Surat sa mga Taga Roma 12:1-21
12 Kun siring, nakikiulay ako sa saindo mga tugang base sa pagkahirak nin Diyos na ipresentar nindo an saindong mga hawak+ bilang atang na buhay, banal+ asin akseptable sa Diyos, na sa paaging iyan nagsasagibo kamo nin sagradong paglilingkod gamit an saindong kakayahan sa pangangatanusan.+
2 Asin dai na kamo magpamolde sa sistemang ini nin mga bagay,* kundi maliwat kamo paagi sa pagbago kan saindong isip,+ tanganing mapatunayan nindo sa saindong sadiri+ an marahay, akseptable, saka perpektong kabutan nin Diyos.
3 Paagi sa daing kapantay na kabuutan* na ipinahiling sa sako, sinasabihan ko an lambang saro diyan sa saindo na dai mag-isip nin sobra manungod sa saiyang sadiri nin urog pa kisa sa maninigong isipon,+ kundi an lambang saro mag-isip sa katuyuhan na magkaigwa nin tultol na isip, uyon sa pagtubod+ na itinao* nin Diyos sa saiya.
4 Huli ta kun paanong an sarong hawak igwa nin dakul na kabtang,+ alagad an mga kabtang na iyan bako gabos parareho an trabaho,
5 kita man, maski dakul, sarong hawak na kasaro ni Cristo, alagad bilang mga indibidwal, kita mga kabtang na magkakoronektar sa lambang saro.+
6 Kaya, mantang tinawan kita nin mga balaog na nagkakalain-lain base sa daing kapantay na kabuutan na ipinahiling sa sato,+ kun iyan pagpropesiya, magpropesiya kita uyon sa pagtubod na itinao sa sato;
7 o kun iyan paglilingkod sa iba, ipagpadagos ta an paglilingkod na iyan;* o para sa nagtutukdo, ipagpadagos niya an pagtutukdo;+
8 o para sa nagpapakusog nin buot,* padagos siyang magtao nin pampakusog nin buot;*+ para sa nagdidistribwir,* gibuhon niya iyan nin bukas-palad;+ para sa nanginginot, gibuhon niya iyan na may kahigusan;*+ para sa nagpapahiling nin pagkahirak, gibuhon niya iyan nin bilog na puso.+
9 An saindo lugod na pagkamuot magin daing pagsagin-sagin.+ Kaungisan an maraot;+ mangapot sa kun ano an marahay.
10 Bilang pagpahiling nin pagkamuot na sa-magturugang, magin mapagpadangat kamo sa lambang saro. Sa pagtao nin onra* sa lambang saro, kamo an manginot.*+
11 Magin mahigos,* bakong hugakon.*+ Magin malaad paagi sa espiritu.+ Magpauripon ki Jehova.*+
12 Mag-ugma huli sa saindong paglaom. Magtagal pag nag-aagi nin kasakitan.+ Magin matiyaga sa pagpamibi.+
13 Maghiras sa mga banal* sigun sa saindang mga pangangaipo.+ Ugalion an* pagigin mapag-istimar.+
14 Padagos na mawuton an ikakarahay kan* mga parapersegir;+ magpahayag nin bendisyon asin dai magmaldisyon.+
15 Makiugma sa mga nag-uugma; makitangis sa mga nagtatangis.
16 Mansayon an iba na kapareho kan pagmansay nindo sa saindong sadiri; dai magparaisip nin halangkawon na mga bagay,* kundi makiayon sa hamak na mga bagay.*+ Dai nindo pagsabihon sa saindong sadiri na madunong kamo.+
17 Dai magbalos sa kiisay man nin maraot para sa maraot.+ Ikonsiderar kun anong mga bagay an marahay sa pagmansay* kan gabos na tawo.
18 Kun posible, sagkod na nakadepende iyan sa saindo,* makipagkatuninungan sa gabos na tawo.+
19 Dai nanggad kamo magbalos, mga namumutan, kundi tawan nin lugar an dakulang kaanggutan;*+ huli ta nasusurat: “‘Sakuya an pagbalos; ako an mabalos,’ an sabi ni Jehova.”*+
20 Imbes, “kun an saimong kaiwal nagugutom, pakakanon mo siya; kun siya napapaha, tawi siya nin maiinom; huli ta pag ini ginibo mo, magtatambak ka nin naglalaad na mga baga sa payo niya.”*+
21 Dai mo pagtugutan na madaog ka kan maraot, kundi padagos na daugon nin marahay an maraot.+
Mga Nota
^ O “dai na nindo pagtugutan na mamolde kamo kan panahon na ini.” Hilingon an “Sistema nin mga bagay” sa Glosaryo.
^ O “uyon sa sukol nin pagtubod na ihiniras (idinistribwir).”
^ O “kun iyan sarong ministeryo, magpadagos kita sa ministeryong iyan.”
^ O “kaigutan.”
^ O “nagkokontribwir.”
^ O “magtao nin sadol.”
^ O “nagsasadol.”
^ O “respeto; dignidad.”
^ O “mag-inot.”
^ Hilingon an Apendise A5.
^ O “Dai magin buntol sa saindong gibuhon.”
^ O “maigot.”
^ O “disipulo.”
^ O “Sundan an dalan nin.”
^ Sa literal, “na bendisyunan an.”
^ O “kundi magin mapakumbaba.”
^ O “dai magparabilog nin halangkawon na mga kaisipan; dai magin mapalangkaw.”
^ O “paghiling.”
^ O “sagkod na magigibo nindo.”
^ O “kaanggutan nin Diyos.”
^ Hilingon an Apendise A5.
^ An buot sabihon, pinapalumoy an buot nin sarong tawo asin tinutunaw an saiyang katagasan.
