sa saindo.”+
4 Nagsirimbag sinda: “Mayo ka man nin dinaya o inapi sa samo, asin mayo kang inakong ano man hali sa kamot nin siisay man.”
5 Kaya sinabi niya sa sainda: “Ngunyan na aldaw, saksi si Jehova asin an linahidan niya na mayo kamong ano man na maiaakusar sa sako.”* Nagsirimbag sinda: “Iyo, saksi siya.”
6 Kaya sinabi ni Samuel sa banwaan: “Saksi si Jehova na nagpili ki Moises saka ki Aaron asin nagdara sa saindong mga apuon paluwas sa daga nin Ehipto.+
7 Magdanay kamo sa kinatitindugan nindo ngunyan, asin huhusgaran ko kamo sa atubangan ni Jehova basado sa gabos na matanos na ginibo ni Jehova sa saindo saka sa saindong mga apuon.
8 “Nagbalyo kaidto si Jacob sa Ehipto.+ Kan huri, kan mag-arapod ki Jehova an saindong mga apuon para maghagad nin tabang,+ isinugo tulos ni Jehova si Moises+ saka si Aaron tanganing iluwas sa Ehipto an saindong mga apuon asin paistaron sinda sa lugar na ini.+
9 Pero liningawan ninda si Jehova na saindang Diyos, kaya itinao* niya sinda+ sa kamot kan pamayo kan hukbo ni Hazor na si Sisera+ asin sa kamot kan mga Filisteo+ saka sa kamot kan hadi kan Moab,+ tapos nakipaglaban an mga ini sa sainda.
10 Asin nag-arapod sinda ki Jehova tanganing maghagad nin tabang+ asin nagsarabi, ‘Nagkasala kami,+ huling binayaan mi si Jehova para maglingkod sa mga Baal+ asin sa mga imahen ni Astoret;+ iligtas mo kami ngunyan sa kamot kan samong mga kalaban tanganing makapaglingkod kami sa saimo.’
11 Kaya isinugo ni Jehova si Jerubaal,+ si Bedan, si Jefte,+ saka si Samuel+ asin ilinigtas kamo sa kamot kan mga kalaban na nasa palibot nindo, tanganing makapamuhay kamo nin tiwasay.+
12 Kan mahiling nindo na sasalakayon kamo ni Nahas+ na hadi kan mga Ammonita, pauruutro nindong sinabi sa sako, ‘Dai, desidido kaming magkaigwa nin hadi!’+ dawa ngani si Jehova na saindong Diyos an saindong Hadi.+
13 Uya na an hadi na saindong pinili, su hinahagad nindo. Nagnombra si Jehova nin sarong hadi para sa saindo.+
14 Kun magkakaigwa kamo nin pagkatakot ki Jehova+ saka maglilingkod sa saiya+ asin kun masunod kamo sa mga sinasabi* niya+ asin dai kamo marebelde laban sa pagbuot ni Jehova, asin kun kamo saka an hading namamahala sa saindo masunod ki Jehova na saindong Diyos, marahay iyan.
15 Alagad kun dai nindo susunudon an mga sinasabi* ni Jehova asin marebelde kamo laban sa pagbuot ni Jehova, kamo saka an saindong mga ama papadusahan ni Jehova.*+
16 Magdanay kamo sa kinatitindugan nindo ngunyan asin hilingon nindo ining makangangalas na bagay na gigibuhon ni Jehova sa atubangan kan saindong mga mata.
17 Bakong tig-anihan na nin trigo ngunyan? Maapod ako ki Jehova tanganing magpadaguldol siya asin magpauran; dangan maaaraman nindo saka masasabutan kun gurano karaot sa paghiling ni Jehova an ginibo nindong paghagad nin sarong hadi.”+
18 Kaya nag-apod si Samuel ki Jehova, asin nagpadaguldol si Jehova saka nagpauran kan aldaw na iyan. Huli kaini, nagkatarakot na marhay ki Jehova asin ki Samuel an bilog na banwaan.
19 Dangan sinabi kan bilog na banwaan ki Samuel: “Ipamibi mo ki Jehova, na saimong Diyos, an saimong mga lingkod,+ huling habo ming magkagaradan; dinagdagan mi pa kaya nin saro pang karatan an gabos ming kasalan huling naghagad kami nin sarong hadi.”
20 Kaya sinabi ni Samuel sa banwaan: “Dai kamo matakot. Iyo, dawa pa nagibo nindo an gabos na karatan na ini, dai lang kamo magpundo sa pagsunod ki Jehova,+ asin paglingkudan nindo si Jehova nin bilog na puso.+
21 Dai kamo magsuway tangani sanang magsunod sa daing halagang mga bagay,*+ na daing pakinabang+ asin dai makakapagligtas, huling daing halaga* an mga iyan.
22 Alang-alang sa saiyang dakulang pangaran,+ dai papabayaan ni Jehova an saiyang banwaan,+ huling si Jehova mismo an nagpili sa saindo tanganing magin saiyang banwaan.+
23 Asin ako man, dai ko nanggad magigibong magpundo sa pagpamibi alang-alang sa saindo ta magkakasala ako kaiyan ki Jehova. Padagos kong itutukdo sa saindo an marahay asin tamang dalan.
24 Pero dapat kamong magkaigwa nin pagkatakot ki Jehova,+ saka bilog na puso kamong maglingkod sa saiya nin may kaimbudan,* asin girumdumon nindo an darakulang mga bagay na ginibo niya para sa saindo.+
25 Alagad kun magmamatagas kamo sa paggibo nin maraot, paparaon kamo,+ kamo saka an saindong hadi.”+
Mga Nota
^ Sa literal, “Dinangog ko na an saindong boses kun manungod sa.”
^ Sa literal, “na malakaw na inot.”
^ O “kuwartang pampasilensiyo.”
^ Sa literal, “mayo kamong nakuang ano man sa sakong kamot.”
^ Sa literal, “ipinabakal.”
^ O “sa boses.”
^ O “an boses.”
^ Sa literal, “an kamot ni Jehova magigin laban sa saindo asin sa saindong mga ama.”
^ O “sa mga bakong totoo.”
^ O “bakong totoo.”
^ O “maglingkod sa saiya sa katotoohan.”
