Hukom 21:1-25
-
Ilinigtas an tribo ni Benjamin (1-25)
21 Dangan nagsumpa an mga lalaki kan Israel duman sa Mizpa:+ “Mayo ni saro sa sato an mapaagom kan saiyang aking babayi sa kiisay man na lalaki na hali sa Benjamin.”+
2 Huli kaini, nagpasiring an banwaan sa Bethel+ asin nagtukaw sinda duman sa atubangan kan tunay na Diyos sagkod sa banggi. Nagkurahaw sinda asin nagtangis nin grabe.
3 Asin nagsasarabi sinda: “O Jehova na Diyos kan Israel, taano ta nangyari ini sa Israel? Ano ta kaipuhan na mawara ngunyan an sarong tribo sa Israel?”
4 Kan suminunod na aldaw, amay na nagbangon an banwaan asin naggibo sinda duman nin altar para mag-atang nin mga dulot na pigtututong saka nin mga dulot sa pakikikabtang.+
5 Dangan sinabi kan banwaan nin Israel: “Siisay sa gabos na tribo kan Israel an dai uminiba sa sato kan magtiripon kita sa atubangan ni Jehova duman sa Mizpa?” Nagsumpa kaya sinda na an siisay man na dai magduman sa atubangan ni Jehova sa Mizpa dapat nanggad na gadanon.
6 Kaya namundo an banwaan nin Israel dahil sa nangyari sa mga tugang nindang Benjaminita. Nagsabi sinda: “Sarong tribo an nawara ngunyan sa Israel.
7 Ano an dapat tang gibuhon para matawan nin mga agom an mga nagkatarada, ngunyan na nagsumpa kita sa ngaran ni Jehova+ na dai ta ipapaagom sa sainda an siisay man sa satong mga aking babayi?”+
8 Naghapot sinda: “Siisay sa mga tribo kan Israel an dai nagduman sa atubangan ni Jehova sa Mizpa?”+ Asin naaraman ninda na mayo nin taga Jabes-gilead na nagduman sa kampo kun sain nagtiripon an banwaan.*
9 Kan bilangon kaya an banwaan, nahiling ninda na mayo duman nin taga Jabes-gilead.
10 Kaya ipinadara duman kan katiripunan an 12,000 sa pinakamakukusog na lalaki. Sinugo ninda sinda: “Gadanon nindo an mga nakaistar sa Jabes-gilead paagi sa espada, pati an mga babayi saka mga aki.+
11 Ini an dapat nindong gibuhon: Gadanon nindo an gabos na lalaki, asin gadanon man nindo an gabos na babayi na nakidurog na sa lalaki.”
12 Sa mga taga Jabes-gilead, nakakua sinda nin 400 na daraga na dai pa nakikidurog sa lalaki. Kaya dinara ninda sinda sa kampo sa Shilo,+ na nasa daga nin Canaan.
13 Dangan, an bilog na katiripunan nagpadara nin mensahe sa mga Benjaminita na nasa bukid nin Rimon+ asin nakipagkatuninungan sa sainda.
14 Kaya buminalik an mga Benjaminita sa saindang daga kan panahon na idto. Asin itinao sa sainda kan mga Israelita an mga babayi kan Jabes-gilead na dai ninda ginadan,+ pero kulang an mga babaying nakua ninda para sa mga Benjaminita.
15 Asin namundo an banwaan sa nangyari sa Benjamin+ huli ta isinuway sinda ni Jehova sa iba pang mga tribo kan Israel.
16 Nagsabi an kamagurangan kan katiripunan: “Ano an dapat tang gibuhon para matawan nin agom an mga natatada pang lalaki, ta ginadan na an gabos na babayi sa Benjamin?”
17 Nagsimbag sinda: “Dai dapat mawaran nin mana an nagkatarada sa Benjamin, tanganing dai mawaran nin sarong tribo an Israel.
18 Pero dai ta puwedeng ipaagom sa sainda an satong mga aking babayi, huli ta nagsumpa an banwaan nin Israel: ‘Sumpaon an saro na magtao nin agom sa Benjamin.’”+
19 Dangan sinabi ninda: “Igwa nin kapiyestahan para ki Jehova na ginigibo taon-taon duman sa Shilo,+ na nasa norte kan Bethel asin sirangan kan tinampong hali sa Bethel patukad sa Sekem asin nasa timog kan Lebona.”
20 Kaya pinagbutan ninda an mga lalaki kan Benjamin: “Magduman kamo. Mag-abang kamo saka magtago sa mga ubasan.
21 Asin pag nahiling nindo na paluwas na an mga hoben na babayi* kan Shilo tanganing umiba sa saindang mga bayleng paitok, dapat na lumuwas an kada saro sa saindo sa mga ubasan asin kumua nin magigin agom sa mga hoben na babayi kan Shilo, tapos bumalik na kamo sa daga nin Benjamin.
22 Asin pag nagreklamo an mga ama ninda o an saindang mga tugang na lalaki laban sa samo, sasabihon mi sa sainda, ‘Intindihon na lang tabi nindo kami alang-alang sa sainda, ta dai mi kaya matawan nin agom an kada saro sa sainda paagi sa giyera+ asin dai man nindo puwedeng ipaagom sa sainda an saindong mga aking babayi ta magkakasala kamo.’”+
23 Kaya iyo iyan an ginibo kan mga Benjaminita. Kuminua an kada saro sa sainda nin agom hali sa mga babayi na nagbabarayle. Pagkatapos, nagbalik na sinda sa daga na saindang mana asin itinugdok giraray an saindang mga siyudad+ asin nag-istar sa mga iyan.
24 Asin kan panahon na idto, nagsuruwayan na an mga Israelita hali duman, an kada saro nagpasiring na sa saiyang tribo asin sa saiyang pamilya. Hali duman, nagpasiring na an kada saro sa saiyang mana.
25 Kan panahon na idto, mayo nin hadi sa Israel.+ Ginigibo kan kada saro kun ano an tama sa paghiling niya.*
Mga Nota
^ O “kongregasyon.”
^ Sa literal, “an mga aking babayi.”
^ O “kun ano an pighuhuna niyang tama.”
