Bilang 29:1-40
29 “‘Asin sa inot na aldaw kan ikapitong bulan, magsagibo kamo nin banal na dakulang pagtiripon. Dai kamo maggibo nin ano man na magabat na trabaho.+ Patanugon nindo an trumpeta+ sa aldaw na iyan.
2 Mag-atang kamo nin mga dulot na pigtututong na an parong nakakapaginhawa* ki Jehova: sarong torilyong baka, sarong lalaking karnero, asin pitong lalaking kordero na pararehong sarong taon an edad, an gabos dapat na daing depekto.
3 Asin bilang dulot na tipasi na kaiba kan mga iyan, magdulot kamo nin pinong harina na sinalakan nin lana—tulong ikasampulong kabtang* kan sarong takad na epa para sa baka, duwang ikasampulong kabtang* nin sarong takad para sa lalaking karnero,
4 asin ikasampulong kabtang* nin sarong takad para sa kada saro kan pitong lalaking kordero.
5 Mag-atang man kamo nin sarong ugbon na lalaking kanding bilang dulot para sa kasalan tanganing mabayadan an mga kasalan nindo.
6 Iaatang an mga iyan apuwera pa kan dulot na pigtututong na inaatang kada bulan saka kan dulot na tipasi na kaiba kaiyan+ asin kan dulot na pigtututong na regular na idinudulot saka kan dulot na tipasi na kaiba kaiyan,+ kasabay an mga dulot na inumon na kaiba kan mga iyan.+ Idudulot an mga iyan uyon sa sinusunod na pamamaagi sa pag-atang kan mga iyan; iyan dulot na pinaagi sa kalayo na an parong nakakapaginhawa* ki Jehova.
7 “‘Asin sa ikasampulong aldaw kan ikapitong bulan, magsagibo kamo nin banal na dakulang pagtiripon,+ asin dapat nindong pasakitan an saindong sadiri.* Dai kamo maggibo nin ano man na trabaho.+
8 Asin mag-atang kamo nin mga dulot na pigtututong na an parong nakakapaginhawa* ki Jehova: sarong torilyong baka, sarong lalaking karnero, asin pitong lalaking kordero na pararehong sarong taon an edad, an gabos dapat na daing depekto.+
9 Asin bilang dulot na tipasi na kaiba kan mga iyan, magdulot kamo nin pinong harina na sinalakan nin lana—tulong ikasampulong kabtang nin sarong takad para sa baka, duwang ikasampulong kabtang nin sarong takad para sa lalaking karnero,
10 asin ikasampulong kabtang nin sarong takad para sa kada saro kan pitong lalaking kordero.
11 Mag-atang man kamo nin sarong ugbon na kanding bilang dulot para sa kasalan, apuwera pa kan dulot para sa kasalan bilang pambayad sa kasalan+ asin kan dulot na pigtututong na regular na idinudulot asin kan dulot na tipasi na kaiba kaiyan. Idudulot an mga iyan kasabay an mga dulot na inumon na kaiba kan mga iyan.
12 “‘Asin sa ika-15 aldaw kan ikapitong bulan, magsagibo kamo nin banal na dakulang pagtiripon. Dai kamo maggibo nin ano man na magabat na trabaho, asin pitong aldaw kamong magselebrar nin kapiyestahan para ki Jehova.+
13 Asin mag-atang kamo nin mga dulot na pigtututong,+ dulot na pinaagi sa kalayo na an parong nakakapaginhawa* ki Jehova: 13 torilyong baka, 2 lalaking karnero, asin 14 lalaking kordero na pararehong sarong taon an edad, an gabos dapat na daing depekto.+
14 Asin bilang dulot na tipasi na kaiba kan mga iyan, magdulot kamo nin pinong harina na sinalakan nin lana—tulong ikasampulong kabtang nin sarong takad para sa kada saro kan 13 baka, duwang ikasampulong kabtang nin sarong takad para sa kada saro kan 2 lalaking karnero,
15 asin ikasampulong kabtang nin sarong takad para sa kada saro kan 14 lalaking kordero.
16 Mag-atang man kamo nin sarong ugbon na kanding bilang dulot para sa kasalan, apuwera pa kan dulot na pigtututong na regular na idinudulot asin kan dulot na tipasi saka kan dulot na inumon na kaiba kaiyan.+
17 “‘Asin sa ikaduwang aldaw, mag-atang kamo nin 12 torilyong baka, 2 lalaking karnero, asin 14 lalaking kordero na pararehong sarong taon an edad, an gabos dapat na daing depekto,+
18 asin idulot man nindo an dulot na tipasi saka an mga dulot na inumon na idinudulot kaiba kan mga baka, kan mga lalaking karnero, asin kan mga lalaking kordero sigun sa bilang kan mga iyan uyon sa sinusunod na pamamaagi.
19 Mag-atang man kamo nin sarong ugbon na kanding bilang dulot para sa kasalan, apuwera pa kan dulot na pigtututong na regular na idinudulot asin kan dulot na tipasi na kaiba kaiyan. Idudulot an mga iyan kasabay an mga dulot na inumon na kaiba kan mga iyan.+
20 “‘Asin sa ikatulong aldaw, mag-atang kamo nin 11 baka, 2 lalaking karnero, asin 14 lalaking kordero na pararehong sarong taon an edad, an gabos dapat na daing depekto,+
21 asin idulot man nindo an dulot na tipasi saka an mga dulot na inumon na idinudulot kaiba kan mga baka, kan mga lalaking karnero, asin kan mga lalaking kordero sigun sa bilang kan mga iyan uyon sa sinusunod na pamamaagi.
22 Mag-atang man kamo nin sarong kanding bilang dulot para sa kasalan, apuwera pa kan dulot na pigtututong na regular na idinudulot asin kan dulot na tipasi saka kan dulot na inumon na kaiba kaiyan.+
23 “‘Asin sa ikaapat na aldaw, mag-atang kamo nin 10 baka, 2 lalaking karnero, asin 14 lalaking kordero na pararehong sarong taon an edad, an gabos dapat na daing depekto,+
24 asin idulot man nindo an dulot na tipasi saka an mga dulot na inumon na idinudulot kaiba kan mga baka, kan mga lalaking karnero, asin kan mga lalaking kordero sigun sa bilang kan mga iyan uyon sa sinusunod na pamamaagi.
25 Mag-atang man kamo nin sarong ugbon na kanding bilang dulot para sa kasalan, apuwera pa kan dulot na pigtututong na regular na idinudulot asin kan dulot na tipasi saka kan dulot na inumon na kaiba kaiyan.+
26 “‘Asin sa ikalimang aldaw, mag-atang kamo nin 9 na baka, 2 lalaking karnero, asin 14 lalaking kordero na pararehong sarong taon an edad, an gabos dapat na daing depekto,+
27 asin idulot man nindo an dulot na tipasi saka an mga dulot na inumon na idinudulot kaiba kan mga baka, kan mga lalaking karnero, asin kan mga lalaking kordero sigun sa bilang kan mga iyan uyon sa sinusunod na pamamaagi.
28 Mag-atang man kamo nin sarong kanding bilang dulot para sa kasalan, apuwera pa kan dulot na pigtututong na regular na idinudulot asin kan dulot na tipasi saka kan dulot na inumon na kaiba kaiyan.+
29 “‘Asin sa ikaanom na aldaw, mag-atang kamo nin 8 baka, 2 lalaking karnero, asin 14 lalaking kordero na pararehong sarong taon an edad, an gabos dapat na daing depekto,+
30 asin idulot man nindo an dulot na tipasi saka an mga dulot na inumon na idinudulot kaiba kan mga baka, kan mga lalaking karnero, asin kan mga lalaking kordero sigun sa bilang kan mga iyan uyon sa sinusunod na pamamaagi.
31 Mag-atang man kamo nin sarong kanding bilang dulot para sa kasalan, apuwera pa kan dulot na pigtututong na regular na idinudulot asin kan dulot na tipasi saka kan mga dulot na inumon na kaiba kaiyan.+
32 “‘Asin sa ikapitong aldaw, mag-atang kamo nin 7 baka, 2 lalaking karnero, asin 14 lalaking kordero na pararehong sarong taon an edad, an gabos dapat na daing depekto,+
33 asin idulot man nindo an dulot na tipasi saka an mga dulot na inumon na idinudulot kaiba kan mga baka, kan mga lalaking karnero, asin kan mga lalaking kordero sigun sa bilang kan mga iyan uyon sa sinusunod na pamamaagi.
34 Mag-atang man kamo nin sarong kanding bilang dulot para sa kasalan, apuwera pa kan dulot na pigtututong na regular na idinudulot asin kan dulot na tipasi saka kan dulot na inumon na kaiba kaiyan.+
35 “‘Sa ikawalong aldaw, magsagibo kamo nin sagradong pagtiripon. Dai kamo maggibo nin ano man na magabat na trabaho.+
36 Mag-atang kamo nin mga dulot na pigtututong, dulot na pinaagi sa kalayo na an parong nakakapaginhawa* ki Jehova: sarong baka, sarong lalaking karnero, asin pitong lalaking kordero na pararehong sarong taon an edad, an gabos dapat na daing depekto.+
37 Asin idulot man nindo an dulot na tipasi saka an mga dulot na inumon na idinudulot kaiba kan baka, kan lalaking karnero, asin kan mga lalaking kordero sigun sa bilang kan mga iyan uyon sa sinusunod na pamamaagi.
38 Mag-atang man kamo nin sarong kanding bilang dulot para sa kasalan, apuwera pa kan dulot na pigtututong na regular na idinudulot asin kan dulot na tipasi saka kan dulot na inumon na kaiba kaiyan.+
39 “‘Iyan an mga iaatang nindo ki Jehova sa saindong mga kapiyestahan,+ apuwera pa kan saindong mga dulot para sa promesa+ asin kan saindong mga gikan-sa-buot na dulot+ bilang saindong mga dulot na pigtututong+ asin kan saindong mga dulot na tipasi+ asin kan saindong mga dulot na inumon+ asin kan saindong mga atang sa pakikikabtang.’”+
40 Sinabi ni Moises sa mga Israelita an gabos na ipinagbuot sa saiya ni Jehova.
Mga Nota
^ O “nakakapaugma.” Sa literal, “nakakapakalma.”
^ O “3⁄10.”
^ O “2⁄10.”
^ O “1⁄10.”
^ O “nakakapaugma.” Sa literal, “nakakapakalma.”
^ O “kalag.” Sa pangkagabsan, an “pagpasakit sa sadiri” ipinapanungod sa manlain-lain na klase nin pagpainda sa sadiri, kaiba na an pag-ayuno.
^ O “nakakapaugma.” Sa literal, “nakakapakalma.”
^ O “nakakapaugma.” Sa literal, “nakakapakalma.”
^ O “nakakapaugma.” Sa literal, “nakakapakalma.”
