Inot na Samuel 7:1-17
7 Kaya nag-abot an mga lalaki kan Kiriat-jearim asin kinua an Kaban ni Jehova saka dinara iyan sa harong ni Abinadab+ na nasa bulod. Dangan, pinabanal ninda an saiyang aki na si Eleazar tanganing iyo an magbantay sa Kaban ni Jehova.
2 Halawig na panahon na nagdanay sa Kiriat-jearim an Kaban, 20 taon gabos puon kan mag-abot iyan diyan. Asin pinunan kan bilog na nasyon* nin Israel na hanapon si* Jehova.+
3 Dangan sinabi ni Samuel sa bilog na nasyon nin Israel: “Kun bilog na puso kamong nagbabalik ki Jehova,+ haralion nindo an mga diyos kan ibang mga nasyon+ saka an mga imahen ni Astoret+ na yaon diyan sa saindo. Asin itao nindo ki Jehova an saindong puso na daing pagduwa-duwa asin sa saiya sana kamo maglilingkod,+ asin ililigtas niya kamo sa kamot kan mga Filisteo.”+
4 Kaya hinarali kan mga Israelita an mga Baal saka an mga imahen ni Astoret, asin ki Jehova sana sinda naglingkod.+
5 Dangan sinabi ni Samuel: “Tipuna sa Mizpa+ an bilog na Israel, asin mamimibi ako ki Jehova para sa saindo.”+
6 Kaya nagtiripon sinda sa Mizpa, asin nagsakdo sinda nin tubig tapos iinula iyan sa atubangan ni Jehova asin nag-ayuno sinda kan aldaw na iyan.+ Nagsarabi sinda duman: “Nagkasala kami ki Jehova.”+ Asin sa Mizpa nagpuon na maglingkod bilang hukom+ kan mga Israelita si Samuel.
7 Kan mabaretaan kan mga Filisteo na nagtiripon sa Mizpa an mga Israelita, nagturukad an mga tagapamahala kan mga Filisteo+ tanganing salakayon an Israel. Kan maaraman ini kan mga Israelita, nagkatarakot sinda huli sa mga Filisteo.
8 Kaya sinabi kan mga Israelita ki Samuel: “Dai ka magpundo sa pag-apod ki Jehova na satuyang Diyos para tabangan kita+ asin iligtas kita sa kamot kan mga Filisteo.”
9 Dangan nagkua si Samuel nin sarong nagsususo pang kordero tapos inatang iyan bilang bílog na dulot na pigtututong+ para ki Jehova; asin nag-apod si Samuel ki Jehova tanganing maghagad nin tabang para sa Israel, asin sinimbag siya ni Jehova.+
10 Mantang inaatang ni Samuel an dulot na pigtututong, nag-abante an mga Filisteo para makipaglaban sa Israel. Kan aldaw na iyan, nagpadaguldol si Jehova nin makusog+ laban sa mga Filisteo saka rinibaraw Niya sinda,+ asin nadaog sinda sa atubangan kan Israel.+
11 Kaya nagruluwas sa Mizpa an mga lalaki kan Israel asin linapag an mga Filisteo asin ginaradan sinda sagkod sa timog kan Bet-car.
12 Dangan nagkua si Samuel nin sarong gapo+ asin ibinugtak iyan sa pag-ultanan kan Mizpa saka Jesana asin inapod ining Ebenezer,* huling sabi niya: “Sagkod ngunyan tinatabangan kita ni Jehova.”+
13 Kaya nadaog an mga Filisteo, asin dai na sinda giraray naglaog sa teritoryo kan Israel;+ asin an kamot ni Jehova padagos na nagin laban sa mga Filisteo sa bilog na panahon na nabubuhay si Samuel.+
14 Naibalik man sa Israel an mga siyudad, puon sa Ekron sagkod sa Gat, na kinurua kan mga Filisteo sa Israel, asin nabawi kan Israel an saindang teritoryo sa kamot kan mga Filisteo.
Nagkaigwa man nin katuninungan sa pag-ultanan kan Israel asin mga Amorita.+
15 Padagos na nagserbi bilang hukom kan Israel si Samuel sa bilog na panahon na siya nabubuhay.+
16 Nagbabaklay siya taon-taon na linilibot an Bethel,+ Gilgal,+ asin Mizpa,+ asin sa gabos na lugar na ini siya nagserbi bilang hukom kan Israel.
17 Pero minabalik siya sa Rama+ huling yaon duman an harong niya, asin nagserbi man siya duman bilang hukom kan Israel. Nagtugdok siya duman nin altar para ki Jehova.+
