Jeremias 42:1-22
42 Dangan an gabos na namamayo nin hukbo, asin si Johanan+ na aki ni Karea, si Jezanias na aki ni Hosaias, saka an bilog na banwaan, puon sa pinakahamak sagkod sa pinakaprominente, nagrani
2 asin nagsabi ki Jeremias na propeta: “Danguga tabi an pakimahirak mi, asin mamibi ka para sa samuya ki Jehova na saimong Diyos, para sa gabos na natatadang ini,+ ta diit na sana an natada sa dating kadakul, arog kan nahihiling mo.
3 Lugod na sabihon sa samo ni Jehova na saimong Diyos an dalan na dapat ming lakawan asin an dapat ming gibuhon.”
4 Nagsimbag sa sainda si Jeremias na propeta: “Sige, mamimibi ako ki Jehova na saindong Diyos arog kan pakiulay nindo; sasabihon ko sa saindo an lambang tataramon na isimbag ni Jehova sa saindo. Mayo akong itatago sa saindo ni sarong tataramon.”
5 Nagsimbag sinda ki Jeremias: “Lugod na magin totoo asin maimbod na saksi si Jehova laban sa samuya kun dai mi gigibuhon nin eksakto an instruksiyon sa samo ni Jehova na saimong Diyos na ipapaagi niya sa saimo.
6 Marahay man o maraot, susunudon mi an boses ni Jehova na samuyang Diyos, na sa saiya pinakiulayan mi ikang dumulok, tanganing magin marahay an samuyang kaabtan huling sinusunod mi an boses ni Jehova na samuyang Diyos.”
7 Pakalihis nin sampulong aldaw, uminabot ki Jeremias an tataramon ni Jehova.
8 Kaya ipinaapod niya si Johanan na aki ni Karea saka an gabos na namamayo nin hukbo na kaiba niya asin an bilog na banwaan, puon sa pinakahamak sagkod sa pinakaprominente.+
9 Sinabi niya sa sainda: “Ini an sabi ni Jehova na Diyos kan Israel, na sa saiya pinakiulayan nindo akong dumulok tanganing sabihon sa atubangan niya an pakimahirak nindo:
10 ‘Kun sisiguraduhon nindong mapirmi kamo sa dagang ini, papasarigon ko kamo asin dai ko kamo gagabaon; itatanom ko kamo asin dai ko kamo gagabuton, huling ikakamundo* ko an kapahamakan na ipinaabot ko sa saindo.+
11 Dai kamo matakot huli sa hadi kan Babilonya, na kinakatakutan nindo.’+
“‘Dai kamo matakot huli sa saiya,’ an sabi ni Jehova, ‘ta nasa kaibanan nindo ako, tanganing iligtas kamo sa kamot niya.
12 Asin kakahirakan ko kamo,+ tapos kakahirakan man niya kamo saka papabalikon niya kamo sa sadiri nindong daga.
13 “‘Pero kun sasabihon nindo, “Dai, dai kami mapirmi sa dagang ini!” asin dai nindo susunudon an boses ni Jehova na saindong Diyos
14 paagi sa pagsabing, “Dai, maduman na lang kami sa daga nin Ehipto,+ ta duman dai kami makakahiling nin giyera o makakadangog nin tanog kan hamudyong o magugutom sa tinapay; duman kami maistar,”
15 danguga nindo an tataramon ni Jehova, O mga natatada sa Juda. Ini an sabi ni Jehova na pamayo nin mga hukbo, an Diyos kan Israel: “Kun desidido nanggad kamong magpasiring sa Ehipto asin kun talagang magduman kamo tanganing duman mag-istar,*
16 aabutan kamo duman sa daga nin Ehipto kan mismong espadang kinakatakutan nindo, asin susundan kamo sa Ehipto kan mismong tiggutom na kinakatakutan nindo, asin duman kamo magkakagaradan.+
17 Asin an gabos na desididong magpasiring sa Ehipto tanganing duman mag-istar magagadan sa espada, sa tiggutom, asin sa epidemya.* Mayo sa sainda an makakaligtas o makakadulag sa kapahamakan na ipapaabot ko sa sainda.”’
18 “Huli ta ini an sabi ni Jehova na pamayo nin mga hukbo, an Diyos kan Israel: ‘Kun paanong an sakong kaanggutan asin pagkaungis iinula ko sa mga nag-iistar sa Jerusalem,+ iuula ko man sa saindo an kaanggutan ko kun mapasiring kamo sa Ehipto, asin magigin kamong sarong sumpa, sarong bagay na magigin dahilan na an mga tawo tarakigan, sarong maldisyon, asin sarong katuyawan,+ asin dai na nindo nuarin man mahihiling giraray an lugar na ini.’
19 “Nagtaram na si Jehova laban sa saindo, O mga natatada sa Juda. Dai kamo magduman sa Ehipto. Tandaan nindo na pinatanidan ko kamo ngunyan,
20 na an pagkakasala nindo mangangahulugan kan saindong buhay.* Huli ta pinakiulayan nindo ako na dumulok ki Jehova na saindong Diyos, asin sinabi nindo, ‘Mamibi ka para sa samo ki Jehova na samuyang Diyos, asin sabihon mo samo an gabos na sasabihon ni Jehova na samuyang Diyos, asin gigibuhon mi iyan.’+
21 Asin sinabi ko iyan sa saindo ngunyan, pero dai nindo susunudon an boses ni Jehova na saindong Diyos o gigibuhon an ano man na sinabi niya sa sako na sabihon sa saindo.+
22 Kaya, tandaan nindo na siguradong magagadan kamo sa espada, sa tiggutom, asin sa epidemya sa lugar na gusto nindong dumanan asin istaran.”+
