Salmo 96:1-13
96 Magkanta ki Jehova nin sarong bagong kanta.+
Magkanta ki Jehova, kamo gabos sa daga!+
2 Magkanta ki Jehova; umawon an pangaran niya.
Ibalangibog nindo sa aroaldaw an maugmang bareta manungod sa pagliligtas niya.+
3 Ipahayag sa mga nasyon an saiyang kamurawayan,An makangangalas niyang mga ginibo sa gabos na banwaan.+
4 Nangungurog* si Jehova asin maninigong marhay na umawon.
Mas dapat na magkaigwa nin pagkatakot sa saiya kisa sa gabos na iba pang diyos.
5 Daing serbing mga diyos an gabos na diyos kan mga banwaan,+Pero si Jehova iyo an naggibo kan kalangitan.+
6 Yaon sa saiyang presensiya an kamahalan* asin kamurawayan;+Yaon sa saiyang santuwaryo an kusog asin kagayunan.+
7 Itao nindo ki Jehova an maninigo para sa saiya, kamong mga pamilya kan mga banwaan,Itao nindo ki Jehova an maninigo para sa saiya huli sa saiyang kamurawayan asin kusog.+
8 Itao nindo ki Jehova an kamurawayan na maninigo sa pangaran niya;+Magdara kamo nin regalo asin maglaog sa mga patyo niya.
9 Magduko* kamo ki Jehova sulot an saindong banal na gubing.*Magtarakig kamo sa atubangan niya, kamo gabos sa daga!
10 Ipahayag sa mga nasyon: “Si Jehova nagin Hadi!+
Matibay an pagkaestablisar sa daga,* dai iyan mahihiro.*
Huhusgaran niya nin pantay-pantay an* mga banwaan.”+
11 Maggaya-gaya an kalangitan, asin mag-ugma an daga;Maugmang maghagubuhob an dagat asin an gabos na nakakapano kaiyan;+
12 Mag-ugma an mga kalangtadan asin an gabos na yaon diyan.+
Kasabay kaiyan, maugmang magkururahaw an gabos na kahoy sa kadlagan+
13 Sa atubangan ni Jehova, huling padangadang* siya,Padangadang siya tanganing husgaran an daga.
Huhusgaran niya nin may katanusan an iniistaran na daga,*+Asin huhusgaran niya uyon sa saiyang kaimbudan an mga banwaan.+
Mga Nota
^ O “Dakula.”
^ O “dignidad.”
^ O “Magsamba.”
^ O posibleng “huli sa kahanga-hangang kagayunan kan saiyang kabanalan.”
^ O “sa mabungang daga.”
^ O “mayuyugyog.”
^ O “Idedepensa niya nin pantay-pantay an ipinapakipaglaban kan.”
^ O “nag-abot na.”
^ O “an mabungang daga.”
