Job 3:1-26
3 Pagkatapos kaini, nagtaram si Job, asin isinumpa niya an aldaw na namundag siya.*+
2 Sinabi ni Job:
3 “Napara na lang kuta an aldaw na namundag ako,+Siring man an banggi na may nagsabi: ‘Ipinangidam an sarong lalaki!’
4 Nagin na lang kutang kadikluman an aldaw na idto.Dai na lang kuta iyan ginirumdom nin Diyos;
Dai na lang kuta nin liwanag na nagsirang kaidto.
5 Binawi na lang kuta idto kan grabeng kadikluman.*
Tinahuban na lang kuta idto nin dampog.
Tinakot na lang kuta idto kan mga nagpapadiklom sa aldaw.
6 An bangging idto—kinua na lang kuta idto kan kaduluman;+Dai na lang kuta idto ipinag-ugma sa mga aldaw nin taon,Asin dai na lang kuta idto iiniba sa mga aldaw kan mga bulan.
7 Iyo! Nagin na lang kutang baog an bangging idto;Dai na kuta kaidto nagkaigwa nin kurahaw nin kaugmahan.
8 Isinumpa na lang kuta idto kan mga nagsusumpa sa aldaw,Kan mga kayang pumukaw sa Leviatan.*+
9 Nagin madiklom na lang kuta an mga bituon sa mag-aagahon kaiyan;Dai na lang kuta nag-abot an pighahalat kaiyan na liwanag nin aldaw,Asin dai na kuta kaiyan nahiling an mga sinag kan mag-aagahon.
10 Huli ta dai kaiyan isinara an mga pinto kan tulak kan sakuyang ina;+Ni itinago man kaiyan an mga kasakitan sa sakuyang mga mata.
11 Taano ta dai na lang ako nagadan kan ipangaki ako?
Ano ta dai na lang ako napara kan magluwas ako sa tulak kan sakuyang ina?+
12 Taano ta igwa nin mga tuhod na nagsalo sa sakoAsin mga suso na nagpasuso sa sako?
13 Ngunyan kuta nakahigda ako nin tuninong;+Nagtuturog kuta ako asin nagpapahingalo+
14 Kaiba kan mga hadi kan daga saka kan saindang mga parakonseho,Na nagtugdok nin mga lugar na ngunyan garaba na,*
15 O kaiba kan mga prinsipe na igwa nin mga bulawan,Na an mga harong pano nin mga plata.*
16 O taano ta dai na lang ako nagadan sa laog kan tulak kan sakong ina na dai siya nagmamangno,Siring sa mga aki na dai lamang nakahiling nin liwanag?
17 Duman maski an mga maraot dai na napupurisaw;Duman an mga pagal nagpapahingalo.+
18 Duman an mga preso nagdidiskanso;Dai ninda nadadangog an boses kan saro na nagpipirit sa saindang magtrabaho.
19 An sadit asin dakula pantay-pantay duman,+Asin an uripon talingkas sa saiyang amo.
20 Taano ta nagtatao siya nin liwanag sa saro na nagsasakitAsin nin buhay sa mga grabe an kamunduan?*+
21 Hinihidaw ninda an kagadanan, alagad taano ta dai iyan nag-aabot?+
Kinakalot ninda iyan nin labi pa sa nakatagong mga kayamanan,
22 Sinda na maggagaya-gaya nin labi-labiSaka mag-uugma oras na makua an lubungan.
23 Taano ta nagtatao siya nin liwanag sa sarong tawo na nalalagalag,Na pigbugtakan nin Diyos nin kudal sa palibot?+
24 Huli ta an sakuyang pag-agrangay iyo na an nagi kong kakanon,+Asin nagin siring sa tubig na nagbubulos an sakuyang pag-agrutong.+
25 Huli ta nag-abot sa sako an sakuyang kinakahaditan,Asin nangyari sa sako an sakuyang kinakatakutan.
26 Mayo ako nin katuninungan, mayo nin katrangkiluhan, mayo nin kapahingaluan,Pero padagos pang nag-aabot an kasakitan.”
Mga Nota
^ Sa literal, “an aldaw niya.”
^ O “kan kadikluman asin anino nin kagadanan.”
^ Pinaniniwalaan na nanunungod ini sa buaya o sa iba pang dakula asin makusog na hayop sa tubig.
^ O posibleng “Na nagtugdok nin tiwangwang na mga lugar.”
^ Sa Ingles, silver.
^ O “mga may kapaitan an kalag.”
