Job 12:1-25
12 Dangan nagsimbag si Job:
2 “Sige, kamo an mga tawong nakakasabot,*Asin pag nagadan kamo, mayo na nin madunong!
3 Pero may pakasabot* man ako.
Bako akong mas hababa kisa saindo.
Siisay an dai nakakaaram kan mga bagay na ini?
4 Pigngingirisihan ako kan sakong mga kairiba,+Ako na nag-aapod sa Diyos asin naghahalat nin simbag.+
An tawong matanos asin daing katuyawan arog ko nagin kangingisihan.
5 An tawong mayong pinaghahaditan pigbabaliwala an kapahamakan,Na iniisip na para lang iyan sa mga tawong an mga bitis nagsasayasay.*
6 Matuninong sa mga tolda kan mga parahabon,*+Asin matiwasay an mga nagpapaanggot sa Diyos,+Sinda na an saindang diyos yaon sa saindang mga kamot.
7 Alagad, haputon mo tabi an mga hayop, asin tutukduan ka ninda;Pati man an mga gamgam* sa kalangitan, asin sasabihon ninda iyan sa saimo.
8 O kaya pagmasdan* mo an daga, asin tutukduan ka kaiyan;Asin ihahayag iyan sa saimo kan mga sira sa dagat.
9 Siisay sa gabos na ini an dai nakakaaramNa an kamot ni Jehova an naggibo sa mga ini?
10 Nasa kamot niya an buhay kan lambang bagay na may buhay*Asin an espiritu* kan lambang tawo.*+
11 Bakong pigtetesting kan talinga an mga tataramonKun paanong pignanamitan kan dila* an kakanon?+
12 Bakong yaon an kadunungan sa mga may edad na+Asin an pakasabot sa mga nabuhay na nin halawig?
13 Yaon saiya an kadunungan asin an kakusugan;+Igwa siya nin katuyuhan* asin pakasabot.+
14 Pag may ginaba siya, dai na iyan maitutugdok liwat;+An ano man na isara niya, dai iyan mabubukasan nin siisay man.
15 Pag pinugulan niya an mga katubigan, an gabos naaalang;+Pag binutasan niya an mga iyan, sa daga nagbabaha.+
16 Yaon sa saiya an kusog asin an praktikal na kadunungan;+Yaon sa saiya an nalalagalag asin an nanglalagalag;
17 Pinapalakaw niyang nakabitis* an mga parakonseho,Asin ginigibo niyang garo mangmang an mga hukom.+
18 Hinahalian niya nin awtoridad an mga hadi,+Asin hinahagkusan niya an saindang habayan* nin paha nin uripon.
19 Pinapalakaw niyang nakabitis an mga saserdote,+Asin pinapabagsak niya an mga haloy nang nasa kapangyarihan;+
20 Dai niya pinapataram an pinagkakatiwalaan na mga parakonseho,Asin hinahalian niya nin kadunungan an mga gurang na lalaki;*
21 Ipinapasupog niya nin todo an mga tawong ginagalangan,+Asin pinapaluya niya an mga makapangyarihan;*
22 Ihinahayag niya an harararom na bagay na nakatago sa kadikluman;+Asin dinadara niya an mahibog na kadikluman pasiring sa kaliwanagan;
23 Pinapakusog niya an mga nasyon para laglagon sinda;Pinapadakula niya an mga nasyon, tanganing puwersahan niya sindang madara sa ibang nasyon.*
24 Hinahali niya an pakasabot* kan mga lider kan banwaan,Asin pinapalagaw-lagaw niya sinda sa kaawagan na mayo nin dalan.+
25 Nagkakapkap sinda sa kadikluman,+ kun sain daing liwanag;Pinapalagaw-lagaw niya sinda na garo tawong burat.*+
Mga Nota
^ Sa literal, “kamo an banwaan.”
^ Sa literal, “puso.”
^ O “nadadarinas.”
^ O “mahàbas.”
^ O “bayong.”
^ O posibleng “kaulayon.”
^ O “an kalag kan gabos na buhay.”
^ O “hinangos.”
^ Sa literal, “kan gabos na laman kan tawo.”
^ Sa literal, “ngaragngag.”
^ O “konseho.”
^ O “mayo kan gabos na bagay.”
^ O “iksan.”
^ O “an kamagurangan.”
^ Sa literal, “hinahaluwagan niya an paha kan mga makapangyarihan.”
^ O “tanganing maidistiyero niya sinda.”
^ Sa literal, “puso.”
^ O “buyong.”
