Jeremias 24:1-10
-
Magayon na mga igos asin makanos na mga igos (1-10)
24 Dangan may ipinahiling sa sako si Jehova na duwang basket nin mga bungang igos* na nasa atubangan kan templo ni Jehova, pagkatapos na puwersahan na darahon ni Hading Nabucodonosor* kan Babilonya an hadi kan Juda na si Jeconias*+ na aki ni Jehoiakim,+ kaiba an mga halangkaw na opisyal* kan Juda, an mga ekspertong trabahador, asin an mga panday;* dinara niya sinda hali sa Jerusalem pasiring sa Babilonya.+
2 Magayunon an mga igos sa sarong basket, siring sa mga inot na bungang igos, pero makanuson an mga igos sa saro pang basket, grabeng kanos mala ta dai iyan makakan.
3 Dangan hinapot ako ni Jehova: “Ano an nahihiling mo, Jeremias?” Kaya nagsimbag ako: “Mga igos; an magayon na mga igos magayunon, pero an makanos na mga igos makanuson, grabeng kanos mala ta dai iyan makakan.”+
4 Dangan uminabot sa sako an tataramon ni Jehova, na an sabi:
5 “Ini an sabi ni Jehova na Diyos kan Israel, ‘Arog kan magayon na mga igos na ini, magayon man an magigin pagtratar ko sa mga puwersahan na dinara hali sa Juda, na mga pinahali ko sa lugar na ini pasiring sa daga kan mga Caldeo.
6 Babantayan ko sinda para sa saindang ikakarahay, asin papabalikon ko sinda sa dagang ini.+ Papasarigon ko sinda, asin dai ko gagabaon; itatanom ko sinda, asin dai ko gagabuton.+
7 Asin tatawan ko sinda nin pusong may pagmawot na mamidbid ako, na ako si Jehova.+ Sinda magigin sakuyang banwaan, asin ako magigin Diyos ninda,+ huling mabalik sinda sa sako nin bilog nindang puso.+
8 “‘Alagad kun manungod sa makanos na mga igos na makanuson mala ta dai iyan makakan,+ ini an sabi ni Jehova: “Arog ko man kaiyan tatrataron si Hading Zedekias+ kan Juda, an mga pamayo* niya, an mga natatada sa Jerusalem na nagkawaralat sa dagang ini, asin idtong mga nag-iistar sa daga nin Ehipto.+
9 Mapaabot ako sa sainda nin kapahamakan asin gigibuhon ko sindang sarong bagay na magigin dahilan na an gabos na kahadian sa daga tarakigan,+ sarong katuyawan, sarong sarabihon, puntirya nin panunuya, asin sarong sumpa+ sa gabos na lugar na diyan iwinawarak ko sinda.+
10 Asin ipapadara ko laban sa sainda an espada,+ an tiggutom, asin an epidemya,*+ sagkod na mapara sinda sa daga na itinao ko sa sainda asin sa mga apuon ninda.”’”
Mga Nota
^ An bunga kan kahoy na higera.
^ Sa literal, “Nabucodorosor,” saro pang ispeling kan pangaran.
^ Inaapod man na Jehoiakin asin Conias.
^ O “mga prinsipe.”
^ O posibleng “mga paratugdok nin kuta.”
^ O “prinsipe.”
^ O “hilang.”
