Isaias 16:1-14
-
Pagpapadagos kan mensahe laban sa Moab (1-14)
16 Magpadara kamo nin sarong lalaking karnero sa tagapamahala kan nasyon,Hali sa Sela pabalyo sa kaawaganPasiring sa bukid kan aking babayi nin Sion.
2 Siring sa gamgam* na binugaw sa salagan kaiyan,+Magigin arog kaiyan an mga aking babayi kan Moab sa mga pigbabalyuhan na hababaw na parte kan Arnon.+
3 “Magtao kang suhestiyon, isagibo mo an desisyon.
Gibuhon mong magin siring sa banggi an anino mo sa kaudtuhan.
Itago mo an mga nagkasuruway-suway asin dai mo pagtrayduron an mga nagdudulag.
4 Lugod na an mga nagkasuruway-suway hali sa banwaan ko mag-istar sa saimo, O Moab.
Magin kang lugar na taguan para sa sainda laban sa paralaglag.+
An nang-aapi matatapos,An paglaglag mapupundo,Asin idtong mga nagtitimak-timak sa iba mapapara sa daga.
5 Dangan sarong trono an marigon na ieestablisar sa maimbod na pagkamuot.
Yaon iyan sa tolda ni David asin an saro na matukaw diyan magigin maimbod;+Mahusgar siya na mayong ipinapaurog asin marikas niyang ipapautob an katanusan.”+
6 Nadangog mi an manungod sa pagkaorgulyoso kan Moab—orgulyoso nanggad siya+—An saiyang kapalangkawan asin pagigin orgulyoso saka kabangisan;+Pero an saiyang mga tataramon na daing kamanungdanan mayong kaaabtan.
7 Kaya an Moab magtatangis para sa Moab;Gabos sinda magtatangis.+
Idtong mga hinampak maagrangay nin huli sa mga tinapay na gibo sa pasas kan Kir-hareset.+
8 Huli ta naalang an tanuman duman sa tangga-tanggang bakilid kan Hesbon,+Siring man an puon nin ubas nin Sibma,+Tinimak-timakan kan mga tagapamahala kan mga nasyon an mapulahon na mga sanga kaiyan;*Nakaabot an mga iyan sagkod sa Jazer;+Nagkanap an mga iyan sagkod sa kaawagan.
Naglakop an mga saringsing kaiyan asin nakaantos sagkod sa dagat.
9 Iyan an dahilan kaya tatangisan ko an puon nin ubas kan Sibma arog kan pagtangis ko para sa Jazer.
Babasaon ko kamo kan sakong mga luha, O Hesbon asin Eleale,+Huling natapos na an pagkurahaw para sa saindong mga prutas sa tig-init asin para sa saindong pag-ani.*
10 An paggaya-gaya asin kaugmahan hinali na sa tatamnan,Asin mayo nin mga kanta nin kaugmahan o pagkurahaw sa mga ubasan.+
An mga paratimak nin ubas sa mga pugaan ipinundo na an pagtimak ninda,Huling an pagkurahaw pinapundo ko na.+
11 Iyan an dahilan kaya sa kalaog-laugi ko nariribok ako huli sa Moab,+Siring sa mga kuwerdas kan arpa na pigkakabray,Asin nariribok an kalaog-laugi kong pagkatawo huli sa Kir-hareset.+
12 Dawa pa pinapagal kan Moab an sadiri niya sa ibabaw kan halangkaw na lugar asin nagpapasiring sa santuwaryo niya para mamibi, mayo siyang mahahaman na ano man.+
13 Iyan an mga sinabi kaidto ni Jehova manungod sa Moab.
14 Asin ngunyan sinasabi ni Jehova: “Sa laog nin tulong taon, siring sa mga taon nin sarong tangdanan na trabahador,* an kamurawayan kan Moab ipapasupog asin magkakaigwa nin gabos na klase nin grabeng kariribukan, asin an matatada sa saiya diiton sana tapos su mga maluya pa.”+
Mga Nota
^ O “bayong.”
^ O “an mga sanga kaiyan na kadakul nin rawog nin pulang ubas.”
^ O posibleng “Huling an kurahaw para sa pakikipaglaban buminaba na sa saindong mga prutas sa tig-init asin sa saindong pag-ani.”
^ O “na binilang nin maingat arog kan ginigibo nin sarong tangdanan na trabahador”; an buot sabihon, sa laog nin eksaktong tulong taon.
