Jeremias 11:1-23
11 Ini an tataramon na uminabot ki Jeremias hali ki Jehova:
2 “Danguga nindo an mga tataramon kan tipan na ini, O banwaan!
“Ipahayag mo* iyan sa mga taga Juda asin sa mga nag-iistar sa Jerusalem
3 asin sabihon mo sa sainda, ‘Ini an sabi ni Jehova na Diyos kan Israel: “Sumpaon an tawong dai nagsusunod sa mga tataramon kan tipan na ini,+
4 na ipinagbuot ko sa saindong mga apuon kan aldaw na iluwas ko sinda sa daga nin Ehipto,+ hali sa hurnong pigtutunawan nin lansang,+ na sinasabi, ‘Sunudon nindo an boses ko, asin gibuhon an gabos na bagay na ipinagbubuot ko sa saindo; asin kamo magigin sakuyang banwaan asin ako magigin saindong Diyos,+
5 tanganing mautob ko an isinumpa ko sa saindong mga apuon, na itatao ko sa sainda an daga na nagbubulos nin gatas saka tangguli,*+ arog kan sa aldaw na ini.’”’”
Asin nagsimbag ako: “Amen,* O Jehova.”
6 Dangan sinabi ni Jehova sa sako: “Ibalangibog mo an gabos na tataramon na ini sa mga siyudad kan Juda asin sa mga tinampo kan Jerusalem: ‘Danguga nindo an mga tataramon kan tipan na ini, asin isagibo nindo an mga iyan.
7 Huling seryoso kong sinadol an saindong mga apuon puon kan aldaw na iluwas ko sinda sa daga nin Ehipto sagkod sa aldaw na ini, na sinasadol sinda nin pauruutro:* “Sunudon nindo an boses ko.”+
8 Pero dai sinda nagdangog o nagtaong atensiyon;* imbes, an kada saro sa sainda may katagasan an payong nagpadagos sa pagsunod sa sadiri niyang maraot na puso.+ Kaya ipinaabot ko laban sa sainda an gabos na tataramon kan tipan na ini na ipinagbuot kong gibuhon ninda asin na habo nindang isagibo.’”
9 Dangan sinabi ni Jehova sa sako: “May kurumplutan an mga taga Juda asin an mga nag-iistar sa Jerusalem.
10 Inutro ninda an mga salang ginibo kan saindang mga apuon kan suanoy, na mga habong magsunod sa mga tataramon ko.+ Nagsunod man sinda sa ibang mga diyos asin naglingkod sa mga iyan.+ Binalga kan nasyon* nin Israel asin kan nasyon* nin Juda an sakuyang tipan na ipinakipagtipan ko sa mga apuon ninda.+
11 Kaya ini an sabi ni Jehova, ‘Uya, mapaabot ako sa sainda nin kapahamakan+ na dai ninda madudulagan. Pag mag-apod sinda sa sakuya tanganing maghagad nin tabang, dai ko sinda dadangugon.+
12 Dangan an mga siyudad kan Juda asin an mga nag-iistar sa Jerusalem maduruman sa mga diyos na pigdudulutan ninda nin mga atang* asin mahagad nin tabang sa mga iyan,+ pero dai man sana sinda maililigtas kan mga iyan sa panahon kan saindang kapahamakan.
13 Huli ta an mga diyos mo, O Juda, nagin kasingdakul kan mga siyudad mo, asin para sa makasusupog na bagay* naggibo kamo nin mga altar na kasingdakul kan mga tinampo sa Jerusalem, mga altar para sa pag-atang ki Baal.’+
14 “Asin ika,* dai ka mamibi para sa banwaan na ini. Dai ka mag-agrangay para sa sainda o mamibi para sa sainda,+ ta dai ako magdadangog pag mag-apod sinda sa sako huli sa saindang kapahamakan.
15 Ano an deretso kan namumutan ko na maglaog sa harong koMantang kadakul kan nagsagibo nin maraot na mga pakana?
Pag mag-abot na sa saimo* an kapahamakan, malilikayan daw ninda iyan paagi sa banal na karne?*
Sa panahon na iyan, mag-uugma ka daw nin labi-labi?
16 Dati kang inapod ni Jehova na sarong marambong na puon nin olibo,Magayon asin may marahay na bunga.
Kasabay nin makusog na nag-aagabaab na tanog, sinulo niya siya,Asin binarari ninda an mga sanga kaiyan.
17 “Si Jehova na pamayo nin mga hukbo, an saimong Kagtanom,+ nagsabi na sarong kapahamakan an maabot sa saimo huli sa ginibong karatan kan nasyon nin Israel asin kan nasyon nin Juda, na nagpaanggot sa sako paagi sa pagdulot nin mga atang para ki Baal.”+
18 Sinabi ini sa sako ni Jehova tanganing maaraman ko;Kan panahon na iyan, ipinahiling mo sa sako an saindang piggigibo.
19 Siring ako sa sarong magarong kordero na dinadara sa bunuan.
Dai ko aram na nagpapakana sinda laban sa sakuya:+
“Rauton ta an puon saka an bunga kaiyan,Asin puhuon ta siya sa daga kan mga buhay,Tanganing an pangaran niya dai na magirumduman pa.”
20 Alagad ta si Jehova na pamayo nin mga hukbo naghuhusgar na may katanusan;Sinisiyasat niya an kauruiraruming mga kaisipan* asin an puso.+
Ipahiling mo sa sako an pamamalos mo sa sainda,Huling sa saimo ko ipinagkatiwala an sakuyang kaso.
21 Kaya ini an sabi ni Jehova laban sa mga taga Anatot+ na gustong gumadan sa sako* asin nagsasabi: “Dai ka magpropesiya sa ngaran ni Jehova,+ ta kun iyo, magagadan ka sa kamot mi”;
22 kaya ini an sabi ni Jehova na pamayo nin mga hukbo: “Papanimbagon ko sinda. An mga hoben na lalaki magagadan sa espada,+ asin an mga aki nindang lalaki saka mga aki nindang babayi magagadan sa tiggutom.+
23 Mayo nin matatada sa sainda maski saro, huling mapaabot ako nin kapahamakan sa mga taga Anatot+ sa taon na papanimbagon sinda.”
Mga Nota
^ Minalataw na si Jeremias.
^ O “dugos.”
^ O “Mangyari lugod.”
^ Sa literal, “na minabangon nin amay asin nagsasadol.”
^ O “ikiniling an saindang talinga.”
^ Sa literal, “harong.”
^ Sa literal, “harong.”
^ O “nin atang na aso.”
^ O “diyos.”
^ An buot sabihon, si Jeremias.
^ An buot sabihon, an Juda.
^ An buot sabihon, mga atang sa templo.
^ O “an kauruiraruming mga emosyon.” Sa literal, “an mga bato.”
^ Sa literal, “na naghahanap sa saimong kalag.”
