Salmo 51:1-19
Para sa direktor nin musika. Salmo ni David, kan dumanan siya ni Natan na propeta pagkatapos na durugan ni David si Bat-seba.+
51 Kahirakan mo ako, O Diyos, sigun sa saimong maimbod na pagkamuot.+
Paraon mo an sakong mga paglapas sigun sa saimong dakulang pagkahirak.+
2 Lubos mo akong hugasan sa sakuyang pagkakasala,+Asin linigan mo ako sa sakuyang kasalan.+
3 Huli ta aram kong marhay an mga paglapas ko,Asin an sakong kasalan pirming nasa atubangan* ko.+
4 Laban sa saimo—sa saimo urog sa gabos*—nagkasala ako;+Kun ano an maraot sa paghiling mo iyo an ginibo ko.+
Kaya, matanos ka nanggad pag ika nagtaramAsin tama an saimong paghusgar.+
5 Uya! Ipinangaki ako na may sála,Asin sa kasalan ako ipinangidam* kan sakuyang ina.+
6 Uya! Ikinakaugma mo an pagigin totoo kan panglaog na pagkatawo;+Tukduan mo nin tunay na kadunungan an kalaog-lauging* pagkatawo ko.
7 Tanganing magin malinig ako, dalisayon mo ako sa kasalan ko gamit an hisopo;+Tanganing magin mas maputi ako kisa sa niyebe, hugasan mo ako.+
8 Tugutan mo akong makadangog nin mga tanog nin pag-ugma asin paggaya-gaya,Tanganing an mga tulang na rinunot mo mag-ugma.+
9 Ipaling* mo an saimong lalawgon parayo sa mga kasalan ko,+Asin pahidon* mo an gabos na pagkakasala ko.+
10 Lalangon mo sa sako an sarong dalisay na puso, O Diyos,+Asin ibugtak mo sa sako an sarong bagong espiritu,+ saro na marigon.
11 Dai mo ako palayason sa atubangan mo;Asin dai mo paghalion sa sako an saimong banal na espiritu.
12 Ibalik mo sa sako an kaugmahan na namatian ko kan ako iligtas mo;+Pukawon mo sa sako an pagmawot na magsunod sa saimo.*
13 Itutukdo ko sa mga paralapas an mga dalan mo,+Tanganing an mga parakasala magbaralik sa saimo.
14 Iligtas mo ako sa pagkakasala sa dugo,+ O Diyos, an Diyos nin sakong kaligtasan,+Tanganing an sakong dila maugmang makapagpahayag kan saimong katanusan.+
15 O Jehova, ibuka mo an mga ngabil ko,Tanganing an sakong nguso makapagpahayag nin pag-umaw sa saimo.+
16 Huli ta habo mo nin atang—ta kun iyo, matao kuta ako kaiyan;+Dai mo ikinakaugma an bílog na dulot na pigtututong.+
17 An mga atang na nakakapaugma sa Diyos iyo an nalugadan na espiritu;An pusong nalugadan asin runot, O Diyos, dai mo isisikwal.*+
18 Sa saimong marahay na buot, gibuhon mo kun ano an marahay para sa Sion;Pasarigon mo an mga pader kan Jerusalem.
19 Dangan ikakaugma mong marhay an mga atang nin katanusan,An mga atang na pigtututong saka an mga bílog na dulot;Asin an mga torong baka idudulot sa ibabaw kan saimong altar.+
Mga Nota
^ O “isip.”
^ Sa literal, “sa saimo sana.”
^ O “Asin makasalan puon pa kan ipangidam ako.”
^ O “sekretong.”
^ O “Itago.”
^ O “paraon.”
^ Sa literal, “Lugod na alalayan mo ako nin sarong andam na espiritu.”
^ O “hahamakon.”
