Bilang 36:1-13
-
Katugunan dapit sa pag-agom kan mga babaying tagapagmana (1-13)
36 An mga pamayo kan mga pamilya kan mga naggikan ki Gilead na aki ni Makir+ na aki ni Manases na gikan sa mga pamilya kan mga aki ni Jose nagdulok asin nakipag-ulay ki Moises asin sa mga pamayo kan mga Israelita.
2 Sinabi ninda: “Pinagbutan ni Jehova an kagurangnan ko na banga-bangaon an daga paagi sa burunutan+ tanganing magin mana kan mga Israelita; asin pinagbutan man ni Jehova an kagurangnan ko na itao an mana kan tugang ming si Zelofehad sa mga aki niyang babayi.+
3 Kun magpaagom sinda sa mga lalaki hali sa ibang tribo nin Israel, mawawara man sa mana kan samong mga ama an mana kan mga babayi asin maidadagdag iyan sa mana kan tribo na kabibilangan na ninda, kaya mawawara iyan sa manang napasamo paagi sa burunutan.
4 Pag nag-abot an taon nin Jubileo+ para sa banwaan nin Israel, an mana kan mga babayi permanente nang idadagdag sa mana kan tribo na kinabilangan na ninda, kaya an saindang mana mawawara na sa mana kan tribo kan samuyang mga ama.”
5 Dangan pinagbutan ni Moises an mga Israelita suno sa pagbuot ni Jehova: “Tama an sinasabi kan tribo kan mga aki ni Jose.
6 Ini an ipinagbuot ni Jehova para sa mga aking babayi ni Zelofehad: ‘Puwede sindang magpaagom sa kiisay man na gusto ninda. Pero, dapat na hali sa pamilya kan tribo kan saindang ama an magin agom ninda.
7 An mana kan mga Israelita dai dapat magpaburubalyo sa mga tribo, huling dapat na papagdanayon kan mga Israelita an mana sa tribo kan saindang mga apuon.
8 Asin an lambang aking babayi na kagsadiri nin mana sa sarong tribo nin Israel dapat na magin agom nin saro na naggikan sa tribo kan saiyang ama,+ tanganing magdanay na sadiri kan mga Israelita an mana kan saindang mga apuon.
9 An mana dai dapat magpaburubalyo sa mga tribo, huling dapat na papagdanayon kan mga tribo nin Israel an sadiri nindang mana.’”
10 Ginibo kan mga aking babayi ni Zelofehad an ipinagbuot ni Jehova ki Moises.+
11 Kaya si Mala, Tirza, Hogla, Milca, asin Noa, an mga aking babayi ni Zelofehad,+ nagpaagom sa mga aki kan mga tugang na lalaki kan saindang ama.
12 Nagin mga agom sinda nin mga lalaki na gikan sa mga pamilya ni Manases na aki ni Jose tanganing an mana ninda magdanay sa tribo kan pamilya kan saindang ama.
13 Iyan an mga tugon asin an mga ipapautob na desisyon* na itinao ni Jehova sa mga Israelita paagi ki Moises sa disyertong kapatagan kan Moab harani sa Jordan, sa kahampang kan Jerico.+
Mga Nota
^ O “mga hudisyal na desisyon.”
