Mikas 6:1-16
6 Danguga tabi nindo an sinasabi ni Jehova.
Magbuhat ka, ipresentar mo sa atubangan kan kabukidan an saimong kaso,Asin dangugon man lugod kan mga bulod an boses mo.+
2 Danguga, O kabukidan, an kaso ni Jehova,Kamong mga masasarig na pundasyon kan daga,+Huling igwa si Jehova nin kaso laban sa saiyang banwaan;Sa Israel siya makikiargumento:+
3 “O sakuyang banwaan, anong ginibo ko saimo?
Paano taka man pinagal?+
Magtestigo ka laban sa sako.
4 Ilinuwas taka baga sa daga nin Ehipto,+Tinubos taka hali sa lugar kun sain ka nagin uripon;*+Isinugo ko sa saimo si Moises, Aaron, asin Miriam.+
5 Girumduma tabi, O sakuyang banwaan, kun ano an plinano ni Hading Balak kan Moab,+Asin kun ano an isinimbag sa saiya ni Balaam na aki ni Beor+—Kun ano an nangyari puon sa Sitim+ sagkod sa Gilgal+—Tanganing maaraman mo an matanos na mga gibo ni Jehova.”
6 Ano an dadarahon ko pag nag-atubang ako ki Jehova?
Ano an dadarahon ko sa pagduko ko sa Diyos na nasa kaitaasan?
Maatubang daw ako sa saiya na may darang mga bílog na dulot na pigtututong,Na may darang sarong taon nang mga ugbon na baka?+
7 Mauugma daw si Jehova sa ribo-ribong lalaking karnero,Sa manampulong ribong mga salog nin lana?+
Itatao ko daw an sakong panganay na lalaki para sa sakuyang pagrebelde,An bunga kan sakuyang hawak* para sa kasalan ko?*+
8 Sinabi niya sa saimo, O tawo, kun ano an marahay.
Asin ano an hinahagad sa saimo ni Jehova?
An magsagibo sana nin hustisya,*+ kamutan an kaimbudan,*+Asin maglakaw na may kababaan nin buot+ kaiba kan saimong Diyos!+
9 Nag-aapod sa siyudad an boses ni Jehova;An mga igwa nin praktikal na kadunungan magkakaigwa nin pagkatakot sa saimong pangaran.
Magtao kamong atensiyon sa pamakol asin sa nagtalaga kaiyan.+
10 Yaon pa daw sa harong kan maraot an mga kayamanan na nakua paagi sa mga maraot na giboSaka an may kulang na takadan nin epa* na makababaldi?
11 Maibibilang daw akong daing sála* kun madaya an mga timbangan ko,Kun igwa akong bag na may mga gapong pantimbang na may daya?+
12 Huli ta madadahas an saiyang mayayaman na tawo,Asin nagtataram nin kaputikan an mga nakaistar sa saiya;+An saindang dila asin nguso mapandaya.+
13 “Kaya, lulugadan taka paagi sa paghampak sa saimo,+Asin magigi kang tiwangwang dahil sa mga kasalan mo.
14 Makakan ka pero dai ka mababasog;Makakamati ka nin gutom.+
An tinanggal mo, dai mo madadara,Asin an ano man na madadara mo, itatao ko sa espada.
15 Masabwag ka nin banhi, pero dai ka maani.
Mapuga* ka nin mga oliba, pero dai mo magagamit an lana;Asin magibo ka nin bagong arak, pero dai ka mainom nin arak.+
16 Huli ta pigsusunod nindo an mga reglamento ni Omri asin inaarog an gabos na gibo kan pamilya* ni Ahab,+Asin nagsusunod kamo sa saindang sadol.
Kaya sa gigibuhon ko saindo matarakig sa takot an makakahiling sa saindoSaka tutuya-tuyaon an mga nakaistar sa siyudad;*+Asin maeeksperyensiyahan nindo an pag-ulog-ulog kan mga banwaan.”+
Mga Nota
^ Sa literal, “hali sa harong nin mga uripon.”
^ O “lawas.”
^ O “para sa kasalan kan kalag ko?”
^ O “magin mabuot asin maimbod sa saimong pagkamuot.” Sa literal, “kamutan an maimbod na pagkamuot.”
^ O “magin makatanusan sana; magin patas sana.”
^ Hilingon an Apendise B14.
^ O “Maibibilang daw na malinig an pagkatawo ko.”
^ Sa literal, “Matimak-timak.”
^ Sa literal, “harong.”
^ O “Saka mapapataghoy an mga makakahiling sa mga nakaistar sa saiya.”
