Inot na Samuel 5:1-12
5 Kan maagaw kan mga Filisteo an Kaban+ kan tunay na Diyos, dinara ninda ini hali sa Ebenezer pasiring sa Asdod.
2 Dangan, ilinaog kan mga Filisteo sa harong* ni Dagon an Kaban kan tunay na Diyos asin itinaid iyan ki Dagon.+
3 Kan magmata nin amay an mga taga Asdod kan suminunod na aldaw, nahiling nindang nakatumba na an estatuwa ni Dagon asin nakalaob sa atubangan kan Kaban ni Jehova.+ Kaya binuhat ninda si Dagon asin ibinalik sa saiyang kinamumugtakan.+
4 Pagmata ninda nin amay kan suminunod na aldaw, nahiling nindang nakatumba na naman an estatuwa ni Dagon asin nakalaob sa atubangan kan Kaban ni Jehova. Putol na an payo saka mga kamot ni Dagon asin yaon na an mga ini sa salog kan entrada. An hawak* na sana kaini na korteng sira* an natada.
5 Iyan an dahilan kun kaya sagkod sa aldaw na ini, an mga saserdote ni Dagon asin an gabos na minalaog sa harong ni Dagon dai minatungtong sa salog kan entrada kan harong ni Dagon sa Asdod.
6 Nagin magabat an kamot ni Jehova laban sa mga Asdodita, asin pinasakitan niya sinda paagi sa pagpatubo nin almuranas sa mga nakaistar sa Asdod asin sa mga teritoryo kaini.+
7 Kan mahiling kan mga lalaki kan Asdod an nangyayari, sinabi ninda: “Dai dapat magpirmi digdi sa sato an Kaban kan Diyos nin Israel, huling nagin maringis siya* sa sato saka sa satong diyos na si Dagon.”
8 Kaya ipinaapod ninda saka tiniripon an gabos na tagapamahala kan mga Filisteo asin hinapot sinda: “Ano an dapat tang gibuhon sa Kaban kan Diyos nin Israel?” Nagsimbag sinda: “Ilipat nindo sa Gat+ an Kaban kan Diyos nin Israel.” Kaya ilinipat ninda duman an Kaban kan Diyos nin Israel.
9 Pagkatapos nindang mailipat iyan duman, pinadusahan ni Jehova an* siyudad asin natarantang marhay an mga nakaistar diyan. Pinasakitan niya an mga tawo, aki man o gurang, asin pinatubuan niya sinda nin almuranas.+
10 Kaya ipinadara ninda sa Ekron+ an Kaban kan tunay na Diyos, pero pagkaabot-abot sa Ekron kan Kaban kan tunay na Diyos, nagkururahaw an mga taga Ekron: “Dinara ninda sa sato an Kaban kan Diyos nin Israel tanganing garadanon kita asin an satong mga kahimanwa!”+
11 Dangan ipinaapod ninda saka tiniripon an gabos na tagapamahala kan mga Filisteo asin nagsarabi: “Irayo nindo digdi an Kaban kan Diyos nin Israel. Ibalik nindo iyan sa kinamumugtakan kaiyan tanganing kami asin an samong mga kahimanwa dai magkagaradan.” Nagkatarakot kayang magadan an gabos na nakaistar sa siyudad; pinadusahan sindang marhay kan tunay na Diyos,*+
12 asin an mga dai nagadan tinurubuan nin almuranas. Asin nakaabot sa langit an agrangay kan siyudad para maghagad nin tabang.
Mga Nota
^ O “templo.”
^ O “lawas.”
^ Sa literal, “Si Dagon sana.”
^ Sa literal, “an kamot niya.”
^ O “an kamot ni Jehova nagin laban sa.”
^ O “nagin magabat na marhay laban sa sainda an kamot kan tunay na Diyos.”
