Hukom 1:1-36
1 Pagkagadan ni Josue,+ naghapot an mga Israelita* ki Jehova:+ “Siisay sa samo an maiinot na makipaglaban sa mga Canaanita?”
2 Nagsimbag si Jehova: “An Juda an maiinot.+ Itinatao* ko sa sainda an kadagaan.”
3 Dangan an tribo ni Juda nagsabi sa tribo ni Simeon na saindang mga tugang: “Mag-iba kamo samo sa itinao samong teritoryo,*+ asin makipaglaban kita sa mga Canaanita. Pagkatapos, maiba kami saindo sa teritoryong itinao saindo para tabangan kamo.” Kaya nag-iba sa sainda an tribo ni Simeon.
4 Kan magsalakay an Juda, itinao ni Jehova sa saindang mga kamot an mga Canaanita saka an mga Perizita,+ asin nadaog ninda an 10,000 na lalaki sa Bezek.
5 Nahiling ninda si Adoni-bezek sa Bezek, asin nakipaglaban sinda sa saiya duman, asin nadaog ninda an mga Canaanita+ saka an mga Perizita.+
6 Kan magdulag si Adoni-bezek, linapag ninda siya asin nadakop siya. Pagkatapos, pinutol ninda an mga tanggurangan niya sa kamot saka sa bitis.
7 Nagsabi si Adoni-bezek: “May 70 hadi na pinutulan nin mga tanggurangan sa kamot saka bitis na namumurot nin kakanon sa irarom kan sakong lamesa. Kun ano su piggibo ko, iyo man an ibinalos sako nin Diyos.” Pagkatapos kaiyan, dinara ninda siya sa Jerusalem,+ asin nagadan siya duman.
8 Apuwera kaiyan, an mga lalaki kan Juda nakipaglaban sa Jerusalem+ asin nasakop ninda iyan; ginaradan ninda an mga tawo diyan paagi sa espada asin sinulo ninda an siyudad.
9 Pagkatapos, an mga lalaki kan Juda nakipaglaban sa mga Canaanita na nakaistar sa kabukidan asin sa Negeb saka sa Sefela.+
10 Sinalakay kan Juda an mga Canaanita na nakaistar sa Hebron (Kiriat-arba an dating pangaran kan Hebron), asin dinaog ninda si Sesai, Ahiman, asin Talmai.+
11 Hali duman, nagpasiring sinda sa Debir+ para makipaglaban sa mga nakaistar duman. (Kiriat-sefer an dating pangaran kan Debir.)+
12 Dangan nagsabi si Caleb:+ “Ipapaagom ko an aki kong si Acsa sa siisay man na lalaki na makakadaog saka makakasakop sa Kiriat-sefer.”+
13 Asin nasakop iyan ni Otniel+ na aki ni Kenaz,+ na nguhod na tugang ni Caleb. Kaya ipinaagom niya sa saiya an aki niyang si Acsa.
14 Mantang pasiring na si Acsa sa harong kan saiyang agom, pigpaparapirit niya ini na maghagad sa ama niya nin daga. Dangan buminaba si Acsa sa nasasakayan niyang asno.* Hinapot siya ni Caleb: “Anong gusto mo?”
15 Nagsimbag siya sa saiya: “Bendisyunan mo tabi ako. Itao mo man tabi sako an Gulot-maim,* ta an itinao mo sakong daga yaon sa timog.”* Kaya itinao sa saiya ni Caleb an Itaas na Gulot asin an Ibabang Gulot.
16 Asin hali sa siyudad nin mga puon nin palma,+ an mga gikan kan Kenitang+ panugangan ni Moises+ kaiba an mga hali sa tribo ni Juda nagpasiring sa kaawagan nin Juda na nasa timog kan Arad.+ Nagduman sinda asin nag-istar kaiba kan mga taga duman.+
17 Pero nagpadagos an tribo ni Juda kaiba an tribo ni Simeon na mga tugang ninda, asin sinalakay ninda an mga Canaanitang nakaistar sa Zefat asin linaglag iyan.+ Kaya pinangaranan nindang Horma*+ an siyudad.
18 Tapos sinakop kan Juda an Gaza+ saka an teritoryo kaiyan, an Askelon+ saka an teritoryo kaiyan, asin an Ekron+ saka an teritoryo kaiyan.
19 Nasa kaibanan kan Juda si Jehova, asin nagin pagsadiri ninda an kabukidan, pero dai ninda napalayas an mga nakaistar sa kapatagan,* huling igwa an mga ini nin mga karwaheng panggiyera na may mga karit na lansang.*+
20 Itinao ninda an Hebron ki Caleb, arog kan ipinanuga ni Moises,+ asin pinalayas niya duman an tulong aki ni Anak.+
21 Pero dai pinalayas kan mga Benjaminita an mga Jebusitang nakaistar sa Jerusalem, kaya padagos na nag-istar sa Jerusalem an mga Jebusita kaiba kan mga Benjaminita sagkod sa aldaw na ini.+
22 Kan panahon man na iyan, nagtukad an mga gikan* ni Jose+ para salakayon an Bethel, asin nasa kaibanan ninda si Jehova.+
23 Nag-espiya an mga gikan ni Jose sa Bethel (Luz+ an dating pangaran kan siyudad),
24 asin mantang nag-eespiya, may nahiling sindang sarong lalaki na paluwas sa siyudad. Kaya sinabihan ninda siya: “Itukdo mo tabi samo kun sain an agihan palaog sa siyudad, asin dai mi ika aanuhon.”*
25 Kaya itinukdo sa sainda kan lalaki an agihan palaog sa siyudad, asin ginaradan ninda an mga tawo duman paagi sa espada, pero pinabayaan nindang makahali an lalaki saka an bilog na pamilya kaini.+
26 Nagduman an lalaki sa daga kan mga Hiteo. Nagtugdok siya duman nin siyudad asin pinangaranan niya iyan na Luz, na iyo an pangaran kaiyan sagkod sa aldaw na ini.
27 Dai sinakop kan tribo ni Manases an Bet-sean saka an nakapalibot na mga banwa diyan,* an Taanac+ saka an nakapalibot na mga banwa diyan, an Dor saka an nakapalibot na mga banwa diyan, an Ibleam saka an nakapalibot na mga banwa diyan, asin an Megido saka an nakapalibot na mga banwa diyan.+ Nakipagtagasan an mga Canaanita asin padagos na nag-istar sa mga lugar na iyan.
28 Kan nagin nang makusog an Israel, puwersahan nindang pinapagtrabaho an mga Canaanita,+ imbes na palayason sinda gabos.+
29 Dai man pinalayas kan tribo ni Efraim an mga Canaanita na nakaistar sa Gezer. An mga Canaanita padagos na nag-istar kaiba ninda sa Gezer.+
30 Dai pinalayas kan tribo ni Zebulon an mga nakaistar sa Kitron saka an mga nakaistar sa Nahalol.+ An mga Canaanita padagos na nag-istar kaiba ninda asin puwersahan na pinapagtrabaho.+
31 Dai pinalayas kan tribo ni Aser an mga nakaistar sa Aco saka an mga nakaistar sa Sidon,+ Alab, Aczib,+ Helba, Afik,+ asin Rehob.+
32 Kaya nag-istar an mga gikan ni Aser kaiba kan mga Canaanita na nakaistar sa mga lugar na iyan, huling dai ninda sinda pinalayas.
33 Dai pinalayas kan tribo ni Neftali an mga nakaistar sa Bet-semes saka an mga nakaistar sa Bet-anat,+ imbes nag-istar sinda kaiba kan mga Canaanita na nakaistar sa mga lugar na iyan.+ Puwersahan nindang pinapagtrabaho an mga nakaistar sa Bet-semes asin Bet-anat para sa sainda.
34 Dai nagtugot an mga Amorita na mag-istar sa kapatagan* an mga gikan ni Dan, kaya napiritan sindang sa kabukidan na lang mag-istar.+
35 Nakipagtagasan an mga Amorita asin padagos na nag-istar sa Bukid nin Heres, sa Aijalon,+ asin sa Saalbim.+ Pero kan nagin nang makusog an mga gikan ni Jose,* puwersahan ninda sindang pinapagtrabaho nin magabat.
36 An teritoryo kan mga Amorita nagpuon sa bakilid nin Akrabim+ asin sa Sela patukad.
Mga Nota
^ Sa literal, “mga aking lalaki ni Israel.”
^ O “Itinao.”
^ O “sa teritoryong itinao samo paagi sa burunutan.”
^ O posibleng “puminalakpak si Acsa mantang nakasakay sa asno.”
^ Nangangahulugan na “Mga Lugar na Matubig.”
^ O “sa Negeb.” Alang an kadagaan sa timog.
^ Nangangahulugan na “Pagtagama sa Kalaglagan.”
^ Sa literal, “mga karwaheng lansang.”
^ O “hababang kapatagan.”
^ Sa literal, “an harong.”
^ Sa literal, “asin papahilingan mi ika nin maimbod na pagkamuot.”
^ O “an mga banwa na nakadepende diyan.”
^ O “hababang kapatagan.”
^ Sa literal, “kan nagin nang magabat an kamot kan harong ni Jose.”
