Isaias 59:1-21
59 Uya! An kamot ni Jehova bakong haliputon para dai makapagligtas,+Asin an talinga niya bakong maluyahon* para dai makadangog.+
2 Dai, kundi dahil sa mga pagkakasala nindo kaya napasuway kamo sa saindong Diyos.+
An mga kasalan nindo an dahilan kaya itinago niya sa saindo an saiyang lalawgon,Asin habo niya kamong dangugon.+
3 Huli ta an saindong mga palad naramugan nin dugo+Asin an saindong mga muro naramugan nin pagkakasala.
An saindong mga ngabil nagtataram nin mga kaputikan,+ asin an saindong dila naggugumod-gumod nin bakong matanos.
4 Mayo nin siisay man na nangangapudan para sa katanusan,+Asin mayo nin siisay man na minaduman sa husgado an nagsasabi nin totoo.
Nagtitiwala sinda sa daing serbi*+ asin nagtataram nin daing kamanungdanan.
Nangingidam sinda nin kariribukan asin nangangaki nin bagay na nakakadanyar.+
5 Hinihimsa ninda an mga sugok* nin makamandag na halas,Asin pighahabol ninda an harong nin lawa.+
An siisay man na nagkakakan kan mga sugok ninda magagadan,Asin an sugok na napasa nagpapaluwas nin rimuranon.
6 An saindang harong nin lawa dai puwedeng magin bado,Ni maipapantahob man ninda sa sadiri ninda an saindang ginigibo.+
An saindang mga gibo nakakaraot,Asin mga gibo nin kadahasan an nasa saindang mga kamot.+
7 An saindang mga bitis minadalagan tanganing gumibo nin karatan,Asin naghihidali sinda sa paggadan* nin saro na daing sála.+
An saindang mga kaisipan nakakadanyar na mga kaisipan;An kapahamakan asin pagsakit yaon sa saindang mga dalan.+
8 Dai ninda aram an dalan nin katuninungan,Asin mayo nin hustisya sa saindang mga agihan.+
Ginigibo nindang tiko an saindang mga dalan;Mayo nin siisay man na naglalakaw sa mga iyan an makakaaram nin katuninungan.+
9 Iyan an dahilan kaya an hustisya harayo sa samuya,Asin an katanusan dai nakakaabot sa samuya.
Padagos kaming naglalaom para sa liwanag, pero uya! igwang kadikluman;Para sa kaliwanagan, pero padagos kaming naglalakaw sa kalumluman.+
10 Nagkakapkap kami sa lanob na garo mga buta;Padagos kaming nagkakapkap na garo mga mayo nin mata.+
Nasisingkog kami sa kaudtuhan na garo kan sa pabanggi na;Sa tahaw kan mga makusog garo man sana kami mga gadan.
11 Gabos kami padagos na nagngangarob na siring sa mga osoAsin nagkukurukutok kami na may grabeng pagmundo na siring sa mga salampati.
Padagos kaming naglalaom nin hustisya, pero mayo;Nin kaligtasan, pero harayo iyan sa samo.
12 Huling kadakul kan ginibo ming pagrebelde sa atubangan mo;+An kada saro sa mga kasalan niyamo minatestigo laban sa samo.+
Aram mi an mga ginibo ming pagrebelde;Aram na aram mi an mga pagkakasala mi.+
13 Nakagibo kami nin paglapas asin isinikwal mi si Jehova;Tinalikdan niyamo an samuyang Diyos.
An pinag-ulayan mi pang-aapi asin pagrebelde;+Nagplano kami nin mga kaputikan asin naggumod-gumod nin putik na mga tataramon hali sa puso mi.+
14 An hustisya pinaatras,+Asin an katanusan nakatindog sa harayo;+Huling an katotoohan* natumba sa plasa,Asin an bagay na tanos dai makalaog.
15 Nawara an katotoohan,*+Asin sinasamsaman an siisay man na minatalikod sa karatan.
Nahiling iyan ni Jehova asin naanggot siya,*Huli ta mayo nin hustisya.+
16 Mayo siyang nahiling na siisay man,Asin nagngalas siya na mayo nin nangungultanan,Kaya an sadiri niyang takyag an nagtao nin kaligtasan,*Asin an sadiri niyang katanusan an nagsuportar sa saiya.
17 Dangan isinulot niya an katanusan nin siring sa gubing na metal*Asin isinulot niya an helmet nin kaligtasan* sa saiyang payo.+
Isinulot niya an mga gubing nin pamamalos bilang saiyang bado;+Asin ipinatos sa sadiri niya an kaigutan nin siring sa sarong gubing.*
18 Babaluson niya sinda huli sa ginibo ninda:+
Grabeng kaanggutan sa mga kaiwal niya, padusa sa mga kalaban niya.+
Asin babaluson niya an mga isla kan maninigo sa sainda.
19 Magkakaigwa sinda nin pagkatakot sa pangaran ni Jehova puon sa sulnupanAsin nin pagkatakot sa kamurawayan niya puon sa sirangan,Huling maabot siyang siring sa nagraragasang salog,Na pinapasulog kan espiritu ni Jehova.
20 “An Paratubos+ maabot sa Sion,+Sa mga gikan ni Jacob na minatalikod sa paglapas,”+ an sabi ni Jehova.
21 “Kun manungod sa sako, ini an tipan ko sa sainda,”+ an sabi ni Jehova. “An espiritu ko na yaon sa saimo asin an mga tataramon ko na ibinugtak ko sa saimong nguso—dai hahalion an mga iyan sa saimong nguso, sa nguso kan saimong mga aki,* o sa nguso kan saimong mga makuapo,”* an sabi ni Jehova, “puon ngunyan asin sagkod lamang.”
Mga Nota
^ Sa literal, “magabaton.”
^ O “sa bakong totoo; sa daing saysay.”
^ O “bunay.”
^ O “sa pagpabulos nin dugo.”
^ O “pagkaonesto.”
^ O “pagkaonesto.”
^ Sa literal, “asin maraot iyan sa saiyang mga mata.”
^ O “nagtao sa saiya nin kapangganahan.”
^ O “sa pang-ibabaw na bado na daing manggas.”
^ O “kapangganahan.”
^ O “sa kutamaya.”
^ Sa literal, “saimong banhi.”
^ Sa literal, “kan banhi kan saimong banhi.”
