Sigun ki Marcos 16:1-8
-
Binuhay liwat si Jesus (1-8)
16 Kaya pakalihis kan Sabbath,+ si Maria Magdalena, si Maria+ na ina ni Santiago, asin si Salome nagbakal nin mahamot na mga sangkap* huli ta gusto nindang magpasiring duman saka ilahid an mga ini sa hawak niya.+
2 Asin amayon kaidtong inot na aldaw kan semana pagkasirang kan aldaw, nakaabot sinda sa lulubngan.*+
3 Nag-uurulay-ulay sinda, na sinasabi: “Siisay an mapaligid para sa sato kan gapo hali sa entrada kan lulubngan?”
4 Pero paghiling ninda, nahiling ninda na napaligid na an gapo, maski ngani dakulaon iyan.+
5 Kan maglaog sinda sa lulubngan, may nahiling sindang sarong hoben na lalaki na nakatukaw sa parteng tuo, na nakasulot nin halabang puting bado, kaya nabigla sinda.
6 Sinabi niya sa sainda: “Dai kamo mabigla.+ Hinahanap nindo si Jesus na Nazareno na pinadusahan nin kagadanan sa harigi. Ibinangon siya.+ Mayo siya digdi. Hilinga nindo, digdi ninda siya ibinugtak.+
7 Pero magduman kamo, sabihon nindo sa mga disipulo niya asin ki Pedro, ‘Nag-inot na siya pasiring sa Galilea.+ Mahihiling nindo siya duman, arog kan sinabi niya sa saindo.’”+
8 Kaya pagluwas ninda, nagdulag sinda hali sa lulubngan, na nagtatakig asin dai maipaliwanag an namamatian. Asin mayo sindang sinabi sa kiisay man, dahil natatakot sinda.*+
Mga Nota
^ Nanunungod ini sa mga pulbos o dahon-dahon asin lana na ilinalaag sa bangkay bilang pag-andam sa paglubong kaini.
^ O “lulubngan na girumduman.”
^ Sigun sa masasarigan na mga inot na manuskrito kan Bibliya, an Ebanghelyo ni Marcos nagtatapos sa mga tataramon na yaon sa bersikulo 8. Hilingon an Apendise A3.
