Bilang 1:1-54
1 Asin nakipag-ulay si Jehova ki Moises sa kaawagan nin Sinai,+ sa laog kan tolda nin pakipagtagbuan,*+ sa inot na aldaw kan ikaduwang bulan, kan ikaduwang taon pagkaluwas ninda sa daga nin Ehipto.+ Sinabi niya:
2 “Magsagibo kamo nin sensus+ kan bilog na katiripunan kan mga Israelita* paagi sa pagbilang kan lambang indibidwal sigun sa saindang mga pamilya saka sigun sa saindang mga angkan asin paagi sa paglista kan mga pangaran kan gabos na lalaki.
3 Irehistro nindo ni Aaron sigun sa saindang mga grupo* an gabos na 20 anyos pataas+ na puwedeng magin mga suldados kan Israel.
4 “Mag-iba kamo nin sarong lalaki hali sa kada tribo; an kada saro dapat na pamayo kan saiyang angkan.+
5 Ini an mga pangaran kan mga lalaki na maiba sa saindo: sa tribo ni Ruben, si Elizur+ na aki ni Sedeur;
6 sa tribo ni Simeon, si Selumiel+ na aki ni Zurisadai;
7 sa tribo ni Juda, si Nason+ na aki ni Aminadab;
8 sa tribo ni Isacar, si Netanel+ na aki ni Zuar;
9 sa tribo ni Zebulon, si Eliab+ na aki ni Helon;
10 sa mga aki ni Jose: sa tribo ni Efraim,+ si Elisama na aki ni Amihud; sa tribo ni Manases, si Gamaliel na aki ni Pedazur;
11 sa tribo ni Benjamin, si Abidan+ na aki ni Gideoni;
12 sa tribo ni Dan, si Ahiezer+ na aki ni Amisadai;
13 sa tribo ni Aser, si Pagiel+ na aki ni Ocran;
14 sa tribo ni Gad, si Eliasaf+ na aki ni Deuel;
15 sa tribo ni Neftali, si Ahira+ na aki ni Enan.
16 Sinda an mga ipinaapod hali sa katiripunan. Sinda an mga pamayo+ kan mga tribo kan saindang mga ama, an mga namamayo sa manangribo sa Israel.”+
17 Kaya iiniba ni Moises saka ni Aaron an mga lalaking iyan na pinili nin Diyos.
18 Tiniripon ninda an bilog na katiripunan kan inot na aldaw kan ikaduwang bulan, tanganing mairehistro an pangaran kan gabos na lalaki na 20 anyos pataas,+ sigun sa saindang pamilya, asin sigun sa saindang angkan,
19 arog kan ipinagbuot ni Jehova ki Moises. Kaya pigrehistro niya sinda duman sa kaawagan nin Sinai.+
20 Ilinista an mga pangaran kan mga aki ni Ruben, an mga naggikan sa panganay ni Israel,+ sigun sa saindang pamilya asin sigun sa saindang angkan. Saro-sarong binilang an gabos na lalaki na 20 anyos pataas na puwedeng magsuldados,
21 asin an bilang kan nairehistro sa tribo ni Ruben uminabot nin 46,500.
22 Ilinista an mga pangaran kan mga naggikan ki Simeon+ sigun sa saindang pamilya asin sigun sa saindang angkan. Saro-sarong binilang an gabos na lalaki na 20 anyos pataas na puwedeng magsuldados,
23 asin an bilang kan nairehistro sa tribo ni Simeon uminabot nin 59,300.
24 Ilinista an mga pangaran kan mga naggikan ki Gad+ sigun sa saindang pamilya asin sigun sa saindang angkan. Binilang an gabos na lalaki na 20 anyos pataas na puwedeng magsuldados,
25 asin an bilang kan nairehistro sa tribo ni Gad uminabot nin 45,650.
26 Ilinista an mga pangaran kan mga naggikan ki Juda+ sigun sa saindang pamilya asin sigun sa saindang angkan. Binilang an gabos na lalaki na 20 anyos pataas na puwedeng magsuldados,
27 asin an bilang kan nairehistro sa tribo ni Juda uminabot nin 74,600.
28 Ilinista an mga pangaran kan mga naggikan ki Isacar+ sigun sa saindang pamilya asin sigun sa saindang angkan. Binilang an gabos na lalaki na 20 anyos pataas na puwedeng magsuldados,
29 asin an bilang kan nairehistro sa tribo ni Isacar uminabot nin 54,400.
30 Ilinista an mga pangaran kan mga naggikan ki Zebulon+ sigun sa saindang pamilya asin sigun sa saindang angkan. Binilang an gabos na lalaki na 20 anyos pataas na puwedeng magsuldados,
31 asin an bilang kan nairehistro sa tribo ni Zebulon uminabot nin 57,400.
32 Ilinista an mga pangaran kan mga gikan ni Jose sa aki niyang si Efraim+ sigun sa saindang pamilya asin sigun sa saindang angkan. Binilang an gabos na lalaki na 20 anyos pataas na puwedeng magsuldados,
33 asin an bilang kan nairehistro sa tribo ni Efraim uminabot nin 40,500.
34 Ilinista an mga pangaran kan mga naggikan ki Manases+ sigun sa saindang pamilya asin sigun sa saindang angkan. Binilang an gabos na lalaki na 20 anyos pataas na puwedeng magsuldados,
35 asin an bilang kan nairehistro sa tribo ni Manases uminabot nin 32,200.
36 Ilinista an mga pangaran kan mga naggikan ki Benjamin+ sigun sa saindang pamilya asin sigun sa saindang angkan. Binilang an gabos na lalaki na 20 anyos pataas na puwedeng magsuldados,
37 asin an bilang kan nairehistro sa tribo ni Benjamin uminabot nin 35,400.
38 Ilinista an mga pangaran kan mga naggikan ki Dan+ sigun sa saindang pamilya asin sigun sa saindang angkan. Binilang an gabos na lalaki na 20 anyos pataas na puwedeng magsuldados,
39 asin an bilang kan nairehistro sa tribo ni Dan uminabot nin 62,700.
40 Ilinista an mga pangaran kan mga naggikan ki Aser+ sigun sa saindang pamilya asin sigun sa saindang angkan. Binilang an gabos na lalaki na 20 anyos pataas na puwedeng magsuldados,
41 asin an bilang kan nairehistro sa tribo ni Aser uminabot nin 41,500.
42 Ilinista an mga pangaran kan mga naggikan ki Neftali+ sigun sa saindang pamilya asin sigun sa saindang angkan. Binilang an gabos na lalaki na 20 anyos pataas na puwedeng magsuldados,
43 asin an bilang kan nairehistro sa tribo ni Neftali uminabot nin 53,400.
44 Sinda an mga irinehistro ni Moises asin ni Aaron saka kan 12 pamayo kan Israel, na an lambang saro nagrerepresentar sa saiyang angkan.
45 Irinehistro sigun sa saindang angkan an gabos na Israelita na 20 anyos pataas na puwedeng magsuldados sa Israel,
46 asin an total na bilang kan mga nairehistro uminabot nin 603,550.+
47 Alagad dai kaibang irinehistro an mga Levita+ sigun sa saindang mga angkan.+
48 Sinabihan ni Jehova si Moises:
49 “An tribo sana ni Levi an dai mo irehistro, asin dai mo ibali an bilang ninda sa bilang kan iba pang mga Israelita.+
50 Italaga mo an mga Levita na iyo an mag-asikaso sa tabernakulo kan Patotoo+ asin sa mga kagamitan kaiyan asin sa gabos na bagay na para diyan.+ Sinda an madara kan tabernakulo saka kan gabos na kagamitan kaiyan,+ asin maglilingkod sinda diyan,+ asin sa palibot kan tabernakulo sinda makampo.+
51 Kada ibabalyo an tabernakulo, an mga Levita an matarangkas kaiyan;+ asin pag papatindugon na giraray an tabernakulo, an mga Levita an mapatindog kaiyan; asin kun may magrani diyan na tawong bako man awtorisado,* an tawong iyan dapat na gadanon.+
52 “An lambang Israelita dapat na patindugon an saiyang tolda sa kampo na inasignar sa saiya, an lambang saro sigun sa kinabibilangan niyang dibisyon na kompuwesto nin tulong tribo,*+ sigun sa mga grupo* ninda.
53 Asin dapat na magkampo an mga Levita sa palibot kan tabernakulo kan Patotoo, tanganing an sakong kaanggutan* dai umabot sa katiripunan kan mga Israelita;+ asin an mga Levita an may paninimbagan sa pag-asikaso* sa tabernakulo kan Patotoo.”+
54 Ginibo kan banwaan nin Israel an gabos na ipinagbuot ni Jehova ki Moises. Iyo nanggad iyan an ginibo ninda.
Mga Nota
^ Sa literal, “mga aking lalaki ni Israel.”
^ Sa literal, “mga hukbo.”
^ Sa literal, “na estranghero,” an buot sabihon, bakong Levita.
^ O “sigun sa saiyang bandera.”
^ Sa literal, “mga hukbo.”
^ O “dagit.”
^ O “pagbantay; pag-utob kan saindang gibuhon na paglilingkod.”
