Salmo 17:1-15
Pamibi ni David.
17 Danguga tabi an pakimahirak ko para sa hustisya, O Jehova;Tawan mong atensiyon an paghagad ko nin tabang;Dangugon mo an pamibi ko na itinaram kong mayong pandadaya.+
2 Lugod na magdesisyon kang may hustisya alang-alang sa sakuya;+Lugod na mahiling kan saimong mga mata kun ano an tama.
3 Siniyasat mo an sakong puso, siniyasat mo ako sa banggi;+Dinalisay mo ako;+Mahihiling mong dai ako nagpakana nin ano man na maraot,Asin mayong linapas an sakong nguso.
4 Ano man an ginigibo kan mga tawo,An mga dalan kan parahabon* linilikayan ko, kauyon kan tataramon mo.+
5 Padagos lugod akong maglakaw sa mga dalan moTanganing dai masingkog an mga bitis ko.+
6 O Diyos, nag-aapod ako saimo, ta aram kong sisimbagon mo ako.+
Ikiling mo sa sako an saimong talinga.* Danguga tabi an mga sinasabi ko.+
7 Ipahiling mo sa makangangalas na paagi an maimbod na pagkamuot mo,+O Paraligtas kan mga nagpapaili sa tuo mong kamotNa mga nagdudulag sa mga nagrerebelde sa saimo.
8 Ingatan mo ako siring sa alinawnaw* kan mata mo;+Itago mo ako sa lindong kan mga pakpak mo.+
9 Ingatan mo ako laban sa maraot na minasalakay sa sako,Sa mga mortal kong kalaban* na nakapalibot sa sako.+
10 Nagin sindang daing pakamati;*Gamit an nguso ninda, nagtataram sindang may kapalangkawan;
11 Pinapalibutan ninda kami ngunyan;+Naghahanap sinda nin pagkakataon tanganing kami pabagsakon.*
12 An maraot garo leon na gustong-gustong gutay-gutayon an saiyang nabiktima,Garo durudakula nang leon na nakalukob tanganing mantambang.
13 Tumindog ka, O Jehova, tanganing atubangon+ asin pabagsakon siya;Iligtas mo ako* sa maraot paagi kan saimong espada;
14 Iligtas mo ako paagi kan saimong kamot, O Jehova,Sa mga tawo kan kinaban na ini,* na an kahirasan yaon sa buhay na ini,+Sinda na mga pinaniguan mo nin marahay na mga bagay na saimong itinao+Asin mga nagwawalat nin pamana sa dakul na aki ninda.
15 Pero ako, huli kan sakong katanusan mahihiling ko an lalawgon mo;Kontento akong magmata na nasa presensiya mo.*+
Mga Nota
^ O “mahàbas.”
^ O “Dumuko ka asin dangugon mo ako.”
^ O “tawo-tawo.”
^ O “mga kalaban kan sakong kalag.”
^ O “Napapatos sinda kan sadiri nindang taba.”
^ O “tanganing ilampog kami sa daga.”
^ O “an kalag ko.”
^ O “kan sistemang ini nin mga bagay.”
^ O “na mahiling an saimong porma.”
