Job 26:1-14
26 Nagsimbag si Job:
2 “Dakulaon an naitabang mo sa saro na daing kusog!
Ilinigtas mo nanggad an saro na maluya an takyag!+
3 Abaang gayon kan sadol na itinao mo sa saro na kulang sa kadunungan!+
Ihinayag mo nin lubos an saimong praktikal na kadunungan!*
4 Kiisay ka nakikipag-ulay,Asin siisay an nagpasabong sa saimo para sabihon an arog kaiyan na mga bagay?*
5 An mga gadan, na dai nang magigibo pa, nagkukubog-kubog;Mas hababa pa sinda kisa sa katubigan asin sa mga nakaistar diyan.
6 An Lubungan* huba sa atubangan nin Diyos,*+Asin an lugar nin kalapaan* mayo nin tahob.
7 Iinuunat niya an norteng kalangitan* sa daing laog na kahiwasan*+Asin ibinibitin an daga sa mayo;
8 Pinapatos niya an tubig sa saiyang mga panganuron,+Kaya dai nabubusi an mga panganuron sa gabat kaiyan;
9 Linilipudan niya an saiyang trono,Na ibinibiklad an saiyang panganuron para tahuban iyan.+
10 Pigkukuritan niya an puro kan daga* sa ibabaw kan katubigan;+Nagbubugtak siya nin linderos* sa pag-ultanan kan liwanag asin kadikluman.
11 An mismong mga harigi kan langit nagyuyugo-yugo;Nabibigla sinda dahil sa saiyang pagsaway.
12 Binubukag* niya an dagat gamit an saiyang kapangyarihan,+Asin paagi kan saiyang pakasabot rinurunot niya an higanteng hayop sa dagat.*+
13 Paagi sa saiyang hinangos* pinapaliwanag niya an kalangitan;Pigtutusok kan saiyang kamot an maulyas* na halas.
14 Uya! Mga gilid pa sana ini kan saiyang mga dalan;+Maluyang hinghing pa sana an nadangog manungod sa saiya!
Kaya siisay an makakasabot sa saiyang makusog na daguldol?”+
Mga Nota
^ O “sentido komun.”
^ Sa literal, “Asin kiisay na hinangos (espiritu) an nagluwas hali sa saimo?”
^ Sa literal, “niya.”
^ O “an Abadon,” na nangangahulugan “Kalaglagan.”
^ Sa literal, “an norte.”
^ Sa literal, “sa kawaran.”
^ O “Nagkukurit siya nin bilog.”
^ O “sagkudan.”
^ O “Inuukag.”
^ Sa literal, “si Rahab.”
^ O “duros.”
^ O “an marikas na nagkakanap.”
