Inot na Samuel 6:1-21
-
Ibinalik sa Israel kan mga Filisteo an Kaban (1-21)
6 Pitong bulan na nasa teritoryo kan mga Filisteo an Kaban+ ni Jehova.
2 Ipinaapod kan mga Filisteo an mga saserdote saka an mga parahula+ asin hinapot sinda: “Ano an dapat ming gibuhon sa Kaban ni Jehova? Sabiha samo kun paano mi iyan dapat ibalik sa kinamumugtakan kaiyan.”
3 Nagsimbag sinda: “Kun ibabalik nindo an kaban kan tipan ni Jehova na Diyos kan Israel, dai nindo iyan ibalik na mayong kaibang dulot. Dapat na ibalik nindo iyan sa saiya na may kaibang dulot para sa pagkakasala.+ Pag ginibo nindo ini, saka lang kamo mauumayan asin maaaraman nindo kun taano ta padagos pa niya kamong pinapadusahan.”*
4 Kaya naghapot sinda: “Anong dulot para sa pagkakasala an dapat ming ipadara sa saiya?” Nagsimbag sinda: “Magpadara kamo nin limang bulawan na korteng almuranas asin limang bulawan na korteng kino, sigun sa bilang kan mga tagapamahala kan mga Filisteo,+ huling parareho an damat na nagpapasakit sa saindo gabos asin sa saindong mga tagapamahala.
5 Dapat kamong gumibo nin mga pigurin kan saindong mga almuranas asin kan mga kino+ na nandedestroso sa saindong daga, asin tawan nindo nin onra an Diyos kan Israel. Tibaad ipundo na niya an pagpadusa sa* saindo saka sa saindong diyos asin sa saindong daga.+
6 Taano ta magmamatagas an saindong puso arog kan pagmamatagas kan puso kan Ehipto asin ni Faraon?+ Kan padusahan na Niya sinda nin grabe+ saka lang ninda pinahali an mga Israelita, asin naghali an mga ini.+
7 Kaya gumibo kamo nin sarong bagong kareta asin kumua kamo nin duwang baka na dai pa nasasakalan asin may mga ugbon. Dangan isalong nindo sa mga baka an kareta, pero irayo nindo sa sainda an mga ugbon ninda asin ibalik nindo an mga ini sa turil.
8 Kuanon nindo an Kaban ni Jehova asin isakay iyan sa kareta, tapos sa kataid kaiyan, magbugtak kamo nin kahon asin diyan nindo ilaag an mga ipapadara nindo sa saiya na bulawan na mga pigurin bilang dulot para sa pagkakasala.+ Dangan palargahon na nindo iyan
9 asin subaybayan nindo: Kun magtukad iyan sa dalan pasiring sa teritoryo kaiyan sa Bet-semes,+ siya man nanggad an may kagigibuhan kan marauton na mga nangyayaring ini sa sato. Pero kun dai, maaaraman niyato na bako siya* an nagpapadusa sa sato kundi nagkataon sana an mga ini.”
10 Iyan an ginibo kan mga Filisteo. Nagkua sinda nin duwang baka, na may mga ugbon, asin isinalong sa mga ini an kareta; tapos linaom ninda sa turil an mga ugbon.
11 Dangan isinakay ninda sa kareta an Kaban ni Jehova saka an kahon na may laog na mga bulawan na korteng kino asin mga pigurin kan saindang almuranas.
12 Asin nagdurudiretso an mga baka sa dalan pasiring sa Bet-semes.+ Nagpirmi lang an mga ini sa sarong dalan, na sigeng unga mantang naglalakaw; dai nagsiko an mga ini sa tuo o sa wala. Siring man, naglalakaw sa may likudan kan mga ini an mga tagapamahala kan mga Filisteo sagkod sa sagkudan kan Bet-semes.
13 Nag-aani kaidto nin trigo an mga taga Bet-semes sa kapatagan sa kababan.* Kan mahiling ninda an Kaban, grabe an kaugmahan ninda.
14 Nakaabot an kareta sa uma ni Josue na Bet-semita asin nagpundo iyan duman harani sa sarong dakulang gapo. Kaya tiniak ninda an kahoy kan kareta, asin inatang an mga baka+ bilang dulot na pigtututong para ki Jehova.
15 Ibinaba kan mga Levita+ an Kaban ni Jehova asin an kataid kaiyan na kahon na may laog na mga bulawan na pigurin, asin ibinugtak ninda an mga iyan sa ibabaw kan dakulang gapo. Kan aldaw na iyan, nagdulot an mga lalaki kan Bet-semes+ nin mga dulot na pigtututong asin mga atang para ki Jehova.
16 Kan mahiling ini kan limang tagapamahala kan mga Filisteo, nagbalik na sinda sa Ekron kan aldaw na idto.
17 Ini an mga bulawan na korteng almuranas na ipinadara kan mga Filisteo para ki Jehova bilang dulot para sa pagkakasala:+ saro para sa Asdod,+ saro para sa Gaza, saro para sa Askelon, saro para sa Gat,+ asin saro para sa Ekron.+
18 An bilang kan mga bulawan na korteng kino kapareho kan bilang kan gabos na siyudad kan mga Filisteo—kabilang an mga siyudad na may matibay na depensa asin an mga baryong nasa kalangtadan—na pinapamahalaan kan limang tagapamahala.
Asin an dakulang gapo sa uma ni Josue na Bet-semita, na pinagpatungan ninda kan Kaban ni Jehova, nagseserbing patotoo sagkod sa aldaw na ini.
19 Alagad ginadan nin Diyos an mga lalaki kan Bet-semes huling naghiling sinda sa Kaban ni Jehova. Ginadan niya an 50,070* katawo sa banwaan, asin nagmurundong marhay an mga tawo huling kadakul sa sainda an ginadan ni Jehova.+
20 Kaya naghapot an mga lalaki kan Bet-semes: “Siisay an makakatindog sa atubangan ni Jehova, an banal na Diyos+ na ini? Kiisay daw siya maduman pagkahali niya digdi sa sato?”+
21 Kaya nagsugo sinda nin mga mensahero para sabihon sa mga nakaistar sa Kiriat-jearim:+ “Ibinalik kan mga Filisteo an Kaban ni Jehova. Bumaba kamo digdi asin kuanon na nindo ini.”+
Mga Nota
^ O “kun taano ta dai pa minasuway sa saindo an saiyang kamot.”
^ O “Tibaad pagianon na niya an gabat kan saiyang kamot laban sa.”
^ O “bako an kamot niya.”
^ O “sa hababang kapatagan.”
^ Sa literal, “70 lalaki, 50,000 na lalaki.”
