Job 41:1-34
-
Ilinadawan nin Diyos an makangangalas na Leviatan (1-34)
41 “Madadakop mo daw an Leviatan*+ gamit an banwit,O mapupugulan mo daw an dila kaiyan gamit an pisi?
2 Masusurukan mo daw nin pisi an dungo kaiyanO matutusukan nin kawit* an mga panga kaiyan?
3 Makikimahirak daw iyan sa saimoO mabuot na makikipag-ulay sa saimo?
4 Makikipagtipan daw iyan sa saimo,Tanganing magin uripon mo iyan sagkod lamang?
5 Makikikawat ka daw diyan na garo sana nakikikawat sa gamgam,O gagakudan mo daw iyan para sa saradit mong aking babayi?
6 Babakalon daw iyan kan mga parabakal?
Babanga-bangaon daw ninda iyan sa mga negosyante?
7 Papauranan mo daw nin mga sarapang* an anit kaiyan+O nin garod na pansira an payo kaiyan?
8 Purbaran mong kaputan iyan;Dai mo malilingawan an pakikilaban mo diyan, asin dai mo na iyan uutruhon pa!
9 Daing saysay an paglaom na madakop iyan.
Mahiling mo pa lang iyan, matatakot* ka na.
10 Mayo nin siisay man an nangangahas na paangguton iyan.
Kaya siisay an makakatindog tumang sako?+
11 Siisay an may nainot na itinao sako kaya dapat ko siyang bayadan?+
Sakuya an gabos na nasa sirong kan kalangitan.+
12 Mataram pa ako manungod sa mga bitis kaiyan,Manungod sa kusog kaiyan asin sa magayon na pagkaporma kan hawak kaiyan.
13 Siisay an nakahali kan mahibog na anit kaiyan?
Siisay an malaog sa nakabukang mga panga kaiyan?
14 Siisay an makakabuka kan nguso* kaiyan?
Makatatakot an mga ngipon kaiyan.
15 An likod kaiyan igwa nin mga nakaraya-rayang kiskis*Na taraid-taid na marhay.
16 Nakalapat na marhay an pagkataraid-taid kan mga kiskis,Kaya maski duros dai nakakalaog sa pag-ultanan kan mga iyan.
17 Magkadurukutan an mga iyan;Nakatakod an mga iyan sa lambang saro asin dai napapagsuway.
18 Pag minahatsing iyan, may minasilyab na liwanag,Asin an mga mata kaiyan garo mga sinag nin mag-aagahon.
19 May minaluwas na silyab nin kikilat sa nguso kaiyan;May minatalsik na silyab nin kalayo.
20 May nagluluwas na aso sa dungo kaiyan,Siring sa sarong hurno na ginagatungan nin mga duot.
21 An hinangos kaiyan nakakapaarab-adab nin mga baga,Asin may kalayo na nagluluwas sa nguso kaiyan.
22 Makusugon an liog kaiyan,Asin nakakamati nin grabeng takot an mga nakakaatubang kaiyan.
23 Pusog na marhay an pagkasuon-suon kan anit* kaiyan;Masarig iyan, na garo minoldeng metal na dai nahihiro.
24 An puso kaiyan kasingtagas nin gapo,Iyo, kasingtagas nin pang-irarom na gapo nin gilingan.
25 Pag minabangon iyan, maski an mga makusog natatakot;Natataranta an mga tawo pag nagkakawag-kawag iyan.
26 Dai saiya nagtatalab an espada;Ni an garod, an pana, o an iba pang armas.+
27 Garo lang saiya dagami an lansangSaka lapang kahoy an tanso.
28 Dai iyan napapadulag kan pana;An mga gapong panglagpitaw garo lang saiya pinaggapasan.
29 An sarong pambadol garo lang saiya pinaggapasan,Asin pigngingisihan kaiyan an sagitsit nin diyabelin.
30 An tulak kaiyan garo igwang mga matarom na pidaso nin pasang kuron;Garo inagihan nin pamaba na pangginik an gira kaiyan sa kalalabuyan.+
31 Pinapakalakaga kaiyan an kararuman na garo tubig sa sarong lutuan;Binubukag kaiyan an dagat na garo nagsasabo-sabong lutuan nin panglahid.
32 Nagsasabo-sabo* an tubig na inaagihan kaiyan sa paglangoy.
Iisipon nin saro na igwang mga uban an hararom na katubigan.
33 Mayo iyan nin kapareho sa daga,Sarong linalang na daing kinakatakutan.
34 Hinihiling kaiyan nin matarom an gabos na mapalangkaw.
Iyan an hadi kan gabos na makukusog asin mababangis na hayop.”
Mga Nota
^ Posibleng an buaya.
^ Sa literal, “tunok.”
^ Garo garod na may salait. Ginagamit ini sa pagdakop nin dakulang mga sira.
^ O “mabagsak.”
^ Sa literal, “kan mga pinto kan lalawgon.”
^ O posibleng “An ipinag-oorgulyo kaiyan iyo an mga nakaraya-rayang kiskis kaiyan.”
^ Sa literal, “laman.”
^ O “Nagkikinang.”
